Илсур Метшин инициативасы буенча «Максимов урамында»гы волонтерлык пунктына 250 кв.м мәйданлы бина биреләчәк

«Максимов урамында»гы волонтерлык пункты Казан мэры Илсур Метшин инициативасы белән 3,5 тапкырга киңәйтеләчәк. Бүгенге көндә гомуми мәйданы 100 кв.м булган ике бинада 250 ирекле хезмәткәр эшли. 2023 елдан алар 4 гектардан артык яшеренү челтәре, 13 мең окоп шәмнәре җитештергәннәр, 50 тоннадан артык гуманитар ярдәм җибәргәннәр. Әмма җитештерелә торган продукция күләмен арттыру өчен пунктның мәйданын киңәйтергә кирәк. Шәһәр башлыгы волонтерларның эшчәнлеге белән танышты һәм аларның эш шартларын яхшыртырга кушты.

Максимов урамындагы 1 нче йортта волонтерлык пункты Алсу Фазуллина инициативасы белән ачылды. 80 кв.м мәйданлы бинаны «Айболит» медицина үзәге филиалы җитәкчесе бушлай бирде. Ирекле эш яшеренү ятьмәләрен үрүдән һәм МХО сугышчылары өчен кием тегүдән башланды. Соңрак «ТатТрансАвто» Тэцовская урамында 20 кв.м мәйданлы бина бүлеп биргән, анда волонтерлар коры душ һәм шампунь, окоп шәмнәре ясый башлаган. Әмма бүгенге көндә булган мәйданнар җитәрлек түгел, һәм фронтка җибәрелә торган гуманитар ярдәм күләмен арттыру өчен пунктны киңәйтергә кирәк.

«Алсу Әсгать кызы – иң битараф булмаган һәм инициативалы волонтерларның берсе. Сезнең хезмәтегезнең кадерен фронтта беләләр. Сезнең эшчәнлекне киңәйтү өчен без Максимов урамындагы күрше бүлмәне бирәчәкбез. Хәзер биредә 80 кв.м, ә янәшәдә муниципаль милектә булган 250 кв.м мәйданлы тагын бер бина барлыкка киләчәк. Барысын да ремонтларбыз, кондиционерлар урнаштырырбыз, волонтерларга эшләү өчен уңайлы шартлар тудырырбыз. Без бергәләп җиңүне якынайтабыз. Сезнең кайгыртучан кулларыгыз белән шулкадәр күп эшләнде – бик күп әйберләр тегелде һәм җыелды. Бу чыннан да зур эш, һәм сезнең үзәк – Казандагы иң зур һәм активларның берсе», – дип билгеләп үтте шәһәр башлыгы.

2023 елдан хәрәкәттә катнашучылар көче белән 4 гектардан артык яшеренү челтәре, 10 мең коры аш һәм душ, 13 мең окоп шәмнәре, шулай ук 2 мең эшләнмә тегелгән һәм 500 әйбер бәйләнгән. Волонтерлар барлыгы 50 тоннадан артык гуманитар ярдәм җыйдылар.

Волонтерлык пунктында эш берничә кешедән башланды, ә бүген анда 250 гә якын битараф булмаган казанлы эшли. Биредә мобилизацияләнгәннәрнең хатыннары, студентлар, педагоглар, инженерлар, табиблар һәм пенсионерлар иңгә-иң куеп эшлиләр. Барысын да бер нәрсә берләштерә – Ватанны саклаучыларга ярдәм итү теләге.

«Аерым алганда, сер шунда, бездә басым һәм йөкләмәләр юк дип уйлыйм. Бездә беркем дә беркемне дә мәҗбүр итми. Килгәнсең икән, рәхмәт, булдыра алмасаң, бернинди куркыныч юк. Без ышаныч һәм ярдәм мохите тудырабыз. Кешеләр үз эшләренең нәтиҗәләрен күрә, хисаплар, фотосурәтләр ала, сугышчылардан рәхмәтләр ишетә», – дип аңлата оештыручы.

Алсу Фазуллина – КМТТУның инженерлык экологиясе кафедрасы доценты. Баштарак ул дәресләрән соң университет лабораториясендә окоп шәмнәре ясаган. Соңрак Тэцевская урамында тулы җитештерү ачылды.

«Эштән соң мин монда киләм – ятьмә үрәм – төргәкләр җыям, тукыма кисәм. Кайвакыт кичке тугызга кадәр тоткарланам, аннары өйгә кайтам, анда ирем һәм балалар көтә», – дип сөйләде Алсу Фазуллина.

Волонтерлар эшчәнлеге махсус операция сугышчылары өчен кирәкле әйберләр җитештерү белән генә чикләнми. Мәктәпләрдә һәм көллиятләрдә алар экипировка ясау буенча мастер-класслар үткәрәләр, сугышчыларга ярдәм йөзеннән патриотик акцияләр, ярминкәләр һәм класс сәгатьләре оештыралар.

«Минем балам 26 нчы лицейда укый, аның укытучысы балалар өчен челтәр үрү буенча мастер-класс белән килергә тәкъдим итте. Алар бер челтәр ясадылар, ә аннары мине ватанпәрвәрлек дәресе үткәрергә чакырдылар. Акрынлап мин башка мәктәпләргә дә чыга башладым. Мәсәлән, без «МХО геройларына чәкчәк» акциясе үткәрдек, ә 26 нчы лицейда педагоглар токмач кискәннәр, аннары аны фронтка җибәргәннәр», – дип уртаклашты ул.

Фронттан иреклеләргә даими рәвештә «солдат рәхмәте» килә. Төрле бүлекчәләрдән килгән рәхмәт хатлары Максимов урамындагы пунктның диварларын бизи. Бүлмәләрнең берсендә сугышчыларның имзалары язылган штандарт эленеп тора.

«Безнең өчен иң кадерлесе — Казаннан күп егетләр хезмәт иткән 1232 нче полкның» «солдат рәхмәте». Бу рәхмәтләр арасында безнең белән инде булмаган сугышчыларның имзалары да бар. Безнең бинада сугышчылар үзләре «штандарт» дип атаган әләм эленеп тора. Анда безгә гуманитар ярдәм сорап яки кунакка килгән һәркем кул куя. Автографлар арасында безнең эшнең ничек оештырылганын карарга килгән герой Рәсим Басиковның имзасы да бар», – дип сөйләде Алсу Фазуллина.

Оешманың эше белән шулай ук Авиатөзелеш һәм Яңа Савин районнары администрациясе башлыгы Ренат Шәмсетдинов һәм социаль сәясәт идарәсе башлыгы Ирина Смирнова танышты.

Элегрәк хәбәр ителгәнчә, Казан мэры Илсур Метшин «Тормышны кадерлибез» хәйрия оешмасында булган. 2022 елдан МХО зонасына аларның волонтерлары сугышчылар өчен 70 меңнән артык кирәкле әйбер әзерләгән һәм җибәргән, алар арасында – «Маруся» аптечкасы, «Фома» кабыгы, эвакуация стропалары, бандажлар һәм башкалар.