Илсур Метшин халыкара юридик форумда медальләр һәм Д.Мейер исемендәге премия тапшырды

(Казан шәһәре KZN.RU, 29 нчы сентябрь, Диана Жиленкова). Бүген «Хокукка хокук» беренче Казан халыкара юридик форумының пленар утырышында кризиска каршы хокук потенциалы, юридик кадрлар әзерләү проблемалары һәм гражданлык суд эшчәнлеген цифрлаштыру турында фикер алыштылар. Алты илдән һәм 30 дан артык шәһәрдән 400 ләп катнашучыны берләштергән белгечләр слеты Казан федераль университетының императорлар залында ачылды.

«Хокукка хокук» форумының темасы хәзерге заман белән бик тә ярашлы, – дип чыгыш ясады югары уку йортының ректоры Ленар Сафин. – Бүген эчке һәм халыкара хокук тәртибе нигезләнәчәк таяну нокталарын эзләү мөһим. Һәм без хокук белгечләрен, хакимият органнарын, эксперт позицияләрен сайлау өчен юридик бергәлекне берләштереп, университетыбыз мәйданчыгында актуаль мәсьәләләр турында фикер алышырга теләр идек. Казан университетында юридик форумны уздыру күркәм традициягә әверелер дип ышанам».

Татарстан Президенты Рөстәм Миңнеханов исеменнән форумда катнашучыларны ТР Дәүләт Советы Рәисе Фәрит Мөхәммәтшин сәламләде. Аның сүзләренчә, форумның проблемасы элеккечә актуаль. Хокук – җәмгыятьнең һәм дәүләтнең таянычы, һәм Татарстан һәрвакыт мондый позицияне бүлеште, дип билгеләп үтте Ф.Мөхәммәтшин. «Безнең гүзәл башкалабыз турында сөйләгәндә, Казан университетында ике йөз елдан артык элек формалашкан юридик мәктәп аркасында Казан илебезнең хокук белеме тарихында хаклы рәвештә күренекле урын алып тора», - дип ассызыклады ТР Дәүләт Советы Рәисе.

«Казан университетының илебезнең юридик фәнен һәм мәгарифен үстерүдәге роле бәяләп бетергесез, – дип раслады Казан Мэры, попечительләр советы рәисе һәм югары уку йортының юридик факультетын тәмамлаган Илсур Метшин. – Университет оешканнан бирле әхлакый-сәяси бүлек булдырылды, анда Россия империясенең күп өлеше өчен, Иделдән Ерак Көнчыгышка кадәр, юристлар әзерләделәр».

И.Метшин искә төшергәнчә, юридик факультет студентлары арасында Дмитрий Мейер, Габриэль Шершеневич, Сергей Аксаков, Лев Толстой һәм Владимир Ленин кебек танылган фән, мәдәният һәм сәясәт эшлеклеләре булган. «70 ел элек Казан дәүләт университетында булган юридик факультетның хәзерге тарихы да данлы һәм әһәмиятле. Юридик факультетны тәмамлаучы буларак, факультетта күп кенә күренекле галимнәр һәм үз эшенең иң яхшы белгечләре эшләвен һәм юридик фәнни мәктәпләр үсешенә саллы өлеш кертүләрен дәвам итүләрен ышаныч һәм горурлык белән әйтә алам», - диде Мэр.

Аның сүзләренчә, Казан халыкара юридик форумы идеяләр белән алмашырга, хокукый проблемаларны чишү юлларын эзләргә, фәнни тикшеренүләргә яңа импульс бирергә һәм алынган тәкъдимнәрне гамәлдә кулланырга мөмкинлек бирә.

«Татарстан Республикасы башкаласы – икътисадый планда зур потенциалга ия динамик үсеш кичерүче шәһәр, без хокукый проблеманың практик юнәлешле дискуссия предметы булуын һәм яңа элемтәләр урнаштыруга, һөнәри үсешкә этәргеч бирүен телибез», – диде Мэр, катнашучыларга нәтиҗәле эш теләп.

Чыгышының азагында И.Метшин Россия фәннәр академиясе президенты урынбасары, РФ Хөкүмәте каршындагы Закон чыгару һәм чагыштырма хокук белеме институты директоры Талия Хәбриевага һәм Урал дәүләт юридик университетының гражданлык процессы кафедрасы мөдире Владимир Ярковка медальләр һәм Дмитрий Мейер исемендәге премия тапшырды.

«Мин 14 ел дәвамында юридик факультетта укытучы бурычымны намус белән үтәдем һәм Казан университеты, Казан юридик мәктәбе галимнәренә ярдәм күрсәтүне дәвам итәм, – дип уртаклашты Талия Хәбриева. - Киләчәктә дә илебез фәне, мәгариф һәм Казан университеты өчен бөтен көчемне куячакмын дип ышандыра алам».

«Бу бүләк өчен бик рәхмәтле. Дмитрий Иванович эшләренә таянып, фән һәм доктринаны, гражданлык хокукын һәм процессны үстерү өчен бөтен көчемне куячакмын», – дип билгеләп үтте В.Ярков.

Форум ачылышында шулай ук Татарстан буенча баш федераль инспектор Виктор Демидов һәм Идел буе федераль округының Арбитраж суды рәисе Денис Плотников катнашты. Онлайн-форматта спикерларга Россия юристлары ассоциациясе рәисе Сергей Степашин кушылды.

Беренче Казан халыкара юридик форумы иртәгә, 30 нчы сентябрьдә, Иннополиста тәмамланачак. Эшлекле программада экспертларның чыгышлары, мәгариф һәм карьера, фән, инновацияләр һәм бизнес мәсьәләләре буенча ачык панель дискуссияләр каралган. Секцияләрнең модераторлары булып КФУ вәкилләре чыгыш ясаячак. Юридик факультет деканы Лилия Бакулина «Россиядә юридик белем бирүнең киләчәге» секциясен җитәкләячәк.