«Казанның тормыш сөючеләре көне»: гаилә рецептлары алмашу, сәламәтлек турында лекцияләр һәм «алтын» матурлык конкурсы

(Казан шәһәре KZN.RU, 14 нче август, Татьяна Марюхова). Татарстан башкаласында 23 нче августта «Казанның тормыш сөючеләре көне» билгеләп үтеләчәк, бәйрәм өлкәннәр өчен квест форматында үткәрелә. Шәһәрлеләр гаилә рецептлары белән алмаша, сәламәтлек турында лекцияләр тыңлый, кызыксыну клублары белән мәйданчыкларга бара, дәресләргә языла һәм матурлык конкурсында катнашучылар өчен җан атып карый алачак. Бу хакта шәһәр Мэриясендә узган эшлекле дүшәмбедә Казан Башкарма комитеты җитәкчесе урынбасары Гүзәл Сәгыйтова хәбәр итте.

«Барлык учреждениеләр, барлык юнәлешләр тәкъдим ителәчәк – барысын да үз күзләрең белән күрергә мөмкин булачак. Без пенсионерларны катнашырга, бәйрәмгә килергә, кәефләрен күтәрергә, күңелләренә хуш килгән шөгыль яисә юнәлеш сайларга чакырабыз. Болар барысы да бушлай, иң мөһиме – тормыш шундый позитив белән тулсын», - дип аңлатма бирде Казан Мэры Илсур Метшин.

Бәйрәм 10:00 сәгатьтә Горький паркында башлана. Кунакларны уңайлы welcome-зона каршы алачак, ә үзәк аллеяда ял оештыру учреждениеләре презентациясе узачак. Урында үзеңә ошаган шөгыль сайларга һәм 13 юнәлешнең берсе буенча теләсә кайсы мәдәни үзәккә, китапханәгә яки паркка беренче чарага язылырга мөмкин булачак.

Декоратив-кулланма сәнгать мәйданчыгында рәсем сәнгате, атлас тасмалар белән чигү, курчаклар һәм бизәнү әйберләре ясау буенча мастер-класслар узачак.

Активлык зонасында «Тормыш яме» проекты катнашучылары профессиональ тренерлар катнашында аэробика һәм гимнастика белән шөгыльләнә алачак, алар җиңел кардиойөкләнеш өчен дөрес техника турында сөйләячәк. Шулай ук вальс, бачате һәм башка биюләр буенча мастер-класслар планлаштырылган.

Интеллектуаль ял зонасында гроссмейстер Артем Тимофеев катнашында шахмат буенча ярышлар узачак. Китап сөючеләр өчен актуаль әдәбиятка күзәтү, шулай ук буккроссинг (ред.иск. – китаплар алмашу) булачак. Барлык теләүчеләр дә өй китапханәсеннән китаплар алып килә ала.

Өлкән яшьтәге казанлыларга белем бирү мәйданчыгында мобиль җайланмалардан файдалану кагыйдәләре һәм үзләрен цифрлы мошенниклыктан ничек саклап калу турында сөйләячәкләр. Шулай ук көн дәвамында табиблар «Озак яшисем килә!», «Яман шеш авырулары профилактикасы», «Инсульт билгеләрен ничек белергә», «Гериатр кем ул һәм ни өчен аңа барырга кирәк», «Шикәр диабеты белән тормыш тукталмый» кебек темаларга багышланган сәламәт яшәү рәвеше турында лекцияләр белән чыгыш ясаячак. Ә «Ышаныч» психологик ярдәм үзәге белгечләре «Тыңлыйбыз» проекты кысаларында психолог белән очрашу оештыра.

Шәһәр мәшгульлек һәм социаль хезмәт күрсәтү үзәкләре хезмәткәрләре эшкә урнаштыру, социаль тәэмин итү буенча консультацияләр үткәрәләр.

Тәҗрибәле бакчачылар мул уңыш серләре белән уртаклашачак. Мәйданчыкта чәчәкләр һәм башка үсемлекләр утырту, кышка яшелчә әзерләү буенча мастер-класс узачак, һәркем үз гаилә рецепты белән бүлешә алачак.

«Үз бакча участогы булмаган, әмма яшелчә үстерүдә көч сынашырга теләгән кешеләр киләсе сезонда «Җәмәгать бакчасы» проектында катнаша алачак. Бүгенге көндә ике паркта – Горки-Әмәт урманында һәм Салават Күпере торак районы паркында махсус түтәлләр бар. Бакча Урицкий паркында да барлыкка киләчәк», –  дип җиткерде Казан Башкарма комитеты җитәкчесе урынбасары.

Горький паркында «Казанның тормыш сөючеләре көне»ндә вокаль һәм хореография коллективларының отчет концерты, шулай ук «алтын» яшьтәге модельләр катнашында «Алтынбикә» матурлык һәм талант конкурсы планлаштырылган.

Шулай ук рәсем сәнгате буенча мастер-класс узачак һәм балалар зонасы эшләячәк – әбиләр һәм бабайлар өчен дә, аларның оныклары өчен дә дәресләр табылачак.

Парк кунаклары шәһәр спорты, өстәл теннисы, дартс, шахмат кебек ярышларда үзләренең физик формаларын күрсәтә алачак. Актив уеннар, ярышлар һәм мастер-класслардан соң ял итү зонасында теләгән һәркем самавырдан чәй татып карый алачак.

Квест нәтиҗәләре буенча «Актив озын гомер уеннары»нда катнашучыларга «Тормыш яме» проекты символикасы белән истәлекле бүләкләр тапшырылачак. Хәйрия ярдәме һәм проектка ярдәм кысаларында «Нәфис» компаниясе бәйрәмдә катнашучыларга 800 бүләк биргән.

«Без барлык Казан пенсионерларын «Тормыш яме» берләшмәсенең бер өлеше булырга чакырабыз, бәйрәмдә һәркем уңай энергия һәм якты тәэсирләр алачак, ә иң мөһиме – үз күңеленә хуш килгән юнәлеш табачак», – дип нәтиҗә ясады Гүзәл Сәгыйтова.