Ел башыннан Казан пенсионерлары 100 мең тапкыр «Яшәү яме» проекты дәресләрендә булган

(Казан шәһәре KZN.RU, 26 нчы сентябрь, Юлия Летникова). Сентябрьдән «Яшәү яме» шәһәр проектында катнашучылар кытай телен өйрәнә һәм нейробика белән шөгыльләнә башлый алачак. Казанда пенсионерлар өчен 13 юнәлеш буенча бушлай дәресләр 56 мәйданчыкта оештырылган, шул исәптән мәдәният йортлары, китапханәләр һәм паркларда. Ковид чикләүләре бетерелгәннән соң, клублар янә элеккеге режимда эшли башлады, ә быелның 9 аенда килүчеләр саны пандемиягә кадәрге саннарга әйләнеп кайтты. Бу хакта бүген эшлекле дүшәмбедә Казан Башкарма комитетының Мәдәният идарәсе башлыгы Азат Абзалов сөйләде.

«Казанның меңләгән пенсионерына күңелләре яткан эш белән бушлай шөгыльләнү мөмкинлеге бирелде. Бу – безнең өлкән кешеләребезгә бирә алган мөмкинлекләрнең иң кечкенәсе», – дип билгеләде Казан Мэры Илсур Метшин. Аның сүзләренә караганда, «Яшәү яме» проекты Казанның иҗтимагый тормышының бер өлешенә әверелгән инде. «6 ел эчендә проект шәһәрнең мәдәни тормышында ныклы урын алды, ә проектның иҗат коллективлары шәһәр чараларында актив катнашалар», – диде шәһәр башлыгы һәм өлкән яшьтәге казанлыларга ныклы сәламәтлек һәм киләчәктәге эшчәнлекләре өчен илһам теләде.

Пенсионерлар өчен аеруча популяр мастер-класслар арасында – йорт хуҗалыгы, бакчачылык, сәламәт яшәү рәвеше, лекторий, мобиль ликбез, декоратив-гамәли сәнгать, вокал, хореография, театр һәм менталь арифметика. «Кытай телен өйрәнү, нейробика, триггер нокталар белән эшләү буенча буыннар гимнастикасы, фотоостаханә һ.б. кебек яңа юнәлешләр дә барлыкка килде», – дип билгеләде А.Абзалов. Гадәттә көннең беренче яртысы проект чараларында катнашу өчен иң актив вакыт булып тора. Ел башыннан Казан пенсионерлары «Яшәү яме» проекты дәресләрендә һәм чараларында 100 мең тапкыр булганнар.

Мәдәният идарәсе башлыгы сүзләренә караганда, «Яшәү яме» проектын гамәлгә ашыруның 6 елында ул үз-үзен үстерүче системага әверелгән: хәзер пенсионерлар инициатива күрсәтәләр, юнәлешләрнең кураторлары булалар, яңа төр дәресләр тәкъдим итәләр. «Тамара Глазова менталь арифметика кебек юнәлеш ачты һәм бүген «Мәскәү» мәдәни үзәгендә берничә төркем алып бара. «Нагорный» мәдәният сараенда иҗтимагый башлангычларда Ләйлә Хөснетдинова йога укыта. Мондый мисаллар бүген бик күп», – дип ассызыклады докладчы.

91 яшьлек Зөлхәбирә Сәхәбетдинова – «Залесный» мәдәни үзәгендә «Татар гармоникалары» фольклор коллективында катнашучы һәм 88 яшьлек Владимир Сухарев – «Мәскәү» мәдәни үзәгендә социаль-бал бию студиясе биючесе «Яшәү яме» чараларының иң өлкән катнашучылары булып торалар.

Азат Абзалов проектның җәйге чаралар сезоны Казанның яшәү яме сөючеләре көненнән старт алганын искә төшерде. 26 нчы майда «Крылья Советов» паркында бәйрәмгә 3 меңнән артык пенсионер килгән, алар өчен кызыксынулары буенча ял оештырылган, ә теләүчеләр концерт программасы кысаларында үз иҗатларын тәкъдим иткәннәр, дип билгеләп үтте Мәдәният идарәсе башлыгы.

«Яшәү яме» проекты турында тулырак мәгълүматны +7(843)236-42-93 кайнар линия телефоны аша белергә, дәресләр җәдвәле белән сылтама буенча танышырга мөмкин.

Исегезгә төшерәбез, актив шәһәрлеләр өчен «Яшәү яме» проекты 2016 елның 1 нче декабрендә старт алды. Һәр пенсионер яшәгән җиреннән ерак түгел урнашкан клубларда бушлай дәресләргә йөри ала. Проект «Актив озын гомерлелек» юнәлеше буенча «Россиянең сәламәт шәһәрләре» ассоциациясенең иң яхшы тәҗрибәләре конкурсында беренче урынны алды, «Демография» илкүләм проектының партнеры булды һәм стратегик инициативалар агентлыгының смартекасының иң яхшы тәҗрибәләре җыентыгына керде.

Коронавирус пандемиясе вакытында проект онлайн-форматта эшләде – проект катнашучылары өчен төрле элемтә каналлары оештырылды, ә пенсионерлар үзләренең мобиль һәм компьютер ликбезы буенча дәресләрдә алган осталыкларын актив кулландылар. 2021 елда 1 меңнән артык онлайн чара үткәрелде.