Казанда мәктәп ашханәләре хезмәткәрләре штаты 1,8 меңгә якын кешегә кадәр арткан

(Казан шәһәре KZN.RU, 16 нчы гыйнвар, Диана Жиленкова). Яңа уку елында Казанда мәктәп ашханәләре хезмәткәрләре штаты 1,8 меңгә якын кешегә кадәр арткан. 1132 штат берәмлегенә 624 ставка өстәлгән. Азык-төлек блокларында эшләүчеләрнең штат саны 1 нче сентябрьгә «СанПиНның санитар кагыйдәләренә һәм нормаларына үзгәреш кертү турында»гы карарга туры китерелде, дип хәбәр итте эшлекле дүшәмбедә Азык-төлек һәм социаль туклану департаменты директоры Р.Мөхәммәдшина.

Узган елның ноябрендә Совет районының 159 нчы лицее «Иң яхшы мәктәп ашханәсе» бөтенроссия конкурсында «Миллион халыклы шәһәрнең иң яхшы мәктәп ашханәсе» номинациясендә икенче урынны алды. Ә уку йорты пешекчесе Светлана Кириллова «Мәктәп ашханәсенең иң яхшы пешекчесе» номинациясендә көмеш призер булды.

«Бүләкләр безнең миллион халкы булган шәһәрләрдәге башка коллегаларыбыз белән бер рәттә булуыбызны күрсәтә. Беренче, икенче һәм теләсә нинди призлы урыннар – коллективның, җитәкчеләрнең, Рима Җәмиловна, сезнең директор буларак зур хезмәтегез. Шуңа күрә пешекчеләргә рәхмәт сүзләрен җиткерегез. Аларның профессиональлеге конкурста билгеләп үтелде. Шулай дәвам итәргә!» - дип котлады И.Метшин.

Азык-төлек һәм социаль туклану департаменты генераль директоры сүзләренчә, барлык мәктәпләр дә персонал җәлеп итә алмаган, шуңа күрә кадрлар туплау һәм пешекче һөнәренең абруен күтәрү мәсьәләсе актуаль булып кала. «Әмма без әзер белгечләр килүен көтмибез, квалификациясез хезмәткәрләрне дә кабул итәбез һәм аларны һөнәргә өйрәтәбез», – дип ассызыклады Р.Мөхәммәдшина. Әйтик, ашханәләрнең профильле белемнәре булмаган 14 хезмәткәре пешекче һөнәренә укытырга җибәрелгән. Шулай ук кышкы каникуллар вакытында 21 мәктәп пешекчесе квалификациясен күтәргән.

Департамент ярдәмендә өлкән курс студентлары мәктәп ашханәләрендә җитештерү практикасын уза ала. Уку елы башыннан бу мөмкинлектән 122 укучы файдаланган. Ә чит шәһәрләрдән килгән студентларга практика вакытында тулай торакта бүлмәләр бирәләр. «Практика түләүле һәм кайбер вакансияләрне ябарга мөмкинлек бирә. Кызганычка каршы, барлык практикантлардан нибары 2 кеше генә эшкә урнашты», - дип сөйләде Р.Мөхәммәдшина.

Казан сәүдә-икътисад техникумында белгечләрне җәлеп итү өчен «Балаларга –сәламәт туклану!» кулинар бәйгесе оештырылды. «Без яшь кадрларны җәлеп итүдә ярышабыз һәм төрле иҗади чаралар белән яшьләрне кызыксындырырга, сакларга тырышабыз. Безнең пешекчеләр һәм машина йөртүчеләр «Яшь профессионаллар» программасы кысаларында иң яхшылары исеме өчен көч сынаштылар, ә департамент ашханәсе кассиры Дарья Щелкова предприятиене «Безнең заман – Наше время» республика конкурсында тәкъдим итте», – дип уртаклашты департамент директоры.

Мәктәп азык-төлек блокларында эшләүчеләр саны арту белән бергә җитештерү куәтләре дә арта, дип игътибар итте Р.Мөхәммәдшина. Мәсәлән, департаментта өстәмә, өченче, тоннель юу җайланмасы урнаштырылды. Шулай ук пароконвектоматлар, казаннар, табалар, гастросыйдырышлылык, термос һәм термопортлар сатып алынган. «Җилдән саклану өчен предприятие дебаркадерда пандуслар монтажлады һәм 7 капкага җил үткәрми торган тамбурлар куйды», – дип өстәде спикер.

Департамент эш процессларын цифрлаштыруны да үткәрә. ТР башкаласының барлык мәктәпләрендә 1 нче сентябрьдән продукциягә заказ бирүнең автоматлаштырылган системасы кертелде. Аның төп үзенчәлеге – бөтен продуктка заказ бирү процессының ачыклыгы һәм тиешле күләм саклануы яки перетарка хаталарының кимүе. Шул ук вакытта азык-төлек блогы мөдире көнгә 2 сәгать эш вакытын янга калдыра ала.

«Ашханәләрне техник җиһазлау дәвам итә. 2022 елда аларның 132 сендә компьютерлар урнаштырылган, быел алар тагын 52 мәктәптә барлыкка киләчәк», – дип өстәде Р.Мөхәммәдшина.

Бүлек үз проектларын да тормышка ашыра. Р.Мөхәммәдшина сүзләренчә, «Мәктәп пикнигы» укучыларны сәламәт туклануга һәм яшәү рәвешенә тарту буенча нәтиҗәле чараларның берсе булып кала. Бу уку елында проект кысаларында чаралар 16 нчы һәм 189 нчы гимназияләрдә үткәрелде. Программага мәктәп менюсындагы ашамлыкларны дегустацияләү, балалар белән сәламәт туклану һәм яшәү рәвеше темасына чаралар, шулай ук диетолог белән консультацияләр керде. Уку елы ахырына кадәр пикниклар тагын 10 мәктәптә узачак.

Сентябрь аенда 49 нчы мәктәптә «Әни барын да белә» проекты кысаларында очрашу булды. Мәктәп туклануы турында традицион фикер алышу инклюзия темасы белән тулыланды. Департамент директоры билгеләп үткәнчә, мәктәптә инвалид балалар шөгыльләнә алырлык иҗади остаханәләр булдырылган. «Остаханәләрне төзекләндерү инициаторларының берсе Казан шәһәр Думасы депутаты, «Барысы да балалар өчен» фондын гамәлгә куючы Далия Гайнанова иде, ул сентябрь очрашуында булды һәм шулай ук «Әни барын да белә» проектында катнашты», – дип сөйләде Р.Мөхәммәдшина.

Яңа ел алдыннан 25 нче һәм 76 нчы мәктәп укучылары өчен сәламәтлекләре чикле балаларга җайлаштырылган мастер-класслар оештырылды. Ә «Радуга» кафесында Республика балалар клиник хастаханәсендә озак вакыт дәваланучы пациентлар өчен гаилә мастер-классы үткәрделәр.