Илсур Метшин журналистлар белән ел саен уздырыла торган очрашуда 2022 елның төп нәтиҗәләре турында сөйләде

(Казан шәһәре KZN.RU, 27 нче декабрь, Диана Жиленкова). Узып баручы елның 22 нәтиҗәсе турында Казан Мэры Илсур Метшин ел саен үткәрелә торган матбугат конференциясендә сөйләде. Яңа ел алдыннан ул традиция буенча Ратушада федераль, республика һәм шәһәр массакүләм мәгълүмат чаралары вәкилләре белән очрашты.

Шәһәр башлыгы санкцияләр һөҗүме астында булган шәһәр икътисадының тотрыклылыгын төп нәтиҗә дип атады. Эчке территориаль продукт күләме 1 трлн сумнан артып киткән, инвестицияләр күләме 252 млрд сумга җиткән, ә кече һәм урта бизнес субъектлары саны 79 мең тәшкил иткән. 

2022 елда барлык төп үсеш программалары тормышка ашырылды: 158 йортка капиталь ремонт ясалды, 466 йортның ишегалды төзекләндерелде. «Барлык социаль программалар дәвам иткән өчен Татарстан Республикасы Президенты Рөстәм Миңнехановка, республика хөкүмәтенә рәхмәт. Федераль хөкүмәт, илебез җитәкчелеге безгә бу катлаулы мизгелдә дә ярдәм итте», – диде И.Метшин. 

25 млрд сум юл эшләренә юнәлдерелгән. Шәһәр Мэры билгеләп үткәнчә, әле күптән түгел генә Казан халкы юллардан канәгать булмаган шәһәрләр өчлегендә иде. Хәзер Татарстан башкаласы унынчы баскычтан түбәнрәк төште. 

Эре проектлар арасында 12 километрлы Вознесение тракты төзү һәм магистраль 6 полосага кадәр киңәйтеләчәк Горький шоссесын реконструкцияләү бар. Моннан тыш, Мехчылар урамының Зур Казан боҗрасы төзелеше кысаларында реконструкцияләнгән участогы да ачылды. 

Узып баручы елда Назарбаев урамындагы күперне капиталь ремонтлау башланды. Мэр искәртеп узганча, объект авария хәлендә, шуңа күрә эшне этаплап оештырып булмаган. Ремонт тәмамлангач, автомобиль полосалары саны 6 дан 8 гә кадәр артачак. Күпер буенча хәрәкәт киләсе елда ук ачылыр дип көтелә. 

Февраль аенда «Водоканал» өченче төньяк коллекторны реконструкцияләүгә кереште. «30-40 ел элек беркем дә агрессив юу чаралары барлыкка килер дип уйламаган. Бездә хәзер бу челтәрләр дуршлаг кебек. Әлегә эшләр «Водоканал»ның инвестиция программасы хисабына алып барыла. Әмма илгә финанслауның өч дәрәҗәсе – федераль, республика һәм муниципаль – булган торак фондны капиталь ремонтлау кебек зур федераль программалар кирәк», – дип ассызыклады шәһәр башлыгы. 

Көзен Салават Күпере торак районында паркның икенче чираты ачылды, анда 30 меңгә якын кеше өчен җәяүле яр буе, амфитеатр һәм мәдәни үзәк, күзәтү мәйданчыклары, актив һәм тыныч ял итү зоналары булдырылды. Паркның беренче чираты 2021 елда төзелгән. Яңа җәмәгать мәйданы 6 гектардан артык мәйданда урнашкан. 

Карбышев урамында ТР төзелеш тармагының 100 еллыгы скверы барлыкка килде, анда иртәгә чыршы шәһәрчеге ачарга планлаштыралар, ә Совет районында паркның 800 метр озынлыктагы Нокса елгасы буендагы беренче чиратын төзекләндерү тәмамланды. Киләсе елда Кремль дамбасы буендагы территорияне төзекләндерәчәкләр – монда велосипед һәм җәяүлеләр юллары, ял зоналары һәм күзәтү мәйданчыклары барлыкка киләчәк. 

Узып баручы елда Елга порты янындагы территорияне реновацияләү башланды. Сәнәгать зонасы территориясендә барлыгы 1,5 млн кв. метр торак һәм 1,3 млн кв. метр административ һәм коммерция биналары барлыкка киләчәк. Яшелләндерү һәм төзекләндерелгән иҗтимагый киңлекләр мәйданы проектланган территориянең кимендә 25% ын алып торачак һәм 72 га тәшкил итәчәк, шул исәптән 12 км озынлыктагы яр буе төзекләндереләчәк. 

