И.Метшин: «Социаль ипотека программасына 20 ел – республика өчен мөһим этап»

20 ел эчендә Казанда социаль ипотека программасы буенча гомуми мәйданы 2 млн квадрат метрдан артык булган 45 мең 616 фатирлы 264 йорт төзелгән. Программаны гамәлгә ашыру елларында 45 меңнән артык гаилә торак шартларын яхшырткан. Быел өй туйларын тагын 300 гаилә бәйрәм итәчәк. Казанда социаль ипотека программасының ничек гамәлгә ашырылуы турында торак сәясәте идарәсе башлыгы Руслан Гыйльфанов сөйләде.

«Социаль ипотека программасының 20 еллыгы — республика өчен мөһим этап. Ул тузган торакны бетерү программасына нигез салынган үзгәртеп коруларны дәвам итте. Ил өчен иң катлаулы вакытта, Минтимер Шәрип улы Шәймиев уйлап тапкан программа чатырманлыклардан меңләгән кешене тартып чыгарды. 9 ел эчендә Казанның 33 меңнән артык гаиләсе бушлай төзекләндерелгән торак алган. Бу кешеләрнең балалары һәм оныклары аларның әти-әниләре, әби-бабайлары нинди шартларда яшәгәннәрен күз алдына да китерә алмыйлар: урамда булган уңайлыклар белән, уртак коридорда газ плитәсе һәм ярлы мәхәлләләр тормышының башка үзенчәлекләре белән», — дип билгеләде Казан мэры Илсур Метшин.

Шәһәр башлыгы ассызыклаганча, бүген социаль ипотека программасы Казанда инде 20 ел уңышлы гамәлгә ашырыла. Яңа йортлар белән беррәттән территорияләр дә төзекләндерелә, микрорайоннарда хастаханәләр, балалар бакчалары, мәктәпләр, җәмәгать урыннары барлыкка килә. «Без үз чиратыбызда торак төзелеше белән беррәттән социаль объектлар төзергә тырышабыз. Бүген Салават күпере районы — мәктәпләре, бакчалары, үз поликлиникасы һәм паркы булган тулы район. Шундый ук эшне безгә «Гаилә» микрорайонында да башкарырга туры киләчәк. Анда инде балалар бакчасы бар. Узган ел анда зур лицей төзедек, анда гадәти дәресләрдән тыш, балалар өстәмә белем ала», — дип билгеләде шәһәр башлыгы.

Социаль ипотека программасы буенча фатирлар Дәүләт торак фонды тарафыннан төзелә торган йортларда гына бирелә. Хәзерге вакытта төзелеш Казанның Киров районында «Салават Күпере» торак комплексында һәм Идел буе районында «Гаилә» микрорайонында алып барыла.

Гомумән алганда, программа ярдәмендә 45 меңнән артык гаилә торак шартларын яхшырткан. Быел өй туйларын тагын 300 гаилә бәйрәм итәчәк. «Алар арасында Башкарма комитетта чиратта торучылар гына түгел, эш урыны буенча исәпкә куелган гаиләләр, авария хәлендәге йортларда яшәүчеләр, ятим балалар кебек башка программаларда катнашучылар да бар», — дип хәбәр итте Руслан Гыйльфанов.

Программада Казанның 3 мең 738 гаиләсе катнашты: Бөек Ватан сугышы ветераннары, хәрби хәрәкәтләрдә катнашучылар, инвалидлар, социаль түләүле яшь гаиләләр, хәрби хезмәттән азат ителгәннәр, ерак төньяк районнарыннан күчеп килергә мәҗбүр булганнар һәм Чернобыль АЭСындагы авария нәтиҗәләрен бетерүчеләр.

Бүген Бөек Ватан сугышы ветераннары һәм аларның торакка мохтаҗ дип танылган гаилә әгъзалары фатирлар белән тәэмин ителгән – 1 мең 684 гаилә яңа торак алган. Быел Бөек Ватан сугышында катнашучыларның ике тол хатыннарына торак алуга субсидияләр бирелгән. Дәүләт ярдәменең гомуми суммасы 10,2 млн сум тәшкил итә. Субсидия күләме квартал саен билгеләнә һәм 36 квадрат метрдан да ким булмаган торак сатып алуга бирелә. Агымдагы елның беренче кварталында субсидия күләме 5 млн сумнан артык тәшкил иткән.

«Бүлеп бирелә торган бюджет акчалары Казанның коммерция базарында торак сатып алу өчен җитәрлек булмаганлыктан, Татарстан Республикасы җитәкчелеге ярдәме белән ветераннарга социаль ипотека программасы буенча төзелгән йортларда бер бүлмәле фатирлар бары тик субсидияләр хисабына гына өстәмә түләүләрсез бирелә», – дип билгеләде Руслан Гыйльфанов.

Махсус хәрби операция башланганнан бирле социаль ипотека буенча фатирлар МХО катнашучыларына һәм һәлак булган хәрбиләрнең гаилә әгъзаларына бирелә башлады. Бүгенге көндә 15 гаилә яңа фатирларга күчкән, чиратта тагын 10 гаилә.

Шулай ук 2005 елдан башлап Казанның Башкарма комитетында бюджет өлкәсендә эшләүче 30 меңнән артык гаилә, яшь гаиләләр һәм кичектергесез ярдәмгә мохтаҗлар исәпкә алынган, шулардан 20156 гаилә өй туе үткәргән инде.

Шунысын да билгеләп үтәргә кирәк, Татарстанда социаль ипотека программасы 2005 елдан бирле гамәлгә ашырыла, башта анда бюджет өлкәсе хезмәткәрләре һәм социаль ипотеканы финанслауда катнашучы оешмалар хезмәткәрләре генә катнаша ала иде, дип искәртте Руслан Гыйльфанов.

2020 елда катнашучылар исемлеге киңәйтелде: программада катнашу мөмкинлеге 36 яшьтән кечерәк ирле-хатынлы яшь гаиләләргә бирелде. Бу теркәлгән никахларга да, балаларын тәрбияләүче бер ата-ана белән гаиләләргә дә кагыла.

Гаиләләрне исәпкә кую мөрәҗәгать итүчеләрнең яшәү урыны буенча район администрацияләрендә, шулай ук эшләү урыны буенча предприятие һәм оешмаларда гамәлгә ашырыла.

Программаның төп өстенлекләре: торакның ташламалы бәясе, 7% күләмендә ставка, 10% күләмендә минималь башлангыч взнос, шулай ук фатирларның чиста бизәлеше.

Моннан тыш, бала туганда бер тапкыр бирелә торган 200 мең сум күләмендә түләү бирелә, аны беренчел кертем буларак яисә ипотека буенча бурычны каплау өчен кулланырга мөмкин.

2021 елда социаль ипотека программасы буенча исәпкә кую буенча муниципаль хезмәт күрсәтү цифрлы форматка күчерелде, хәзер программа ТР Дәүләт һәм муниципаль хезмәтләр порталында гамәлгә ашырыла, программада катнашу өчен документларны онлайн яки КФҮ аша тапшырырга мөмкин. Кирәкле документларның тулы исемлеге белән Казан Башкарма комитетының Торак сәясәте идарәсе битендә танышырга мөмкин.