Евгений Богачев Казан турында: «Бу чыннан да киләчәк шәһәре, без бер адымга алда барабыз»

(Казан шәһәре KZN.RU, 30 нчы август, Диана Жиленкова). Казанда Шәһәр һәм республика көнен бәйрәм итү гадәттәгечә Ратушада алдынгы шәһәр кешеләрен хөрмәтләүдән башланды. Шәһәр һәм республика бүләкләрен 32 кеше алды, алар сәнәгать, мәдәният, спорт һәм тормышның башка өлкәләренә үз өлешен кертүчеләр. ТР башкаласында яшәүчеләрне Мэр Илсур Метшин котлады.

«Бу безнең барыбыз өчен дә әһәмиятле бәйрәм – 30 ел элек башланган Татарстанның яңа тарихына горурлык белән күз салырга тагын бер мөмкинлек. Һәр яшәлгән ел безнең шәһәр елъязмасына күп яңа, игелекле нәрсәләр кертә. Узган вакыт эчендә безнең уртак йортыбыз – Татарстан һәм аның башкаласы – бүгенге кешенең иминлеген билгеләүче өлкәләрдә җитди уңышларга ирештеләр», - дип мөрәҗәгать итте җыелганнарга шәһәр башлыгы.

Казан динамик рәвештә үсүен һәм үзгәрүен дәвам итә, дип дәвам итте ул. Планнарда – ясалма интеллект куллануны киңәйтү, аны шәһәр һәм бизнес белән хезмәттәшлек, төзекләндерү һәм куркынычсызлык өлкәләренә кертү.

«Безнең бурыч – шәһәрнең тулы кыйммәтле игезәген булдыру, - дип билгеләде ТР башкаласының якындагы елларга максатларын Илсур Метшин. - Бу безгә Казанны халык өчен комфортлы, кунаклар өчен уңайлы итәргә, социаль киртәләрне киметергә һәм шәһәр мохитенең сыйфатын күтәрергә мөмкинлек бирәчәк».

Киләсе елда ук Казан мәгълүмати технологияләр һәм ясалма интеллект өлкәсендә тарихта беренче «Киләчәк уеннары» халыкара ярышларын кабул итәчәк. Тагын бер зур вакыйга БРИКС саммиты булачак.

Мэр искә төшергәнчә, агымдагы ел Татарстанда Милли мәдәниятләр һәм традицияләр елы дип игълан ителде. Казанлылар «Хәрәкәттә – бәрәкәт», «Древо жизни» шәһәр милли проектларында, Идел буе халыкларының яңа этник мәдәният фестивалендә һәм башкаларда зур кызыксыну белән катнашалар, дип билгеләп үтте шәһәр башлыгы.

«Сез барыгыз да Казанда яшисез һәм эшлисез, яраткан шәһәребезнең ничек үсүен, үсешен һәм үзгәрүен үзегез күрәсез. Яңа торак микрорайоннар барлыкка килә, ел саен 1 млн кв.м кадәр торак файдалануга тапшырыла, меңләгән гаилә үзләренең торак шартларын яхшырта. Татарстан Рәисе Рөстәм Нургали улы Миңнеханов ярдәме белән март аенда социаль ипотека программасы буенча яңа фатирлар ачкычын 70 педагогик хезмәткәр алды, бу Педагог һәм остаз елында аеруча мөһим», – дип ассызыклады Мэр.

Аның сүзләренә караганда, бүген бердәмлек аеруча мөһим. Казанлылар Россиягә моңарчы күрелмәгән санкцион басым шартларында илнең барлык халыклары белән бердәй чыгыш ясыйлар. Кемдер махсус хәрби операциягә ирекле хәрби булып киткән, башкалар гуманитар ярдәм җыюда катнаша, ә заводлар тәүлек әйләнәсе оборона заказын үти – беркем дә читтә калмый, дип игътибар итте Мэр.

«Махсус хәрби операциядә катнашучыларның гаиләләре белән элемтәдә, аларның проблемаларын беләбез һәм һәрьяклап ярдәм күрсәтәбез», - дип өстәде шәһәр башлыгы.

Соңыннан Илсур Метшин казанлыларга ТР башкаласын үстерүгә керткән өлешләре өчен рәхмәт белдерде. Алар ярдәменнән һәм шәһәр турында ихлас кайгыртуларыннан башка масштаблы проектлар һәм кыю идеяләр тормышка ашырыла алмый, дип ассызыклады Мэр.

Бүген традиция буенча Татарстан Республикасы башкаласының мактаулы гражданнары китабы һәм Шәһәрнең мактау китабы яңа исемнәр белән тулыланды. Шулай итеп, «Казанның мактаулы гражданины» исемен «УНИКС» баскетбол клубы президенты Евгений Богачевка бирделәр.

«Бу бик мактаулы һәм зур исем, - дип уртаклашты ул. - Илсур Рәис улы, сез эшләгән елларда: Универсиада, футбол, дөнья чемпионаты, мин барысын да санап чыга алмыйм. Казанда мондый хәл беркайчан да булмады. Бу чыннан да киләчәк шәһәре, без бер адымга алдан атлыйбыз. Мин сокланам!».

