И.Метшин: «Казан – ул, беренче чиратта, кешеләр, нәкъ менә алар шәһәребез мохитен тудыра»

(Казан шәһәре KZN.RU, 30-нчы август, Камилә Гобәйдуллина). Казанда Республика көнен һәм Шәһәр көнен бәйрәм итү бүген Казан Ратушасында гадәттәгечә тантаналы җыелыштан башланды. Татарстан башкаласы Мэры Илсур Метшин Казан үсешенә һәм чәчәк атуына зур өлеш керткән кешеләргә, оешмаларга һәм предприятиеләргә шәһәр һәм республика бүләкләрен тапшырды.

Җыелучылар алдында чыгыш ясаганда, шәһәр башлыгы бүген залда Казанның мактаулы кешеләре, шәһәргә мәхәббәт берләштерә торган төрле һөнәр ияләре җыелганын билгеләп үтте. «Казан – ул барыннан да элек кешеләр. Нәкъ менә алар атмосфера тудыра, һәм безнең шәһәрдә ул үзенчәлекле, динамик, иҗади, милли җылы һәм искиткеч игелекле. Без гореф-гадәтләребезне зур җаваплылык белән саклыйбыз, мәдәниятне һәм милли тәңгәллекне хуплыйбыз. 115 милләт вәкиле бердәм һәм тату яшәгән, берсен-берсе хөрмәт һәм ихтирам итә торган шәһәрдә яшәү һәм эшләү зур горурлык», – диде ул.

Казан Туган телләр һәм Халыклар бердәмлеге елы кысаларында чаралар үткәрүгә җаваплы карады, дип ассызыклады Мэр. Казан Изге Ана иконасы соборын ачу христиан дөньясы өчен зур тарихи вакыйга булды, дип өстәде ул: «Без моңа 5 елдан артык бардык, җиңел булмады. Татарстан Республикасы Президенты Дәүләт Киңәшчесе Минтимер Шәймиевка, Татарстан Республикасы Президенты Рөстәм Миңнехановка һәм әлеге изге эштә катнашучыларга аерым рәхмәт сүзләрен җиткерәбез. Башлангыч рәвештә торгызылган гыйбадәтханә халыкның гыйбадәт кылу урынына әверелгән инде».

Казан иң төзек һәм уңайлы шәһәр позициясендә тора, моның өчен моңарчы күрелмәгән программалар кабул ителә, дип игътибар итте И.Метшин. Ул билгеләп үткәнчә, аларны гамәлгә ашыру һәм шәһәрнең социаль-әһәмиятле объектларын төзүнең югары темплары милли проектлар ярдәмендә мөмкин булды. Транспорт инфраструктурасы бик тиз үсә: шәһәрдә хәрәкәт логистикасы камилләштерелә, юллар төзелеше һәм ремонтлау темплары кимеми, шулай ук даими рәвештә күчмә составны яңарту эшләре алып барыла һәм индивидуаль мобильлек чаралары өчен шартлар тудырыла, дип сөйләде Мэр.

Шәһәрдә иҗтимагый киңлекләр актив үсә һәм ишегалды территорияләрен төзекләндерәләр. 2 ел эчендә «Безнең ишегалды» программасы буенча Казанда 800-дән артык ишегалды ремонтланды. Моннан тыш, шәһәрнең мәдәни үзәкләре яңа тормыш алды, ә бүген музыка һәм сәнгать мәктәпләре яңара. Яшүсмерләр һәм яшьләр клублары саны да арта, шәһәрдә лагерьларда ял итү өчен иң яхшы шартларның берсе булдырылды, дип искәртте шәһәр башлыгы.

«Казан – инновацияле технологияләр үсешендә лидер. Без халыкка хезмәт күрсәтү, муниципаль хезмәтләр күрсәтү һәм халык белән нәтиҗәле кире элемтә урнаштыру өчен цифрлаштыру нәтиҗәләрен уңышлы кулланабыз. Без тәҗрибәбез белән башка шәһәрләрдән, төбәкләрдән һәм хәтта илләрдән килгән коллегаларыбыз белән ачыктан-ачык уртаклашабыз. Мәгълүмат белән алмашабыз, территорияләр үсешенең иң яхшы тәҗрибәләрен тиражлыйбыз», – диде И.Метшин.

