И.Метшин: «Казан иң криминоген шәһәрләрнең берсе статусыннан арынды»

(Казан шәһәре KZN.RU, 5-нче февраль, Алена Мирошниченко). 2020 ел нәтиҗәләре буенча, шәһәрдә җинаятьләрнең гомуми ачылышы 37%ка арткан. Полициягә өстәмә йөкләнгән коронавирус таралуын кисәтү буенча функцияләргә карамастан, хезмәт җәмәгать куркынычсызлыгын, гражданнарның һәм аларның мөлкәтенең шәхси сакланышын тәэмин итү буенча үзенең төп бурычын үтәде. Оператив хәл өстеннән контроль сакланып калды, дип хәбәр итте бүген Россия Эчке эшләр министрлыгының Казан буенча идарәсе башлыгы Александр Мищихин Казан шәһәре Думасының IV сессиясендә.

Шәһәр Мэры Илсур Метшин ассызыклаганча, Россия Эчке эшләр министрлыгының Казан буенча идарәсе, гадәттәгечә, яхшы эш нәтиҗәләрен күрсәтте. «Казан иң криминоген шәһәрләрнең берсе статусыннан котыла алды», – дип билгеләп үтте ул. Мэр Казан урамнарында җинаятьләрнең кимүен ассызыклады. Бу «Имин шәһәр» һәм «Имин ишегалды» проектларының казанышы. Җәмәгать урыннарында урнаштырылган камералар хокук бозуларны тизрәк ачарга мөмкинлек биреп кенә калмый, җинаятьчеләрне дә туктата, диде шәһәр башлыгы.

«Казан полиция гарнизонының бөтен шәхси составына башкарган эшләре өчен рәхмәт белдерәм. Узган елның пандемиягә бәйле чикләүләр белән тулы булуына карамастан, сезнең һәм Эчке эшләр идарәсе хезмәткәрләренең эшләре кимемәде. Конституция буенча тавыш бирү, сайлау алды кампаниясе, ТР Президентын, Казан шәһәр Думасы депутатларын сайлау, спорт һәм мәдәни чараларда тиешле дәрәҗәдә куркынычсызлыкны тәэмин итү белән узды», – диде Илсур Метшин.

Полиция 3,5 меңнән артык чара барышында тәртип тәэмин итте

Александр Мищихин хәбәр иткәнчә, узган ел полиция хезмәткәрләре тарафыннан җәмәгать тәртибе 3,5 меңнән артык чара уздырганда тәэмин ителгән. «Аларны үткәрү чорында кылынган җинаятьләрнең торышы һәм үсеше, экстремизм күренешләре катлауландырылмады», – дип хәбәр итте ул.

Гомумән алганда, талау һәм урлаулар саны, авто- һәм мототранспорт урлаулары, фатир, бакча-дача җәмгыятьләрен һәм ширкәтләрен басу, автомашина һәм кесә урлаулары саны кимегән. «Шулай ук җәмәгать урыннарында һәм шәһәр урамнарында кылына торган җинаятьләр санының гомуми кимүен билгеләп үтәргә кирәк. Тикшерүләр тәмамланган һәм 8,5 мең җинаять буенча җинаять эшләре судка җибәрелгән һәм бу нәтиҗәләр 2019 ел нәтиҗәләрен узып китә. Гомуми ачылу 37% ка кадәр диярлек артты, авыр һәм аеруча авыр җинаятьләр буенча шундый ук вәзгыять», – дип ассызыклады А.Мищихин.

«Имин шәһәр» һәм «Имин ишегалды» программалары кысаларында шәһәрдә 12 меңнән артык видеокүзәтү камерасы эшли. Шуның аркасында узган елда 1,5 меңнән артык хокук бозу ачыкланды һәм ачылды.

Сәламәтлеккә авыр зыян китерү фактлары кимеде. Гомумән алганда, шәхескә каршы җинаятьләрнең ачылуы 80%ка кадәр артты, ә авыр һәм аеруча авыр җинаятьләрнең ачылуы 100%ка якын, дип билгеләп үтте А.Мищихин.

