Казан Мэры: «Безнең бурыч – һәр гаиләнең чын мәгънәсендә имин һәм уңайлы тормышын булдыру»

(Казан шәһәре KZN.RU, 30-нчы август). Казан Мэры Илсур Метшин шәһәр халкын Татарстан Республикасы көне һәм Казан шәһәре көне белән котлады.

«Хөрмәтле казанлылар! Сезне чын күңелдән Татарстан Республикасы көне һәм Казан шәһәре көне белән котлыйм!

1990 елның 30-нчы августында безнең республика тарихында яңа сәхифә ачылды, һәм бүген Татарстан – табигый ресурслар һәм уникаль мәдәни мирас, толерантлык һәм халыклар дуслыгы, ачыклыгы һәм кунакчыллыгы белән дан тоткан алга киткән төбәк.

Гүзәл Казан – безнең яраткан башкалабыз – беркемне дә битараф калдырмый. Аның уңышлары – шәһәр халкының туган шәһәрен тагын да матуррак һәм уңайлырак итү өчен бөтен көчен куйган күп буыннарының хезмәте. Елдан-ел Казан яңа торак кварталлар һәм юллар, заманча мәктәпләр һәм балалар бакчалары, бик яхшы спорт объектлары һәм җәмәгать урыннары белән үсә. Шәһәрнең тормышы мөһим вакыйгалар һәм игелекле гамәлләр белән тулган.

Казанлыларның төп җиңүләре алда әле, дип ышанам. Безнең беренчел бурычыбыз – төзек шәһәр данын саклап калу һәм арттыру, һәр гаиләнең чын мәгънәсендә имин һәм уңайлы тормышын булдыру.

Бу матур көндә сезгә чын күңелдән ныклы сәламәтлек, бәхет, күңел күтәренкелеге һәм үзара аңлашу телим! Йортларыгызда тынычлык һәм иминлек булсын!» – диелә котлауда.