Өч тапкыр дөнья чемпионы һәм биш тапкыр Гагарин Кубогы иясе Данис Зариповны Казанның Мактау китабына керттеләр.

«2000 елда, мин Казанга килгәндә, шәһәр әле спорт ягыннан шулкадәр үсеш алмаган иде. Бу еллар дәвамында безнең җиңүләр белән бергә спорт ягыннан Казан шактый үсеш алды. Һәм бүгенге көндә шуны турыдан әйтә алам, барлык хоккейчылар, спортчылар безнең шәһәр турында Россиянең спорт башкаласы буларак сөйли. Илсур Рәис улы, Татарстан спортына, хоккейга керткән өлешегез өчен зур рәхмәт сезгә!» - диде спортчы.

Мактау китабы ике оешма – ТР Сәламәтлек саклау министрлыгының Республика клиник хастаханәсе һәм Казан дары заводы белән тулыланды.

«Фидакарь хезмәт өчен» медален Мэр «Каздорсервис» ҖЧҖ баш энергетигы Евгений Бабичевка, «Центральный» физкультура-спорт берләшмәсе директоры урынбасары – «Юность» олимпия резервы спорт мәктәбе директоры Рафик Морзаковка, «Мисс Татарстан» Республика иҗтимагый оешмасы президенты Изольда Сахаровага һәм Казанның азык-төлек һәм социаль туклану департаменты генераль директорының беренче урынбасары Илмира Солтановага тапшырды.

«Ана даны – Материнская слава» медален Киров районының 122 нче балалар бакчасы тәрбиячесе Гөлчәчәк Абдуллина алды.

«ТР Атказанган табибы» исеме ТР Сәламәтлек саклау министрлыгының Республика суд-медицина экспертизасы бюросы табибы Виталий Акбашевка бирелде.

«ТР Атказанган машина төзүчесе» исеме Казан дары заводы токаре Наил Габделганиевка һәм Казан моторлар төзү җитештерү берләшмәсенең слесарь-инструментальщигы Миләүшә Котдусовага бирелде.

«ТР Атказанган торак-коммуналь хуҗалык хезмәткәре» исеме «Горводзеленхоз» тресты» МУП механизация базасы филиалы җитәкчесе Фәннур Нурисламовка бирелде.

«ТР Атказанган мәдәният хезмәткәре» исеме А.С.Ключарев исемендәге 7 нче балалар музыка мәктәбе укытучысы Эльмира Гарапшинага бирелде.

«ТР Атказанган халыкны социаль яклау хезмәткәре» исемен «Ярдәм» илкүләм ислам хәйрия фондының сукырлар өчен «Ярдәм» укыту-реабилитация үзәге директоры, Казан шәһәр Думасы депутаты Мәликә Гыйльметдинова алды.

«ТР Атказанган транспорт хезмәткәре» исеменә «Метроэлектротранс» МУП электродепосының компрессор җайланмасы машинисты Иван Федоров ия булды.

«ТР Атказанган төзүчесе» исеме «Казметрострой» АҖ маркшейдеры Надежда Головинскаяга бирелде.

Киров районының 151 нче мәктәбенең рус теле һәм әдәбияты укытучысы Евгений Родионовага, Идел буе районы балалар йорты директоры Марина Самойловага һәм Авиатөзелеш районының 33 нче гимназиясенең инглиз теле укытучысы Алсу Урустемхановага «ТР Атказанган укытучысы» исеме бирелде.

«ТР Атказанган химигы» исемен «КВАРТ» Кама-Идел резина техникасы АҖ цехы пресслаучы-кургашынлаучысы Айрат Миндубаевка тапшырдылар.

«Казан файдасына хезмәт һәм батырлык өчен» мактау билгесен С.П.Горбунов исемендәге Казан авиация заводы – «Туполев» ГАҖ филиалы ветераны Мәхмүт Шакиров, Казан Мэры ярдәмчесе Марат Сәлахов һәм Татарстан Республикасы Премьер-министры урынбасары Евгений Варакин алды.

«Узган ел июль аенда мин үз командам белән Татарстан Рәисенең кушуы буенча Лисичанскига киттем, – дип истәлекләре белән уртаклашты Евгений Варакин. - Безнең артта нинди көч торганын аңладым, без туган шәһәребезне уңайсыз хәлдә калдырырга тиеш түгелбез, Казанда яшәүчеләрнең барысы да безнең белән бергә. Бик зур эш башланды. «Игелекле Казан» машиналары шәһәргә кергәч кешеләрнең йөзләрендә елмаю пәйда була, алар безгә кул болгыйлар һәм шатланалар».

Шулай ук тантаналы җыелышта «Казан хакына мактауга лаеклы хезмәте өчен» мактау билгеләре, Казанның Мактау грамоталары һәм Мэрның Рәхмәтләре тапшырылды.

Артистларның һәм иҗат коллективларының чыгышлары бәйрәм атмосферасын тулыландырды. Алар арасында ТР Атказанган артисткасы Эльмира Кәлимуллина, ТР Дәүләт җыр һәм бию ансамбле, Дмитрий Железнов җитәкчелегендәге малайлар капелласы һәм башкалар бар иде.