И.Метшин: «Үсеп килә торган туристлар агымы – уртак тырышлык һәм җентекле системалы эш нәтиҗәсе»

(Казан шәһәре KZN.RU, 30-нчы сентябрь, Ксения Швецова). Гыйнвар - август айларында Казанга 2,8 млн турист килгән, бу узган ел белән чагыштырганда 8%-ка күбрәк. Татарстан башкаласы, гадәттәгечә, ял итү өчен иң популяр Россия шәһәрләре исемлегенә керә һәм чит ил туристларында популярлаша бара – ел башыннан алып шәһәргә 169 илдән 142 меңнән артык чит ил гражданы килгән. Мондый нәтиҗәләргә шәһәрнең җәлеп итүчәнлеген арттыра торган төзекләндерү буенча республика программалары ярдәмендә ирешелде, дип билгеләп үтте бүгенге эшлекле дүшәмбе вакытында Казан Мэры Илсур Метшин.

Узган ел белән чагыштырганда Казан Кремлендә туристлар 10%-ка күбрәк булды

Язгы-җәйге туристлык сезоны нәтиҗәләре турында Туризмны үстерү комитеты директоры Дарья Санникова сөйләде. Аның сүзләренә караганда, кунакханәләрнең 8 ай эчендә уртача йөкләнеше 2-3 йолдыз категориясендә 56% һәм 4-5 йолдыз категориясендә 67% тәшкил иткән. Май һәм август айларында иң кызу айлар булды - бу айларда кунакханәләрне эш белән тәэмин итү коэффициенты уртача 12%-ка үсте һәм 70%-тан артты.

Казан халыкара аэропорты гыйнвардан август аена кадәр 2,5 млн. пассажирга хезмәт күрсәткән, бу узган елның шул ук чоры белән чагыштырганда 8%-ка күбрәк. «Ел башыннан Әстерхан һәм Калугага яңа авиарейслар кертелде, ә октябрь аенда Казанны Якутиягә, Доминикана Республикасына, Будапештка һәм Харбинга яңа рейслар ачылачагы көтә», - диде Д.Санникова.

8 ай эчендә Казанга 169 илдән 142 мең 187 чит ил гражданы килгән. Чит ил туристларыннан иң күбе Кытай, Казахстан, Төркия, Германия һәм Франциядән килгән.

Казан даими рәвештә бәйрәм һәм ял көннәрендә ял итү өчен Россиянең популяр булган шәһәрләренең топ-3 һәм топ-5 исемлегенә керде (аналитик ТурСтат агентлыгы һәм Tvil.ru торакны броньлау буенча Россия сервисы мәгълүматлары буенча). Шулай ук Татарстан башкаласы яңа 2020 елга ял итү өчен Россиянең иң популяр шәһәрләре һәм курортлары бишлегенә эләкте, дип искәртте Д.Санникова.

«Казан Кремле» музей-тыюлыгында гыйнвар - август айларында 2 млн 373 мең турист һәм экскурсант булган - бу узган ел белән чагыштырганда 10%-ка күбрәк. Кремль яр буенда 1 млн. 20 мең кеше булган, ә «Ривьера» аквапаркы булган күңел ачу комплексында 617 мең 953 кеше булган.

«Туристлар агымы безне сөендерүен дәвам итә, кешеләрнең шәһәр белән кызыксынуы саклана, - дип шәрехләде Казан Мэры Илсур Метшин. - Бу бердәм тырышлык һәм җентекле системалы эш нәтиҗәсе».

Казанда, республиканың башка шәһәрләрендәге кебек үк, күп еллар дәвамында төзекләндерү буенча масштаблы эш алып барыла: юлларны, ишегалды территорияләрен, социаль учреждениеләрне ремонтлау, паркларны, скверларны, яр буйларын яңарту. Бу туристларны җәлеп итүгә зур йогынты ясый, дип өстәде Мэр. «Боларны шәхсән үзе контрольдә тотучы Татарстан Президенты Рөстәм Миңнехановка рәхмәт. Президент җитәкчелегендә мондый системалы эш нәтиҗә бирә», - диде шәһәр башлыгы.

«Без, шәһәрләрнең иң яхшы тәҗрибәләрен өйрәнеп, эш итәргә тиеш»

Дарья Санникова билгеләп үткәнчә, шәһәрнең туристлык брендын үстерү өчен ТР Туризм буенча дәүләт комитеты белән берлектә оештырыла торган вакыйгалар уздыру мөһим һәм өстенлекле юнәлеш булып тора. Алар арасында - Пасха ярминкәсе, Төнге велофест, «Казан фанфаралары» тынлы оркестрлар фестивале һәм «Тәмле Казан» гастрофестивале.

22-27-нче августта Казанда узган WorldSkills стандартлары буенча һөнәри осталык буенча дөнья чемпионаты бу елның иң зур вакыйгасы булды.

«Чираттагы мәртәбә Татарстан башкаласы дөньякүләм вакыйгалар үткәрүнең югары стандартларын бирде, чемпионатта 280 меңгә якын җанатар булды», - диде Д.Санникова.

Туристларны җәлеп итү буенча эштә туриндустриядә эшләүче белгечләр генә түгел, ә шәһәрнең барлык халкы да зур роль уйный, дип билгеләде И.Метшин. «Татарстан Республикасының Туризм буенча дәүләт комитеты, рестораторлар һәм отельерлар ассоциациясе, белгечләр әзерли торган безнең югары уку йортларыбыз кергән барлык структураларның эше зур әһәмияткә ия. Һәм, әлбәттә, битараф булмаган шәһәр халкы, блогерлар, Казан турында язучылар, социаль челтәрләрдән актив файдаланучылар - барысы да үз өлешләрен кертәләр, - диде И.Метшин. - Шул ук рухта дәвам итәргә кирәк, креатив, төгәл эш кирәк. Без туристларны җәлеп итүдә зур үсеш күрсәткән шәһәрләрнең иң яхшы тәҗрибәләрен өйрәнеп эшләргә тиеш. Без яңа идеяләр көтәбез».