Казанда спортка аерым игътибар бирелә, шәһәр халкы сәламәт яшәү рәвешен сайлый, дип билгеләде Мэр. «Шәһәрнең һәр икенче кешесе актив спорт белән шөгыльләнә. Моңа спорт үзәкләренең, команда уеннары һәм шәхси шөгыльләр өчен мәйданчыкларның киң һәм уңайлы челтәре ярдәм итә. Киләсе елда Казан волейбол буенча дөнья чемпионатын кабул итәчәк», – дип, планнары белән уртаклашты ул. Моннан тыш, шәһәрдә үзенчәлекле ихтыяҗлары булган кешеләр өчен инклюзив аңлаешлы мохит булдырыла. Шулай итеп, Казанда Мөмкинлекләре чикләнгән балалар өчен балалар бакчасы ачылды, «Әкият» балалар үзәге базасында мөмкинлекләре чикләнгән балалар өчен ял итү үзәге һәм инклюзив спорт үзәге төзүгә әзерлек бара. Шәһәр 2022 елның гыйнварында Махсус Олимпиаданы кабул итәргә әзерләнә.

«Пандемия чоры шәһәр өчен гади генә булмады, әмма Казанның игелекле эшләр һәм кешеләр шәһәре икәнлеген күрсәтте. Безнең медиклар, үз-үзләрен аямыйча, профессиональлек һәм башкаларны коткару өчен көн саен сәламәтлекләрен куркыныч астына куярга әзер булуларын күрсәтеп, хезмәтләрен дәвам итте. Волонтерларга  шәфкать һәм кайгыртуга һәм ярдәмгә мохтаҗ һәркемгә күрсәткән ярдәмнәре өчен аерым рәхмәт сүзләре», – дип тәмамлады чыгышын И.Метшин.

Шуннан соң залга Казанның Мактаулы гражданнары китабын һәм Казанның Мактау китабын алып керделәр. Аларга бүген яңа исемнәр, шәһәр оешмаларының һәм предприятиеләренең исемнәре кертелде. Бүген Казанның Мактаулы гражданины исемен ТР Фәннәр академиясе әгъзасына, профессор, ТР Фәннәр академиясенең Г.Ибраһимов исемендәге Тел, әдәбият һәм сәнгать институтының лексикология һәм диалектология бүлеге баш фәнни хезмәткәре Мирфатыйх Зәкиевка һәм рапирачы, фехтование буенча халыкара класслы Россиянең спорт мастеры, Токиода Олимпия уеннары чемпионы Марта Мартьяновага тапшырдылар. Алар шәһәр Мэры кулыннан бүләкләр кабул итте.

Казанның Мактау китабына Идел буе дәүләт физик культура, спорт һәм туризм университеты ректоры вазыйфаларын башкаручы Рафис Борһанов исеме кертелде. Ул үзенең һөнәри юлы турында сөйләде һәм хуплаулары өчен рәхмәт белдерде. «Шәһәргә, Казан шәһәре Думасына, хезмәт юлыбыз башланганда ярдәм иткән укытучыларга, Казан халкына һәм, һичшиксез, Татарстан Президентына безгә бирелгән мөмкинлек өчен зур рәхмәт. Мэр җитәкчелегендә иҗат итә алуыбыз өчен рәхмәт. Казан республикабызның гына түгел, бөтен илебезнең горурлыгы, өченче башкаласы булды. Барыгызга да уңышлар һәм шәһәр үсешен телим», – диде Р.Борһанов.

