Илсур Метшин Казан шәһәр Думасының VIII сессиясендә дәүләт һәм шәһәр бүләкләрен тапшырды

(Казан шәһәре KZN.RU, 16-нчы август, Ксения Швецова). Бүген дүртенче чакырылыш Казан шәһәре Думасының VIII сессиясе утырышында Илсур Метшин Татарстан башкаласы үсешенә зур өлеш керткән казанлыларга бүләкләр тапшырды.

Күпьеллык нәтиҗәле хезмәте һәм һөнәри эшчәнлектәге казанышлары өчен «Фидакарь хезмәт өчен» медален Вахитов һәм Идел буе районнары администрациясенең оештыру һәм кадрлар эше бүлеге башлыгы урынбасары Лариса Белобородовага тапшырдылар. Шулай ук «Фидакарь хезмәт өчен» медале белән «Шәһәрне төзекләндерү» муниципаль унитар предприятиесе директоры Камил Закиров та бүләкләнде.

Массакүләм мәгълүмат чараларын үстерүдәге казанышлары һәм намуслы хезмәте өчен «Татарстан Республикасының атказанган матбугат һәм массакүләм коммуникацияләр хезмәткәре» дигән мактаулы исем Казан шәһәре Думасы аппаратының мәгълүмат-аналитика идарәсе башлыгы Владимир Казанцевка бирелде.

Физик культура һәм спортны үстерүгә керткән өлеше һәм күпьеллык нәтиҗәле хезмәте өчен «ТР Атказанган физик культура хезмәткәре» дигән мактаулы исем Казан Башкарма комитетының Физик культура һәм спорт комитетының укыту-спорт бүлеге башлыгы Наталья Князевага тапшырылды.

Һөнәри эшчәнлектәге казанышлары һәм канунлыкны ныгытуга өлеш кертүе өчен «Татарстан Республикасының атказанган юристы» исемен Казанның архитектура һәм шәһәр төзелеше идарәсе башлыгы урынбасары – юридик бүлек башлыгы Анастасия Латыйповага бирделәр.

ТР Президентының Рәхмәте Казанның контроль-хисап палатасы рәисе Илнар Нургалиевка игълан ителде. Шулай ук намуслы хезмәтләре һәм һөнәри эшчәнлектәге казанышлары өчен Татарстан Республикасы Президенты Рәхмәте Казан шәһәре Думасы аппаратының баш эксперты Татьяна Прокофьевага игълан ителде.

«Казан шәһәре файдасына башкарган фидакарь хезмәте өчен» дигән хөрмәтләү билгесен Мэр «Ремонтстройсервис» ҖЧҖ генераль директоры Миннегәрәй Насыйбуллинга тапшырды. Шулай ук медаль белән Казан Башкарма комитеты Аппаратының Муниципаль сатып алулар өлкәсендә контроль һәм эчке муниципаль финанс контроле бүлеге консультанты Әлфия Шәйхетдинованы да бүләкләделәр.

Казанның Мактау грамотасын «Татарстан Республикасы Сәламәтлек саклау министрлыгының Республика клиник хастаханәсе»  дәүләт автоном сәламәтлек саклау учреждениесе шәфкать туташы-анестезисты Лилия Сальмановага тапшырдылар.

Күпьеллык намуслы хезмәте һәм Казанның мәгълүмат технологияләрен һәм элемтәсен үстерүгә керткән өлеше өчен шәһәр Мэрының Рәхмәте Башкарма комитетның Мәгълүмати технологияләр һәм элемтә идарәсенең мәгълүмат һәм телекоммуникация системаларын озата бару бүлеге башлыгы Дмитрий Филянинга игълан ителде. Намуслы хезмәтләре һәм территориаль үзидарәләрне үстерүгә керткән өлешләре өчен «Восточный» территориаль иҗтимагый үзидарә рәисе Дамир Имангулов һәм «Брикетный» территориаль иҗтимагый үзидарә рәисе Нина Хөснетдинова бүләкләнде.