Илсур Метшин Германиянең Казандагы Мактаулы консулы Арно Шайер белән очрашты

(Казан шәһәре KZN.RU, 20-нче ноябрь). Казан Мэры Илсур Метшин Германия Федератив Республикасының Казандагы Мактаулы консулы Арно Шайер белән очрашты. Шәһәр Ратушасында алар хезмәттәшлек мәсьәләләре турында фикер алыштылар.

Илсур Метшин билгеләгәнчә, Казан белән Германия арасында ныклы элемтәләр урнаштырылган. «Сезнең бизнес вәкилләре - безнең күптәнге, сыналган һәм ышанычлы партнерларыбыз. Бүгенге кыенлыкларга карамастан, без рәхәтләнеп хезмәттәшлек итәбез һәм бергәләп барлык кыенлыкларны да җиңеп чыгабыз. «Татнефть», «ТАИФ», «Казаньоргсинтез», «Нижнекамскнефтехим» кебек алдынгы компанияләрдә немец партнерлары белән уртак эш җайга салынган. Энергетика өлкәсендә җиһазлар белән тәэмин итүчеләребез булып Германия партнерлары тора. Без моның белән горурланабыз», - диде шәһәр башлыгы.

Татарстан башкаласы белән Германия арасында актив икеяклы хезмәттәшлек тыгыз дуслык мөнәсәбәтләрен үстерүгә һәм ике якны да уртак чараларга җәлеп итүгә юнәлтелгән. Моннан тыш, немец Брауншвейгы Казанның тугандаш шәһәре булып тора.

Рәсми дуслык мөнәсәбәтләре урнаштыру турындагы килешү 1988 елның 7-нче августында Казанда имзаланган. Брауншвейгтан рәсми делегациядән тыш, бу вакытта Татарстан башкаласында Вильгельм Бракке исемендәге мәктәптән бер төркем балалар катнашты. Бу Германия Федератив Республикасы һәм Советлар Союзы арасында укучылар белән беренче алмашу булды.

30 ел хезмәттәшлек итәү дәверенндә 12-дән артык программа имзаланды һәм гамәлгә ашырылды. Аларның барысы да партнерлык мөнәсәбәтләрен ныгытуга һәм үстерүгә юнәлдерелгән иде. Шәһәр җитәкчеләре башланган эшләрнең дәвамчанлыгын сакладылар, барлык шартнамәләрне үтәделәр һәм мөнәсәбәтләрне үстерү һәм ныгыту өчен барысын да эшләделәр.

2018 елның октябрендә Брауншвейгның төп урамында урнашкан Мэрия бинасы каршында Казан гербы төшерелгән бронза плитә пәйда булды. Аны Казан белән Брауншвейг арасында тугандаш мөнәсәбәтләр турындагы килешүне имзалауга 30 ел тулуны бәйрәм итү уңаеннан урнаштырдылар. 

Очрашуда Казан муниципаль берәмлеге башлыгы урынбасары Евгения Лодвигова катнашты.