Шулай ук Казанның Мактау китабына Казан шәһәр филармониясенең «Казан» бию ансамбле, Казанның «Ашыгыч медицина ярдәме станциясе» дәүләт автоном сәламәтлек саклау учреждениесе, «Эфир» телекомпаниясе һәм Татарстан Республикасы Дәүләт симфоник оркестры кертелде. «Рахманинов һәм Скрябин уйнаган, Шаляпин җырлаган залда шундый югары бүләк алу символик мәгънәгә ия. 11 ел элек, бирегә килгәч, мин бу хакта уйлап та карамадым. Бүген шундый искитмәле синергия аркасында Казан үзгәрә, мондый тарихның бер өлеше булу рәхәт. Монда утыручылар барысы да үз эшләрен эшләп кенә калмый, алар үзләре эшләгәнне үлеп ярата. Һәм бу күп яктан безнең тирәдәге хәлләргә йогынты ясый. Безнең оркестрыбыз өчен бу көн тарихи», – дип уртаклашты ТР Дәүләт симфоник оркестрының сәнгать җитәкчесе һәм баш дирижеры Александр Сладковский.

Моннан тыш, бүген Илсур Метшин республика һәм шәһәр бүләкләрен тапшырды. «Татарстан Республикасының атказанган артисты» дигән мактаулы исемгә «Әкият» Татар дәүләт курчак театры артисты Марс Гайфуллин, «Татарстан Республикасының атказанган табибы» исеменә 11-нче номерлы балалар поликлиникасы табиб-педиатры Гөлназ Азизова һәм 7-нче номерлы балалар поликлиникасының инвалид балалар өчен тернәкләндерү үзәге табиб-педиатры Фәүзия Богданова лаек булды. «ТР Атказанган торак-коммуналь хуҗалык хезмәткәре» исеме «Горводзеленхоз» эш хезмәткәре Гөлнара Гыймадиевага, «ТР атказанган мәдәният хезмәткәре» исеме – «Бәйрәм компаниясе» ҖЧҖ генераль директоры киңәшчесе Марина Малышевага, «ТРның атказанган укытучысы» – 2-нче номерлы лицей-интернатның туган тел һәм әдәбият укытучысы Рузия Кәримовага һәм 131-нче номерлы лицейның рус теле һәм әдәбияты укытучысы Марина Ленскаяга,  «ТРның атказанган химигы» –  «КВАРТ» Резина-техника буенча Кама-Идел акционерлык җәмгыятенең 617-нче номерлы цех токаре Наил Гаязиевка бирелде.

«Казан файдасына башкарган хезмәте һәм батырлыгы өчен» аерым хөрмәтләү билгесе белән И.Метшин шәһәрнең Торак-коммуналь хуҗалык комитеты рәисе урынбасары Сергей Сотовны, «Казан шәһәре файдасына башкарган мактауга лаеклы хезмәте өчен» мактау билгесе – «Радиоприбор» АҖ 1-нче номерлы слесарь-каркас цехының 5-нче разрядлы токаре Рәшит Кадыровны бүләкләде.

Казанның Мактау грамотасына «Казгражданпроект» институтының әйдәп баручы инженеры Лариса Ардатовская, Казан компрессор машина төзелеше заводының слесарь-ремонтчысы Василий Кандалин, Татарстан Республикасы фехтование федерациясе әгъзасы, 1-нче номерлы мәктәпнең физик культура укытучысы Елена Прохорова, «АваКазан» клиникасының акушер-гинекологы Никита Яковлев һәм «Туполев» ачык акционерлык җәмгыяте филиалы, С.П.Горбунов исемендәге Казан авиация заводының буяу-әзерләү цехының 5-нче разрядлы фрезеровщигы Шамил Юнысов лаек булдылар.

Казан вертолет заводының инженер-технологы Александр Кульбака, Казан дары заводының 23-нче номерлы цехының контроль-үлчәү приборлары һәм автоматикасы буенча слесаре Ольга Локутанская, «Кульсеитово торак массивы» ТИҮ рәисе Вера Глагольева һәм «Олимпиец» ТИҮ рәисе Роберт Латыйпов шәһәр Мэрының Рәхмәт хатын кабул иттеләр.

Мэрның волонтерлык эшчәнлеге өчен Рәхмәт хатын А.Гайдар исемендәге Казан яшьләр үзәгенең яшьләр белән эшләү буенча белгече. Алмаз Кашбиевка һәм Казан дәүләт архитектура-төзелеш университетының 2-нче курс студенты Ләйсән Кильмаковага тапшырдылар.

Видеорепортаж