И.Метшин декабрьдә «Урам» экстрим-паркында узган «Казаныш» II архитектура-төзелеш форумын үткәрүгә аерым игътибар бирде. «Бик шәп сөйләшү һәм аралашу. Яшьләр, Казан архитектура университетының өлкән курс студентлары, яшь архитектура бюролары һәм экспертлар трендлар буенча фикер алыштылар һәм илдә һәм аннан читтә башкарылган иң яхшы эшләрне күрсәттеләр», – дип искәртте Мэр. Чара барлыгы 2 меңнән артык катнашучыны берләштерде. 

Идел буе районында капремонттан һәм яңа корпус төзелгәннән соң 18 нче гимназия ишекләрен ачты. П.И.Чайковский исемендәге 1 нче номерлы балалар музыка мәктәбе дә яңартылды, анда интерактив музей оештырганнар, ә балаларны укыту өчен яңа музыка кораллары сатып алганнар. Учреждениене ачу уңаеннан бәйрәм концертын Россиянең халык артистлары Денис Мацуев һәм Константин Хабенский карады. 

Моннан тыш, быел капиталь ремонттан соң 13 нче номерлы «Сандугач» китапханәсе ачылды. Ә киләсе елда Дәрвишләр поселогында балалар поликлиникасы төзелеше тәмамланачак. 

Быел Казан зоопаркы яңа яшәүчеләр белән тулыланды. 

49 нчы мәктәп каршында укучылар һәм сәламәтлек мөмкинлекләре чикләнгән балалар өчен яңа «МастерОК» иҗади ял үзәге ачылды, ә Серов урамы буенча «Ярдәм» мәчете территориясендә сәламәтлек мөмкинлекләре чикләнгән кешеләр өчен беренче махсуслаштырылган спорт комплексы барлыкка килде. 

«Мөмкинлекләре чикле кешеләр өчен шартлар тудыру буенча эшне дәвам иттеләр – өйрәтүче фатирлар, инклюзив класслар, – дип сөйләде шәһәр башлыгы. - Барыгызга да рәхмәт әйтәсем килә. Сез бу темага һәрвакыт игътибар итәсез, бу бик мөһим, чөнки мондый эшләрне ялгыз гына башкарып булмый. Безгә һәркем кемгәдер юл аша үтәргә булышу яки кемгәдер игелекле сүз белән булышу турында уйланачак атмосфера тудыру бик мөһим». 

Быел «Ышаныч» балаларга һәм яшьләргә психологик-педагогик ярдәм күрсәтү үзәге бүлекләре яңартылды, ә «Игелекле Казан»ның Сеченов урамында колл-үзәк һәм конференц-зал белән үз коворкингы барлыкка килде. 

2024 елда Татарстан Республикасы башкаласы «Киләчәк уеннары» яңа технологик спорт турнирын кабул итәчәк. Казаннан тыш, масштаблы халыкара ярышлар уздыру хокукы өчен Мәскәү, Санкт-Петербург, Калуга һәм «Сириус» федераль территориясе көч сынашты. 

Ахырда Мэр мобилизацияләнгән гаиләләргә ярдәм итү буенча башкарылган эшләр турында сөйләде. Ике айга якын вакыт эчендә 540 тонна гуманитар йөк җыеп Лисичанскига җибәрелде. Шуңа бәйле рәвештә шәһәр башлыгы битараф булмаган казанлыларга рәхмәт белдерде. «16 гуманитар ярдәм җыю пунктын күрәсең, машина йөртүчеләргә балалар язган хатларны тапшырасың, әбиләр бәйләгән оекбашлар алып килә, кечкенә һәм зур коллективлар ярдәм җыя, син безнең нинди ил икәнлегебезне һәм безнең һәрберебездә нинди кыйммәтләр барлыгын аңлыйсың. Милләтенә, диненә, яшенә карамастан, генетик дәрәҗәдә. Син безнең бөек ил икәнлегебезне аңлыйсың һәм моның белән горурланасың», - дип уртаклашты И.Метшин. 

Матбугат конференциясендә Казан Мэры метрополитен үсеше, туристларны җәлеп итү, яңа балалар паркы төзү һәм башка сорауларга җавап бирде.