И.Метшин: «Без финалга чыгучыларның барысын да Казан командасында күрергә шат булачакбыз»

Казанның Балалар һәм яшьләр эшләре комитетын башкаланың Киров һәм Мәскәү районнары администрациясенең перспективалы проектлар һәм максатчан программалар бүлегенең баш белгече Дмитрий Хвостиков җитәкләячәк. Ул әлеге вазифага ачык конкурс нәтиҗәләре буенча Россиянең төрле төбәкләреннән теләк белдергән 275 дәгъвачы арасыннан сайланган. Финал бүген Казан Ратушасында узды. Казанның яшьләр сәясәтен үстерү буенча үз проектларын җиде финалист тәкъдим итте: аларның икесе Мәскәү һәм Санкт-Петербургтан, калган бишесе – Казаннан. Аларның чыгышларын эксперт жюри бәяләде. Комиссияне Казан мэры Илсур Метшин җитәкләде.

«Без яхшы нәтиҗәләр күрәбез: Казан мэриясе командасы иҗади көчләрне бөтен ил буенча уңышлы җәлеп итә ала. Бәйгегә 275 гариза юлланган – бу безнең системалы эшебезнең җитди дәлиле. Кадрлар безнең өчен һәрвакыт ныклы нигез булды һәм ул шулай булып калачак та. Без һәрдаим кешеләр белән һәм кешеләр өчен эшлибез. Бернинди ясалма фәһем дә безнең администрацияләрдә кешеләр белән алып барыла торган шәхси аралашуны алыштыра алмаячак. Ярымфиналга кадәр килеп җиткән катнашучыларның барысына да рәхмәт. Сезнең чыгышлар иксез-чиксез илебез географиясен ачык күрсәтте. Финалга чыгучыларның барысын да без Казан командасында күрергә шат булачакбыз. Күпләрегезгә хәзер үк конкрет тәкъдимнәр ясарга әзерләнәбез», - диде шәһәр башлыгы Илсур Метшин.

Исегезгә төшерәбез, кичә Башкарма комитетта конкурсның ярымфиналы узды. Анда Казаннан, Орелдан, Мәскәүдән, Уфадан һәм башка шәһәрләрдән 30 кеше катнашты. Алар шәһәрнең яшьләр сәясәтен үстерү стратегиясе буенча үз проектларын тәкъдим иттеләр. Эксперт жюри җиде кешене сайлап алды, аларның икесе Мәскәүдән һәм Санкт-Петербургтан, калган бишесе Казаннан иде.

Конкурс комиссиясе составына Илсур Метшиннан тыш Казан шәһәре муниципаль берәмлеге башлыгының беренче урынбасары Денис Калинкин, Казан Башкарма комитеты җитәкчесе урынбасары Азат Абзалов, Казан Башкарма комитеты Аппараты җитәкчесе Булат Алиев, Башкарма комитет Аппараты җитәкчесе урынбасары – Кадрлар сәясәте идарәсе башлыгы Ирина Бочкова кертелгән.

Талантларны җәлеп итү һәм яшьләр белән системалы эшләү

Казанның Балалар һәм яшьләр эшләре комитеты рәисе вазифасына игълан ителгән конкурста Казанның Киров һәм Мәскәү районнары администрациясенең перспективалы проектлар һәм максатчан программалар бүлегенең баш белгече Дмитрий Хвостиков җиңде. Ул өч төп юнәлешкә: талантларны тотып калуга, ышанычны арттыруга һәм яшүсмерләрдә девиант тәртип куркынычын киметү чараларын эшләүгә юнәлдерелгән стратегия тәкъдим итте.

Хвостиков сүзләренчә, Казанда яшь кадрларның читкә китү очраклары бик күп: шәһәрдәге югары уку йортларын тәмамлаучыларның 30 проценттан артыгы укуларын тәмамлаганнан соң, башка шәһәрләргә, чит илләргә китә. Әйтелгән фикергә җавап буларак, ул төбәкнең эре предприятиеләре катнашында стажировкалар программасын киңәйтергә, шулай ук мәгариф һәм хезмәт базары арасындагы аерманы киметеп, яшьләр инфраструктурасы базасында һөнәри юнәлеш бирү үзәкләрен үстерергә тәкъдим итте.

