Самат Мәүлитов Казанның Дәүләт ветеринария берләшмәсе башлыгы итеп билгеләнде

Казанның Дәүләт ветеринария берләшмәсе башлыгы, баш ветеринария табибы итеп Самат Мәүлитов билгеләнде. Элегрәк ул «Агросила» АҖ генераль директорының терлекчелек буенча урынбасары вазифасын били иде. Бу хакта Башкарма комитеттагы аппарат киңәшмәсендә ТР башкаласы мэры Илсур Метшин хәбәр итте.

«Казанның баш ветеринария табибы һәм Дәүләт ветеринария берләшмәсе җитәкчесе итеп Мәүлитов Самат Сәлимҗан улы билгеләнде, ул ветеринариянең барлык юлларын үтте, төрле агрокомпанияләрдә эшләде, җитәкчелек эшендә зур тәҗрибә туплады. Яңа бурыч – азык-төлек иминлеген һәм казанлылар өстәленә куела торган продукциянең сыйфатын тәэмин итү сезнең контрольдә булыр, дип өметләнәбез. Шәһәр файдасына уңышлы һәм нәтиҗәле эш телибез», – диде шәһәр башлыгы.

Казан Дәүләт ветеринария берләшмәсенең элеккеге башлыгы Тимур Галиев Татарстан республикасы Министрлар Кабинетының Баш ветеринария идарәсе җитәкчесе вазифасына билгеләнде.

Белешмә

Мәүлитов Самат Сәлимҗан улы – ветеринария фәннәре кандидаты. 1974 елның 9 ноябрендә туган. 1997 елда «ветеринария табибы» белгечлеге буенча Бауман исемендәге Казан дәүләт ветеринария медицинасы академиясен тәмамлый.

1997-1998 елларда Тимирязев исемендәге күмәк хуҗалыкта ветеринария табибы булып эшли.

1998 елдан 2004 елга кадәр Бауман исемендәге Казан ветеринария медицинасы академиясендә чит ил студентлары белән эшләү буенча ветеринария медицинасы факультетында аспирант, декан урынбасары, аннары өлкән укытучы булып эшли.

2004 елдан 2005 елга кадәр «Алтын Башак» идарәче компаниясенең зоотехник-әйдәп баручы белгече була.

2005 елдан 2008 елга кадәр «Каратун» АХП генераль директоры вазифасын башкара.

2008 елдан 2009 елга кадәр «Агросоюз» идарәче компаниясенең башкарма директоры була.

2009 елдан 2011 елга кадәр «Борындыклар» АХП башкарма директоры булып эшли.

2011 елдан 2013 елга кадәр Чүпрәле районы дәүләт ветеринария берләшмәсендә җитәкче вазифаларын башкаручы, аннары җитәкче булып эшли.

2014 елдан 2016 елга кадәр «Сафара-Идел буе җитештерү берләшмәсе» ҖЧҖ, Мәүлитов Рәмис Сәлимҗан улы ШЭ коммерция директоры, шулай ук «СМ СТРОЙ» ҖЧҖ директоры вазифаларын башкара.

2016 елдан 2017 елга кадәр «Асмант» ҖЧҖ коммерция директоры булып эшли.

2017 елдан 2022 елга кадәр «Агросила»АҖендә бүлек башлыгы булып эшли.

2022 елдан 2025 елга кадәр «Агросила» АҖ генераль директорының терлекчелек буенча урынбасары була.