И.Метшин: «Бәхеткә, хезмәт базарының юкка чыгуы күзәтелми»

(Казан шәһәре KZN.RU, 20-нче апрель, Алена Мирошниченко). Бүгенге көндә Казанның мәшгульлек үзәгендә эшсезләр сыйфатында 5218 кеше теркәлгән. Апрель башыннан үсеш 1260 кеше тәшкил иткән. Бүген «Казан халкын эш белән тәэмин итү үзәге» дәүләт казна учреждениесе директоры вазыйфаларын башкаручы Гөлнара Филиппова коронавирус инфекциясе таралуга каршы тору буенча штаб утырышында билгеләп үткәнчә, хәзерге вакытта эшсезлек күрсәткечләре фараз күрсәткечләренә туры килә.

Эшсезләрнең күбесе Совет (1131 кеше), Яңа Савин (1125 кеше) һәм Идел буе (919 кеше) районнарында теркәлгән. Теркәлгән эшсезлек дәрәҗәсе эшче көчләр санының 0,81%-ын тәшкил итте.

Шәһәрдә тәкъдим ителгән вакансияләргә килгәндә, 20-нче апрельгә аларның саны якынча 15 мең тәшкил итә.

Г.Филиппова искәрткәнчә, 30-нчы марттан халыкны эш белән тәэмин итү үзәкләрендә гражданнарны шәхси кабул итү туктатылган, хезмәткәрләр дистанцион хезмәт күрсәтүгә күчкән. Татарстанда эшсез гражданнарны теркәү өчен вакытлы кагыйдәләр гамәлдә. РФ Хөкүмәтенең карары нигезендә, нинди дә булса сәбәпләр аркасында эшсез калучылар тәүлек буе  «Россиядә - эш» порталы аша эшсез сыйфатында теркәлүгә гариза бирә ала. «9-нчы апрельдән башлап әлеге портал аша Казанда яшәүче гражданнардан 10 мең гариза килгән. Шулай итеп, апрель башыннан 11,5 мең гариза кабул ителде, алар шул ук көнне карала», - диде спикер.

Моннан тыш, 1-нче марттан эштән азат ителгән һәм эшсез дип танылган гражданнарга (хезмәт дисциплинасын бозган яки башка гаепле гамәлләр кылган өчен эштән чыгарылган кешеләрдән тыш) апрель, май һәм июнь айларында эшсезлек буенча пособие 12 мең 130 сум күләмендә билгеләнә. 18 яшькә кадәрге балалары булган гражданнарның апрель, май һәм июнь айларында эшсезлек буенча пособие күләме балалар санына пропорциональ рәвештә арттырылачак. Исәп ата-аналарның берсенә, тәрбиягә алган ата-аналарга яки уллыкка алучыларга 3 мең сум схема буенча башкарылачак.

«Бәхеткә, бүгенге көндә хезмәт базарының юкка чыгуын күзәтмибез», - дип йомгаклады Казан Мэры Илсур Метшин.

Узган атнада шәһәр башлыгы «Казанькомпрессормаш» ачык акционерлык җәмгыятендә булды, анда хәзер 1680 кеше эшли, гәрчә штат расписаниесе буенча 1870 кадр таләп ителсә дә. «Бу һәр предприятиедә вакансияләр булуы турында сөйли. Әмма хәзер теге яки бу сәбәп аркасында бизнестан, кече һәм урта предприятиеләрдән төшеп калучылар барлыкка киләчәк. Шуңа күрә аларны исәпкә кую мәсьәләсен эшләү бик мөһим», - дип ассызыклады И.Метшин.

Ул Казан Башкарма комитеты җитәкчесе урынбасары Илдар Шакировка эшсезләрне исәпкә кую кыска вакыт эчендә узуын, инстанцияләргә йөрүдән баш тартуын, ә барлыкка килгән мәсьәләләр дистанцион режимда хәл ителүен контрольдә тотарга кушты. Шәһәр Мэры сүзләренчә, шулай ук Пенсия фонды белән мәгълүматлар алу өлешендә үзара хезмәттәшлек алгоритмын эшләү мөһим.

Илсур Метшин искәрткәнчә, тиздән паркларны һәм скверларны төзекләндерү эшләре башланачак. «Эшләрен яки хезмәт хакы чыганагын югалткан кешеләрне җәмәгать эшләренә җәлеп итәчәкбез, дигән идек, - диде шәһәр башлыгы һәм Казан Башкарма комитеты җитәкчесе урынбасары - Тышкы төзекләндерү комитеты рәисе Игорь Куляжевка бу эшне оештыру буенча тәкъдимнәр әзерләргә кушты.