Россиядә иң яшь дроннар операторының әтисе: «Бөтен хезмәт хакымны детальләргә сарыф итәм»

(Казан шәһәре KZN.RU, 11 нче август, Татьяна Марюхова). Казан Мэры Илсур Метшин химия буенча Халыкара олимпиаданың алтын медальләре иясе Никита Перов һәм Россиядә иң яшь дроннар операторы Булат Нургалиев белән очрашты. Шәһәр башлыгы балаларны уңышлары белән котлады һәм тормыш юлларында алга таба үсеш теләде, исемле рәхмәт хатлары һәм истәлекле бүләкләр тапшырды.

Никита Перов – төрле дәрәҗәдәге химия буенча олимпиадаларның күп тапкыр җиңүчесе, ике тапкыр Халыкара Менделеев олимпиадасының алтын медаль иясе. Быел ул химия буенча Халыкара олимпиаданың алтын медаленә ия булды. Аңа моннан ике атна элек Швейцариядә йомгак ясадылар. Быел ул Казанның Вахитов районындагы 131 нче лицеен тәмамлады һәм Александр Бутлеров исемендәге химия институтында укуын дәвам итәчәк.

«Мин фәннәр кандидаты булырга җыенам, ә моны нинди тизлек белән эшләягемне – алга таба күз күрер. Фәнни дәрәҗәне кабул ителгәннән иртәрәк алу мөмкинлегем бар. Минем үсеш өлкәсенә килгәндә, бу хисаплау химиясе һәм биохимик процессларны өйрәнү», - дип уртаклашты Никита Перов.

Ул химиягә мәхәббәтне аңа педагог Әлфия Сафонова сеңдергәнен, ә олимпиадаларга шәһәр химия түгәрәгеннән укытучылар әзерләгәнен сөйләде. Аның фикеренчә, КФУ илебезнең әйдәп баручы югары уку йортлары, шул исәптән МДУ белән дә көндәшлек итә ала. «Бәлки, кайбер тикшеренү өлкәләрендә без хәтта илнең әйдәп баручы югары уку йортларын да узып китәбез, шул исәптән кадрлар һәм техник җиһазлар буенча. Алдагысын әйтә алмыйм әлегә, әмма белем алганчы Казанда булачакмын. Гомумән алганда, безнең шәһәр искиткеч һәм миңа бик ошый», - дип сөйләде булачак химик.

Никита Перовның тренерлары – лицейның химия укытучылары, алар системалы рәвештә Бөтенроссия укучылар олимпиадасы, шулай ук башка профильле интеллектуаль ярышлар призерларын һәм җиңүчеләрен әзерлиләр.

Россиядәге дроннарның иң яшь операторы Булат Нургалиев Идел буе районының 6 нчы гимназиясендә укый, аңа 14 яшь. Күптән түгел ул «Архипелаг-2023» проект-белем бирү интенсивында иң яхшы нәтиҗәләр күрсәтте, ярышлар вакытында өч импровизацияләнгән самолетны бәреп төшерде һәм башка күнегүләр башкарды. Ярышлар нәтиҗәләре буенча аңа тугыз кубок һәм медаль тапшырылды.

Булат очучы булырга хыялланганын, дроннарны сынау белән нибары өч ел элек мавыга башлаганын сөйләде. Үз куллары белән ул 20 дән артык очу аппараты җыйган.

Мэр белән очрашуга Булат үзенең тренеры булган әтисе белән бергә килде. Марсель Нургалиев Казан мәгълүмат технологияләре һәм элемтә техникумында эшли.

«Мине бу шөгыльгә әтием җәлеп итте, ул минем башкалардан яхшырак булуымны тели. Мәктәпне тәмамлаганнан соң мин гражданнар авиациясе пилоты булырга һәм пилотсыз өлкәдә үсәргә планлаштырам. Мин дроннар җыярга өйрәндем, ә аннары инде җиңелрәк була башлады. Мәсәлән, моторларны күп эретеп ябыштырырга кирәк булган дроннарны җыю иң кыены, ә болай барлык дроннар да бертөрле. Мәктәптән соң Казанда мәгълүмати куркынычсызлык буенча белгечлектә укыячакмын», - дип сөйләде Булат Нургалиев.

Яшь пилотсыз аппарат операторының әтисе көллияттә «Профессионаллар» профессиональ чемпионат хәрәкәтендә катнашу өчен улы кебек үк белгечләр әзерли. Хәзер аның техникумнан ике тәҗрибәле пилоты, шулай ук яңа гына эшли башлаучылары – алар өч-дүрт кеше бар.

Булат, иң мөһиме, оча гына түгел, ә өченче затлар ярдәменнән башка үзе квадрокоптерлар җыя белә. Аның бу эштә ярдәм итүче яхшы дусты бар һәм алар шундый тандем булдырган. Төрле квадрокоптерлар җыялар: аграр, спорт, ерак очышлар өчен һәм башкалар. Мин, әти буларак, улымның хоббисына ярдәм итәргә тырышам, һәм бөтен хезмәт хакын детальләргә тотам», - дип ассызыклады Марсель Нургалиев.

Очрашуда шулай ук Казан Башкарма комитеты җитәкчесе урынбасары Гүзәл Сәгыйтова һәм Мәгариф идарәсе җитәкчесе Ирек Ризванов катнашты.