Аның концепциясенең икенче блогы шәһәрдә яшәүче яшьләрне шәһәр тормышына җәлеп итү мөмкинлеген арттыруга багышланган иде. Хәзер чараларда яшьләрнең 15 проценттан кимрәге катнаша. «Яшьләр түрәләрне тыңлап арыды. Мин чараларны алар белән бергә проектларга тәкъдим итәм», - дип ассызыклады Хвостиков, уртак проектлар эшләргә, ачык әңгәмәләргә һәм «яшьтәшләре телендә» сөйләшүче фикер лидерлары белән очрашуларга басым ясарга тәкъдим итеп.

Ул яшүсмерләр арасындагы җинаятьчелек үсешенә аерым тукталды. Кандидат социаль челтәрләрдә лидерларның уңай йогынтысы аша территориаль мөнәсәбәт формалаштыруны профилактиканың төп коралы дип атады.

Шулай ук Хвостиков психологик сәламәтлек темасына кагылды һәм яшьләргә психологик ярдәм күрсәтүнең гамәлдәге системасын дистанцион форматлар белән тулыландырырга тәкъдим итте.

Югары икътисад мәктәбенең Казандагы филиалы, 20 миллиард сумга кадәр инвестицияләр һәм яшьләрне шәһәр проектларына җәлеп итү

Финалда Дмитрий Хвостиковтан тыш тагын алты кеше катнашты, аларның икесе эш өчен хәтта Татарстан башкаласына күченергә әзер булуларын җиткерде.

Финалга чыккан кандидатларның берсе – Санкт-Петербург егете, «АГНА» компанияләр төркеменең гамәлгә куючысы һәм идарәче партнеры танылган эшмәкәр Александр Шавлиашвили.

Александр Шавлиашвили 16 яшендә официант ярдәмчесе булып эшли башлый, берничә елдан «Лехайм» ресторанының идарәче директоры вазифасына күтәрелә. Күп еллар Санкт-Петербургта, Мәскәүдә һәм Нью-Йоркта компания рестораннарын үстереп, Ginza Project холдингында эшли. 2017 елда Нью-Йоркта Ginza Projectның генераль менеджеры була. 2018 елда Санкт-Петербургның FIFA оештыру комитетында туклану хезмәтләре өчен җаваплы зат итеп билгеләнә. Үз проектлары арасында ул Санкт-Петербургтагы кайбер танылган базарларны реконструкцияләүне билгеләп үтте.

Эшмәкәр Казанны илнең әйдәп баручы белем бирү һәм яшьләр үзәгенә әверелдерүгә юнәлдерелгән концепциясен тәкъдим итте. Төп тәкъдимнәр арасында – Югары икътисад мәктәбенең һәм Сколково филиалларын ачу, ел саен үткәрелә торган «Һөнәр сайлау» форумын эшләтеп җибәрү, «Яшүсмер» клублары челтәрен яңарту һәм шәһәр чикләрендә мәгариф, проект һәм спорт инфраструктурасы, альтернатив торак һәм бизнес-инкубаторлары булган дүрт эре яшьләр хабын булдыру. Лидерның төп максаты – көчле яшьләр һәм даими вакыйгалылык формалаштыру.

«Минем катнашымда Казан зооботаника бакчасын яңача үзгәртүгә кушылырга әзер команда төзелде. Бу проектка өч ел эчендә 10 миллиард сум акча инвестицияләргә тәкъдим итәбез – бу Казанның җәлеп итүчәнлеген кискен арттырачак», - дип фикерләрен белдерде Александр Шавлиашвили үзенең чыгышы вакытында.

Кандидат, Дубай дөнья өчен ни дәрәҗәдә әһәмиятле ил булса, Казан да Россия өчен актив яшьләрне һәм технологияләрне җәлеп итү шәһәре була ала, дип ышана. Александр Шавлиашвили фаразлавынча, аның стратегиясен гамәлгә ашыру Казанга 20 миллиард сумга кадәр инвестицияләр җәлеп итәргә, 2030 елга туристлар агымын елына ким дигәндә 6 миллион кешегә кадәр арттырырга һәм яшь кадрларның читкә китүен сизелерлек киметергә мөмкинлек бирәчәк.

«Мин балачактан ук яшьләр сәясәте өлкәсендәге зур, гаять әһәмиятле проектлар турында хыялландым. Нәтиҗәдә, мин бизнес өлкәсен сайладым һәм моның белән канәгать, әмма хәзер башка өлкәдә хәрәкәт итәргә теләр идем. Мин уйлаганнарның барысын да тормышка ашыру өчен зур компетенцияләр таләп ителә. Безнең илдә яшәп һәм бизнес белән шөгыльләнеп, мин Казандагы кебек көчле команданың башка бер шәһәрдә дә булмавын аңладым. Мин нәкъ менә монда, шушы көчле команда белән үсәргә телим», - дип аңлатты Александр, жюри сорауларына җавап биреп, үзенең күченүгә карата булган мотивациясен.