Барлык милек җинаятьләренең 40%тан артыгы телефон яки интернет аша эшләнгән

Шәһәрдә мәгълүмати-телекоммуникация технологияләрен кулланып, милеккә каршы җинаятьләр саны артты. Барлык милек җинаятьләренең 40%тан артыгы кәрәзле элемтә һәм интернет чараларын кулланып эшләнгән. Аларның саны туктаусыз арта, гражданнарны алдау схемалары даими үсә, дип игътибар итте А.Мищихин.

Әмма узган ел полиция хезмәткәрләре дистанцион ысул белән кылынган 524 урлау һәм караклык фактын ача алган. Бу күрсәткеч 2019 ел нәтиҗәләреннән ике тапкырга диярлек югарырак. Мондый җинаятьләр ТР Эчке эшләр министрлыгының махсус бүлекчәсе, банклар, кәрәзле компанияләр һәм интернет-провайдерларның җайга салынган эше нәтиҗәсендә ачыла.

Илсур Метшин билгеләп үткәнчә, чынбарлык яңа чакырулар тудыра, шул исәптән киберкараклык белән бәйле чакырулар. «Бүген мондый җинаятьләр үсеше бара, мин тагын бер кат шәһәр халкына мөрәҗәгать итәргә теләр идем. Зинһар, игътибарлы булыгыз, шикле шалтыратуларга, смсларга игътибар итмәгез. Шәһәр структуралары, полиция, банклар уртак эш алып бара, әмма сезнең куркынычсызлыгыгыз һәм акчаларыгызның сакланышы күп очракта сезнең игътибарыгызга, уяулыкка һәм үзегезгә генә бәйле», – дип мөрәҗәгать итте Мэр шәһәр халкына.

10 мең литрга якын фальсификацияләнгән алкоголь законсыз әйләнештән алынды

Казанда Дәүләт алкоголь инспекциясе һәм ТР Кулланучылар хокукларын яклау һәм кеше иминлеге өлкәсендә күзәтчелеге белән берлектә законсыз әйләнештән 10 мең литр чамасы ялган спиртлы эчемлек һәм алкоголь продукциясе алынган, 190 административ закон бозу очрагы ачыкланган, 7 җинаять эше кузгатылган. Моннан тыш, законсыз уен эшчәнлегенең 13 факты ачыкланган – 660 берәмлек җиһаз тартып алынган.

Наркотикларның законсыз әйләнеше белән көрәш Казан полициясенең өстенлекле бурычлары исемлегендә кала бирә. «2020 елда ачыкланган һәм ачылган наркоҗинаятьләр саны артты. Әлеге категория җинаятьләр өчен җинаять җаваплылыгына тартылган затлар саны артты. Шулай ук 2020 елда административ җаваплылыкка тартылучылар саны артты. Законсыз әйләнештән 48 килограммнан артык наркотик алынды», – дип хәбәр итте спикер.

Шулай ук 2020 елда экстремистик һәм террорчылык юнәлешендәге 13 җинаять ачыкланган, гомумән алганда, соңгы ике елда мондый җинаятьләр саны сизелерлек кимегән.

Үсмерләр тарафыннан кылынган җинаятьләр саны кимеде

«Узган елда Татарстан башкаласында 117 меңнән артык чит ил кешесе булып китте. Аларның саны, объектив сәбәпләр буенча, ике тапкырга кимегән. Бүгенге көндә Казан территориясендә 46,5 мең чит ил гражданы исәпләнә. Президент указы нигезендә, чит ил гражданнарына һәм гражданлыгы булмаган затларга карата бүгенге көнгә административ мәҗбүр итүнең аерым төрләре кулланылмый. Криминаль хәлгә бу кардиналь йогынты ясамаган – чит ил җинаятьчелеге дәрәҗәсе 3%тан артмаган.

