Татарстан Президенты Казанның тарихи үзәгендә булып кайтты

Күчмә киңәшмәдә шулай ук Татарстан башкаласы Мэры Илсур Метшин катнашты. 

(Казан шәһәре KZN.RU, 12-нче июнь). Бүген Татарстан Республикасы Президенты Рөстәм Миңнеханов Казанның тарихи үзәге буйлап чираттагы җәяүле сәфәре кысаларында яңа төзелеш объектларын, шәһәрнең торгызылган һәм торгызылырга кирәкле тарихи биналарын карап чыкты. Аны Казан Мэры Илсур Метшин, ТР Президенты ярдәмчесе Олеся Балтусова, ТР төзелеш, архитектура һәм ТКХ министры Ирек Фәйзуллин, ТР мәдәният министры Айрат Сибагатуллин һәм башкалар озата йөрделәр. 

Габдулла Тукай урамындагы 3-нче номерлы йорт җәяүле сәфәрнең беренче объект булды. Аның ишегалдында ярымҗимерек бина урнашкан, бу бина ТР мөселманнары Диния нәзарәте мөлкәтендә. Бина тарихи һәм архитектур кыйммәткә ия түгел, шуңа күрә, белгечләр фикеренчә, бу урында яңа йорт төзү дөресрәк була. Рөстәм Миңнеханов ТР  мөселманнары Диния нәзарәтенә иске бинаны сүтәргә тәкъдим итте, ә архитекторларга тарихи бина габаритларында яңа төзелеш тәкъдимнәре проектларын эшләргә йөкләде.

Алга таба ТР Президентына ASG компаниясе вәкилләре Тукай урамында урнашкан берничә тарихи бинаны торгызу буенча башкарылган эш нәтиҗәләрен хәбәр иттеләр һәм Тукай урамы, 11 адресы буенча төзелә торган йортның проектын тәкъдим иттеләр. 

Шул ук урамда 31-нче номерлы  йорт ишегалдында сәфәрдә катнашучылар тарихи бинаны торгызу нәтиҗәләре белән таныша алды. Ләкин ишегалдында урнашкан тагын бер йорт ярымҗимерек хәлдә кала бирә. Илсур Метшин сүзләренчә, бина торгка куелган һәм торгызу эше белән шөгыльләнергә әзер инвесторны көтә.

1798 нче елгы архитектура һәйкәле – Галиев мәчете дә торгызылу таләп итә. “Мирас” республика программасы буенча һәйкәлне саклау һәм торгызу буенча чараларга 23 млн.сум бирелгән, ләкин таләп ителгән сумма күбрәк. Рөстәм Миңнеханов ТР МДН башлыгы Камил Сәмигуллинны мәчетне торгызуга акча кертә алырлык иганәчеләрне актив эзләргә өндәде. 

Соңыннан сәфәрдә катнашучылар ТР Урман хуҗалыгы министрлыгы торгызган Париж Коммунасы, 18 адресы буенча сәүдәгәр Бигаев йортының агач бинасын карадылар. Янәшәдә генә ярымҗимерек мәдәни мирас объекты - “Здание типографии и словолитни Каримовых, 1861” урнашкан. Бу бинаны алган инвестор бүген ТР Президентын ышандырганча, эшләрне катлаулы булуына карамастан, йорт торгызылачак. 

Татарстан һәм Мәскәү урамнары чатында Рөстәм Миңнехановка административ-эш бинасы төзелеше проекты тәкъдим ителде, бу бина Татарстан урамы, 16 адресы буенча урнашкан бинага кушылып китәргә тиеш. ТР Президенты проектны хуплады. 

Татарстан, 14 адресы буенча “Болгар” номерлары урынында төзелән яңа бинада ТР Президенты бинаның хуҗасы – “Татнефть” ААҖнә ТР Мәдәният министрлыгы белән бергә бөек татар шагыйренең мемориаль бүлмәсен җиһазландырырга кушты. 

Эш сәфәре соңында Рөстәм Миңнеханов 5-нче номерлы шәһәр клиник хастаханәсендә булды. 1937-нче елда төзелгән бинада сугыш елларында эвакуацион госпиталь булган. ТР сәламәтлек саклау министры Гадел Вафин Татарстан Президентына дәвалау учреждениесен реконструкцияләү хакындагы планнар турында сөйләде, - дип хәбәр итә ТР Президентының матбугат хезмәте.

Фоторепортаж