Илсур Метшин юлларны төзекләндерү турында: «Максатчан күрсәткечкә кадәр бик аз калды»

(Казан шәһәре KZN.RU, 7 нче август, Диана Жиленкова). Казанда «Имин сыйфатлы юллар» илкүләм проекты буенча дүрт урамны ремонтлау тәмамланды: Коләхмәтов, Хәсән Туфан, Городская һәм Адоратский. Эшләр тагын сигезендә дәвам итә: Ленинград, Пржевальский, Вересаев, Ударная, Камчатка, Айдаров, Аркылы Отар һәм Самосыр торак массивындагы Мир. Башкарылган эшләр 77% тәшкил итә, дип хәбәр итте эшлекле дүшәмбедә Башкарма комитет җитәкчесе урынбасары Игорь Куляжев.

«2018 ел белән чагыштырганда юлларны ремонтлау һәм төзү чыгымнары дүрт тапкырдан артык артты, – дип ассызыклады ТР башкаласы Мэры Илсур Метшин. - Мин инде 2005, 2010 еллар белән чагыштырып та тормыйм, шушы ук залда без сезнең белән капиталь ремонт һәм төзелеш өчен биш-алты миллиард акча алу турында хыялландык».

Шәһәр башлыгы Татарстан Рәисе Рөстәм Миңнехановка рәхмәт белдерде, ул юлларны төзекләндерү һәм төзү мәсьәләләренә җентекләп төшенеп кенә калмый, объектларга да чыга. Ул программаларны үтәү өчен кирәкле ресурслар булсын өчен федераль үзәк белән дә зур эш алып бара.

«Бу федераль үзәк максат итеп куйган норматив хәлдәге юлларның 85% ына максималь якынлашырга мөмкинлек бирә. Ягъни максатчан күрсәткечкә кадәр бик аз калды», - диде шәһәр башлыгы.

Мэр игътибар зур транспорт трафигы булган юлларга гына бирелми, дип ассызыклады. Мисал итеп, ул Красный Пожарник урамын китерде, анда төзекләндерүдән тыш, беренче тапкыр җәяүлеләр юлын оештырганнар.

«Минем уйлавымча, бу урамны туган якны өйрәнүчеләрдән кала бик аз кеше белә. Ул «Электрон» стадионы районында урнашкан, аның янында 13 нче мәктәп һәм радиомеханика көллияте бар. Шәһәр үзәге диярлек, әмма тротуарны кешеләр совет чорыннан бирле күрмәгән, менә без, ниһаять, бурычыбызны үтәдек», - диде Илсур Метшин.

Гаяз Исхакый, Таҗи Гыйззәт, Кави Нәҗми һәм башка урамнар ремонтланган

Игорь Куляжев сөйләвенчә, быел юл эшләренә 27 млрд сумга якын акча бүлеп бирелгән. Шуларның 16,7 млрд сумы төзелеш һәм реконструкцияләү өчен билгеләнгән, 6,5 млрд сумы – урам-юл челтәрен ремонтлау өчен, 1 млрд сумы – «Имин сыйфатлы юллар» илкүләм проекты буенча юлларны яңарту өчен.

2023 елга барлыгы 47 юл участогын ремонтлау планлаштырылган, ишегалды территорияләрен исәпкә алып, гомуми мәйдан 1,5 млн кв.м арта.

«Имин сыйфатлы юллар» илкүләм проекты буенча 10 км озынлыктагы 12 юл участогын яңарталар. Эшләр комплексына асфальт-бетон өслекне, машина юлларын, тротуарларны ремонтлау, куркынычсызлык коймаларын, юл билгеләрен урнаштыру һәм бөтен кирәкле юл инфраструктурасын төзекләндерү керә.

Урам-юл челтәрен ремонтлау программасы буенча 630 мең кв.м мәйданда 35 участок һәм юллар яңартылачак. Бүгенге көндә эшләр 23 участокта тәмамланган, шул исәптән Гаяз Исхакый, Таҗи Гыйззәт, Кави Нәҗми, астрономия һәм Университет урамнарында. Тагын 12 участокта эшләр алып барыла, аларда үтәлеш 70% тәшкил итә.

Яңа юл өслеге шулай ук «Хыял» «Ивушка», «Автомобилист», «Җиңүгә 50 ел», «Волга» һәм «Кварт» ЯАҖ бакчачылык ширкәтләрендә барлыкка киләчәк. Эшләрнең суммасы 49 млн сум дип бәяләнә.

«Биш ел эчендә 26 бакчачылык ширкәтенә 20 км озынлыктагы 16 керү юлы төзелде», - дип уртаклашты ТР башкаласы Башкарма комитеты җитәкчесе урынбасары.

Тагын 140 млн сум 75 авария хәлендәге һәм потенциаль куркыныч участокларны бетерү өчен каралган. Бу акчаларга юл билгеләре, куркынычсызлык коймалары, яктырту челтәрләре, ясалма юл тигезсезлекләре һ.б. урнаштырылачак.

Эшләр тулы күләмдә 64 участокта башкарылды. Аерым алганда, бу юл-транспорт һәлакәтләре күп була торган 31 урын», - дип ассызыклады Игорь Куляжев.

33 светофор объектында «Триоль» системасы урнаштырылачак

Күрү сәләте чикләнгән кешеләрнең хәрәкәтен куркынычсыз итү өчен 33 светофор объектында светофорның яшел сигналына күчкәндә тавыш ярдәмендә хәбәр итә торган «Триоль» системасы урнаштырылачак. Сүз Декабристлар һәм Чистай, Бондаренко һәм Ямашев, Гагарин һәм Короленко, Волгоград һәм Ибраһимов урамнарындагы участоклар турында бара.

Поселокларда тышкы яктыртуны торгызу программасы буенча 41 торак массивта 1,4 мең светодиодлы энергия саклаучы яктырткычлар ремонтлана, аларның суммасы 40 млн сумнан артык. Бүгенге көндә эшләр 30% ка башкарылган. Яңа яктырту Борисково, Отар, Иске Победилово һәм башка торак массивларында инде барлыкка килгән.

Быел 50 дән артык шәһәр урамнарында яңа яктырткычлар урнаштырылачак, шул исәптән Икмәк заводы, Революция, Толстой, Яхин, Седов, Волков һ.б. урамнарда. Барлыгы 600дән артык багана һәм энергия саклаучы лампаларны монтажлыйлар. Хәзер эшләр 10 урамда бара, үтәлеш 20% тәшкил итә.

Моннан тыш, 363 мең кв.м мәйданда юл тамгалары төшерелгән – планлаштырылган күләмнең 96% ы.

Мэр ассызыклаганча, ел саен Казанда юл эшләре масштабы арта, ремонт һәм төзелешне алдагы елларга планлаштыралар.

Мондый масштаблар, һичшиксез, финанслаусыз мөмкин түгел, әмма әзерлек эше дә мөһим, аны Тышкы төзекләндерү комитеты район администрацияләре башлыклары белән бергә бу эшләр башланганчы ук алып бара. Бу җирләрне шәхси милектән сатып алу һәм сүтү, документларны вакытында әзерләү – күп көч сорый торган эш. Бездә юлларны ремонтлау буенча планлаштыру горизонты берничә ел алга эшләнгән. Эшләрнең чиратлыгы уйланылган һәм нигезләнгән», - дип нәтиҗә ясады Мэр.