И.Метшин: «Пандемия бизнес-бергәлек белән эшләүнең никадәр мөһим булуын күрсәтте»

(Казан шәһәре KZN.RU, 23-нче апрель, Екатерина Виславская).  Бүген Казан Мэры Илсур Метшин «Нәтиҗәле торгызу нигезе буларак дәүләт-хосусый партнерлыгы» V Халыкара форумында чыгыш ясады. Ул Татарстан башкаласында дәүләт-хосусый партнерлык кысаларында тормышка ашырылган проектлар һәм үзизоляцияләү чорында бизнес-бергәлекнең шәһәр проектларына ничек актив ярдәм итүе турында сөйләде.

БМО Европа икътисади комиссиясе һәм дәүләт-хосусый партнерлык өлкәсендә халыкара алдынгы тәҗрибә үзәге оештырган Форум 22-26-нчы апрельдә Женевада уза. Анда Евразия икътисади берлеге һәм башка оешмалар вәкилләре, мэрлар һәм дөньяның алдынгы илләреннән хакимиятнең җирле органнары җитәкчеләре катнаша.

Түгәрәк өстәлләрдә һәм тематик сессияләрдә кешеләргә юнәлтелгән дәүләт-хосусый партнерлыкның әһәмияте, җәмгыятьләрнең тотрыклылыгын арттыру максатыннан җирле хакимият органнарының хокукларын һәм мөмкинлекләрен киңәйтү, «Булганга караганда яхшырак төзү» инфраструктура өлкәсендәге конкурс йомгаклары һәм башка мәсьәләләр турында фикер алышалар.

Илсур Метшин башка илләрдәге коллегаларына онлайн-режимда кушылды. Ул «Общиналарның тотрыклылыгын арттыру максатларында җирле хакимият органнарының хокукларын һәм мөмкинлекләрен киңәйтү» сессиясе кысасында түгәрәк өстәлдә катнашты.

«Беркемгә дә сер түгел, COVID-19 пандемиясе үз артыннан тирән социаль-икътисадый кризис китереп чыгарды. Тотрыклы үсеш максатлары нигезендә инде гамәлдә булган стратегияләргә төзәтмәләр кертү кирәклеге көн кебек ачык иде. Шәһәр үсеше стратегияләрен һәм программаларын эшләүдә җәмгыятьнең роле беренче чиратта булды һәм шулай булып кала да, «иң беренче чиратта кешеләр» принцибы безнең эштә нигез булып тора, – диде Казан Мэры. - Югалган әйберне яңадан торгызу гына түгел, дөньяны элеккегегә караганда яхшырак итү өчен, тулы кыйммәтле глобаль йөкләнеш кирәк, сәяси даирәләр дәүләт, хосусый сектор һәм тулаем җәмгыять белән килешүгә киләчәк».

Шәһәр башлыгы билгеләп үткәнчә, мондый шартнамә ролендә чыгыш ясаучы дәүләт-хосусый партнерлык һәрвакыт дәүләт сәясәтенең социаль яклауны тәэмин итүче һәм җәмгыятьнең тормыш тотрыклылыгын, һәм аның социаль, икътисадый һәм экологик вакыйгаларга каршы торырга әзер булуын тәэмин итүче төп инструментларының берсе булып тора.

Казан территориясендә дәүләт-хосусый партнерлык проектларын тормышка ашыруның төп формасы булып концессия тора, ул милек хокукын һәм муниципаль объектларны контрольдә тотарга мөмкинлек бирә. Концессия килешүләре кысаларында шәһәрдә амбулатор кан гемодиализының районара үзәге булдырылды, каты көнкүреш калдыклары полигоны реконструкцияләнде, саклау дамбасы реконструкцияләнде һәм яңартылды. Моннан тыш, дәүләт-хосусый партнерлык проектларының бассейннар төзү буенча проектлары бар. Дәүләт-хосусый партнерлык ярдәмендә Казан мәгариф өлкәсендәге социаль проблемаларны хәл итүгә зур адым ясады – хосусый балалар бакчалары төзегәндә муниципаль милектән түләүсез файдалану хокукы гамәлгә ашырылды.

Хәзерге вакытта Казан 10 ел элек Мәскәүдә инфраструктура проектлары белән кризиска каршы идарә итү программасы буенча оештырылган Дәүләт-хосусый партнерлык милли үзәге белән актив хезмәттәшлек итә. Шулай ук Мэрия вәкилләре даими рәвештә дәүләт һәм хосусый секторның үзара хезмәттәшлеге өлкәсендәге проектларны гамәлгә ашыру буенча укулар уза.

«Узган ел тәҗрибәсе чираттагы тапкыр җирле хакимият барлыкка килә торган кризислар белән алдынгы көрәштә булуын күрсәтте. Карарларыбызның оперативлыгына һәм уйланган булуына кешеләр тормышы, аларның иминлеге һәм муллыгы аз бәйле түгел, – дип ассызыклады Казан Мэры. – Бүген без беләбез: пандемия белән бәйле рәвештә кабул ителгән, гражданнарның аеруча зыян күргән категорияләренә ярдәм итүгә юнәлдерелгән чаралар адекват һәм үз вакытында булды».

Шулай итеп, өлкән яшьтәге гражданнарга азык-төлек продуктларын һәм кирәкле медикаментларны китерү белән ярдәм иткән волонтерларның шәһәр штабы булдырылды. Пандемия чорында транспорт медицина учреждениеләренең барлык хезмәткәрләре һәм волонтерлар өчен бушлай булды. Моннан тыш, бизнеска ярдәм итүнең кайбер муниципаль чаралары кабул ителде, алар арасында аренда түләүләрен кичектереп тору яки түләүдән азат итү, ташламалы кредит бирү программасы кысаларында финанс ярдәме күрсәтү, предприятиеләргә һәм оешмаларга яңа коронавирус йогышын булдырмау һәм пандемия вакытында профилактика чаралары турында даими мәгълүмат бирү.

«Без һәрвакыт бизнес-бергәлек, аларның инициативалары, идеяләре һәм проектлары белән диалогка ачык булдык, ләкин нәкъ менә пандемия һәм аның нәтиҗәләре уртак максатларга ирешүдә көчләрне берләштерү һәм хезмәттәшлек никадәр мөһим булуын күрсәтте, – дип билгеләде Илсур Метшин. – Бизнес-бергәлек үзизоляцияләү чорында читтә калмады, ә актив рәвештә шәһәр проектларында катнашты, һәрьяклап ярдәм күрсәтте».

Агымдагы вәзгыять моңа кадәр беркайчан да булмаганча тотрыклы үсеш максатларын гамәлгә ашыруның дөньядагы иң яхшы практикаларын тиражлауның гаять мөһим булуын күрсәтте, һәм Казан хакимияте бөтен дөньяда тотрыклылыкны саклап калу өчен җирле хакимият куйган тырышлыклар белән теләктәш, дип билгеләде. «Ышанам, үсешнең нәтиҗәле заманча моделен бергә эшләп кенә, без шәһәрләрне барлыкка килә торган кризисларга тотрыклырак итәчәкбез. Игътибар үзәгендә кеше тормышы инфраструктурасының төп өлешләре булырга тиеш: гомуми социаль яклау, сәламәтлек саклауның ышанычлы системасы, шулай ук лаеклы эш урыннары. Шуңа бәйле рәвештә, «иң беренче кешеләр» принцибына нигезләнгән дәүләти-хосусый партнерлык тотрыклы үсешнең төп инструментларының берсе булырга тиеш», – диде Казан Мэры үз докладын тәмамлап.