И.Метшин яңа поликлиника турында: «Сәламәтлек саклау сарае» масштаблары һәм җиһазлары белән таң калдыра»

Казанның «Весна» микрорайонында яңа поликлиниканы ачарга әзерләнәләр. Бина илкүләм «Сәламәтлек саклау» проекты кысаларында төзелгән һәм заманча медицина җиһазлары белән тулысынча тәэмин ителгән. Поликлиникада «Весна», Самосырово, Константиновка бистәләрендә яшәүчеләргә беренчел медицина-санитария ярдәме күрсәтеләчәк. Медицина учреждениесе, тулаем алганда, 36 мең кешегә, сменасына исә 400 кешегә хезмәт күрсәтәчәк. Поликлиника беренче пациентларны ел ахырына кадәр кабул итәр дип көтелә. Бүген Татарстан Республикасы сәламәтлек саклау министры Альмир Абашев һәм шәһәр мэры Илсур Метшин яңа сәламәтлек саклау объектының ачылуга әзерлеген бәяләделәр.

«Зур һәм актив үсештә булган әлеге микрорайон халкы бу поликлиниканы бик күптәннән көтте инде. Бүген биредә, күрше бистәләр белән бергә, 37 меңгә якын кеше яши, ә 2030 елга халык саны 60 меңгә кадәр артачак. Яңа «сәламәтлек саклау сарае» масштаблары һәм җиһазлары белән таң калдыра. Болар барысы да илкүләм «Сәламәтлек саклау» проекты кысаларында булдырылган. Биредә яшәүче халык, башка районнарга бармый гына, яшәү урыны буенча квалификацияле медицина ярдәме ала алачак», – дип билгеләп үтте шәһәр башлыгы Илсур Метшин.

Учреждение штаты 368 хезмәткәргә каралган. Алар арасында 120 табиб, 187 урта медицина хезмәткәре, 14 кече звено хезмәткәре һәм 30 административ-хуҗалык хезмәте эшчеләре санала. Бу нәкъ менә әлеге урында консультация, диагностика һәм тернәкләндерү ярдәменең киң спектрын тәэмин итәргә мөмкинлек бирәчәк. Яңа медицина учреждениесе 20 нче шәһәр поликлиникасының җиденче филиалы булып тора. Анда 17 бүлек һәм 130 медицина кабинеты, 18 административ бина һәм архив булачак.

«Микрорайонның үсеш темпларын исәпкә алып, 2030 елга без сменага килүчеләр санын арттырырга, өстәмә кабинетлар ачарга ниятлибез. Киләчәкне күз аллап эшлибез», - дип планнары белән уртаклашты Татарстан Республикасы сәламәтлек саклау министры Альмир Абашев.

7,1 мең квадрат метр мәйданлы яңа биш катлы бина төрле категориядәге пациентлар өчен уңайлы мохит булдыруны күздә тотып, заманча таләпләрне исәпкә алып проектланган. Килүчеләр өчен берничә керү урыны каралган: алар төп керү юлыннан, авыру билгеләре булганнар өчен аерым фильтр-керү юлыннан файдалана ала. Шулай ук аз хәрәкәтле гражданнар өчен травмпунктка илтә торган махсус керү урыны каралган.

Беренче катта электрон табло куелган иркен регистратура урнашкан, таблода белгечләрнең пациентларны кабул итү расписаниесе күрсәтелеп тора. Сул якта травматолог, яраларны бәйләү, процедура һәм башка кабинетларны күрергә була. Бинада стационар һәм мобиль төрдәге флюорография, утратавыш диагностикасы бүлекләре, маммография кабинеты бар.

Заманча диагностика җайланмалары булуы яңа поликлиниканың төп өстенлекләренең берсе санала. Әлеге медицина учреждениесенә компьютер томографы, магнитлы резонанс томографы (МРТ аппараты) һәм денситометр – остеопорозны иртә стадияләрдә ачыкларга мөмкинлек бирә торган җайланма кайтартылган.

Икенче катта көндезге стационары булган хатын-кызлар консультациясе урнашкан. Биредә гомуми күзәтү бүлмәсе берләштерелгән ике табиб-гинеколог кабинеты, шулай ук 60 яшьтән өлкәнрәк пациентларны кабул итү өчен табиб-гериатр кабинеты эшләячәк. Аборт ясату консультацияләре өчен аерым кабинет бүлеп бирелгән.

Өченче кат физиотерапия һәм тернәкләндерү хезмәтләре өчен каралган. Пациентлар, атлап йөрү тренажерлары урнашкан кабинетта, тернәкләндерү курсын уза алачак – монда баскычтан менеп-төшеп йөрүне хәтерләтә торган җиһазларны күрергә була. Кардиотренажерлар залында пациентның адым озынлыгына көйләнә торган датчиклар белән җиһазландырылган махсус йөгерү юллары урнаштырылган. Бүлектә галокамера, шулай ук аэроионотерапия һәм ароматерапия кабинетлары эшләячәк. Дүртенче катта хирургия бүлеге һәм стоматология урнашкан. Бу Казанда наркоздан соң уяну палатасы булган бер көнлек махсус хирургия бүлеге белән башкалардан аерылып торучы беренче поликлиника. Наркоз кулланып ясалганнан процедуралардан соң, пациентлар табиб күзәтүе астында тыныч шартларда тернәкләнә алачак. Стоматология бүлегендә тешләрне дәвалау өчен ике кресло урнаштырылган, шулай ук денталь рентген кайтартылган – гадәттә, мондый җиһазларны махсус хастаханәләрдә урнаштыралар. Монда аны катлаулы очраклар белән эшләү максатыннан куйганнар. Бишенче катта амбулатор-онкология ярдәме үзәге эшләячәк. Биредә 100 урынлык конференция залы урнашкан, анда табиблар өчен медицина чаралары, семинарлар һәм укыту сессияләре узачак. Поликлиниканың баш табибы Елена Әхмәтҗанова ассызыклаганча, яңа филиалда аерым бер юнәлеш буенча эшли торган белгечләрнең барысы да булганга, халыкка шәһәрнең башка районнарына консультация сорап мөрәҗәгать итәргә туры килмәячәк. Исегезгә төшерәбез, Казанда бу елны өч яңа сәламәтлек саклау объекты барлыкка килде. Идел буе районындагы «Идел киңлекләре» торак комплексында балалар поликлиникасы ачылды, ә Вишневка бистәсендә табиблык амбулаториясе төзелеше тәмамланды.