Полиция хезмәткәрләре бер ел эчендә төркемнәр составында кылынган 598 җинаятьне ачкан, шул исәптән 90 җинаять оешкан төркемнәр һәм җинаятьчел бергәлекләр составында башкарылган. Җинаять җаваплылыгына төрле төркемнәрнең 138 катнашучысы җәлеп ителгән.

Полициянең аерым игътибары астында – балигъ булмаганнар арасында хокук бозуларны профилактикалау һәм авыр тормыш хәлендә калган балаларга ярдәм итү. Шулай итеп, яшүсмерләр кылган җинаятьләр саны кимеде, шул исәптән аларның авыр өлеше дә. Җинаять җаваплылыгына тартылган балигъ булмаган җинаятьчеләрнең саны шулай ук кимеде, дип хәбәр итте Россия Эчке эшләр министрлыгының Казан буенча идарәсе башлыгы.

Балигъ булмаганнар арасында деструктив төркемнәр белән көрәш дәвам итә, шул исәптән «Арестант җинаятьчел бердәмлеге» хәрәкәте (Россиядә тыелган экстремистик оешма - ред.шәр.).

«Тәҗрибә күрсәткәнчә, барысы да, бигрәк тә яшьләр, аерым провокацион төркемнәр йогынтысына эләгергә мөмкин, хәтта «Арестант җинаятьчел бердәмлеге» хәрәкәтеннән экстремистик берләшмәләргә кадәр. Безнең уртак максатыбыз – үсеп килүче буын белән профилактик аңлату эшләре алып бару – мәктәп эскәмиясеннән алып яшүсмерләр һәм спорт клубларына кадәр. Без аларга аларның фикерләрен бик мөһим дип җиткерергә тиеш, ләкин алар да законны бозган өчен һәм үзләренең киләчәге өчен җаваплы», – дип ассызыклады И.Метшин һәм бу эшне ата-аналар, шәһәр эчке эшләр идарәсе, мәктәпләр, Башкарма комитетның барлык бүлекчәләре, депутат корпусы бергәләп алып барырга тиеш, дип өстәде. «Без бергә нәтиҗәле карар табарбыз дип уйлыйм», - дип өмет белдерде Мэр.

Казанда юл-транспорт һәлакәтләре, яраланучылар һәм һәлак булучылар саны кимеде

Шәһәр юлларында аварияләр һәм җәрәһәт алу күрсәткечләре 8,4%ка, юл-транспорт һәлакәтләре, яраланучылар һәм һәлак булучылар саны кимегән. 2020 ел нәтиҗәләре буенча, Җәмәгать тәртип саклау пунктлары башлыклары 11 меңнән артык административ хокук бозуны ачыклаган. Ә муниципаль хезмәткәрләр 700 җинаять ачуда һәм 20 мең административ хокук бозуны ачыклауда ярдәм иткән, аларның өчтән бере – юл йөрү кагыйдәләрен бозу, диде докладчы.

Чыгышының азагында А.Мищихин бу елга куелган максатлар турында сөйләде. «Агымдагы елда идарә эшчәнлегенең төп юнәлешләре булып хокук тәртибен тәэмин итү һәм шәһәр урамнарында иминлек, шул исәптән чаралар уздыру, җинаятьчелеккә каршы тору һәм хокук бозуларны профилактикалау кала, – дип йомгаклады ул. – Мәгълүмати технологияләрдән файдаланып кылына торган экстремизм формалары, криминаль янауларны нейтральләштерү, бюджет чараларын яклау, коррупциягә каршы көрәш кебек җинаятьләргә каршы торуга аеруча зур игътибар биреләчәк».

Спикер шулай ук депутатларның Казан шәһәре Эчке эшләр идарәсе бүлекчәләрен хезмәткәрләр тарафыннан комплектацияләү, балаларның сәламәтлегенә зыян китерүне кисәтү чаралары, пандемия чорында эшләү һәм балигъ булмаганнар эшләре буенча комиссияләрдә җәмәгать тәрбиячеләрен популярлаштыруга кагылышлы сорауларына җавап бирде.