Шулай ук Казанда яшьләр сәясәте үсешенә үз карашын Мәскәүдән Дмитрий Коннов белдерде. Хәзерге вакытта ул Россия Федерациясе Президенты каршындагы Башкортстан Республикасының Тулы вәкаләтле вәкиллегенең инвестицион эшчәнлек, халыкара һәм төбәкара хезмәттәшлек бүлеген җитәкли. Аңа студентлар, якташлык, сәнгать белән бәйле юнәлешләр һәм темалар беркетелгән.

Дмитрий Коннов концепциясе яшьләр сәясәтенең бербөтен системасын булдыруга юнәлдерелгән. Дәгъвачы аңлатуынча, яшьләр шәһәрдә кала, үз проектларын башлап җибәрә, карьераларын үстерә һәм мөмкинлекләр экосистемасы буларак шәһәр мохите белән хезмәттәшлек итә. Коннов, кайчандыр үзе дә туган шәһәрен ташлап киткән. Шуңа күрә үсеш өчен урын эзләүче яшьләрнең тойгыларын яхшы аңлыйм, дип ассызыклады ул.

Башка кандидат, Башкарма комитетның Мәдәният идарәсе җитәкчесе урынбасары Эмиль Мостафин да шулай дип саный. Ул яшьләрне системалы рәвештә җәлеп итү программасын тәкъдим итте – стажировкалардан алып инфраструктура проектларын да кертеп, яшьләр өчен тулы кыйммәтле мәгълүмати ресурс һәм мобиль кушымта булдыру кирәклегенә басым ясады.

Яшьләрнең һәм коммерцияле булмаган оешмаларның үзара хезмәттәшлеге, эре партнерларны җәлеп итү

Конкурсның тагын бер финалисты – Казанның Идел буе районы «114 нче мәктәп» муниципаль бюджет гомуми белем бирү оешмасының тәрбия эшләре буенча директор урынбасары Виктория Мохтарова яшьләр сәясәтен Казанның тотрыклы һәм инклюзив үсешенең төп терәге итеп карарга тәкъдим итте, анда яшьләр реаль проектлар, мәгариф һәм социаль җаваплылык аша шәһәрне үзгәртүдә партнерларга әверелә.

Казан яшьләре бренды экосистемасын булдыруга һәм шәһәр инициативаларына эре партнерларны җәлеп итүгә басым ясау тәкъдиме белән Балалар һәм яшьләр эшләре комитеты рәисенең беренче урынбасары Динар Сәйфуллин чыгыш ясады.

Тагын бер кандидат – Татарстан Республикасы Яшьләр парламентының хәзерге рәисе Дамир Нургалиев, ачык һәм тигез мөмкинлекләрнең мөһимлеген ассызыклап, яшьләрнең шәһәр хакимияте, югары уку йортлары, коммерцияле булмаган оешмалар һәм бизнес белән турыдан-туры хезмәттәшлек итү моделенә басым ясады.

Балалар һәм яшьләр эшләре комитеты рәисе вазифасына ачык конкурсның ярымфиналында катнашучыларның географиясе бик киң. Кандидатларның күбесе – 72 проценты – Казанда яши. Әмма бәйгедә катнашучыларның географиясе Татарстан белән генә чикләнми. Аларның 17 проценты Россиянең башка шәһәрләреннән: Мәскәүдән, Санкт-Петербургтан, Түбән Новгородтан, Пензадан, Самарадан. Кайбер гаризалар Себер шәһәрләре – Омск, Новосибирск, Нижневартовсктан юлланган. Исемлектә шулай ук Урал шәһәрләреннән – Магнитогорск, Екатеринбург, Пермь шәһәрләреннән алынган гаризалар да бар. Әлеге вазифага теләк белдерүчеләрнең калган 11 проценты республика чикләрендә – Чаллы, Әлмәт, Түбән Кама, Яшел Үзән, Татарстан районнарында яши. Катнашучыларның уртача яше – 36.

Бәйгедә катнашучылар арасында – яшьләр берләшмәләре лидерлары, банк, төзелеш һәм IT-өлкә вәкилләре, Россия тимер юллары, «Россия вертолетлары», «Сибур», «Газпром» белгечләре, шулай ук шәхси бизнес вәкилләре.