Илсур Метшин Киров һәм Мәскәү районнары администрациясендә дәүләт хезмәтләрен күрсәтү буенча экспресс-офисны карап кайтты

(Казан шәһәре KZN.RU, 25-нче февраль). Казанның Киров һәм Мәскәү районнары администрациясендә дәүләт һәм муниципаль хезмәтләр күрсәтү буенча экспресс-офис булдырылды - гражданнарны кабул итү өчен бердәм киңлек бинаның беренче катында оештырылган. Биредә көн саен район халкына 50 административ, коммуналь һәм социаль хезмәт күрсәтелә. Казан Мэры Илсур Метшин яңа экспресс-офис эшен югары бәяләде һәм шәһәр халкына хезмәт күрсәтү процессын максималь рәвештә оптимальләштерергә кирәклеген билгеләп үтте.

Өч ел элек хакимияттә халык белән эшләү алымын үзгәртү буенча беренче адым ясадылар. Ул вакытта бинада ресепшн дип атала торган кунакчыллык зонасы барлыкка килде, анда халык консультацияләр ала, сораулар бирә, белгечкә кабул итүгә языла алды, дип искә төшерде Мэрга Киров һәм Мәскәү районнары администрациясе башлыгы Сергей Миронов. «Бу безгә кешеләр агымын үткәрергә, чиратны киметергә мөмкинлек бирде. Халык хезмәтләр турында тиз арада мәгълүмат ала башлады, – диде ул. – Шулай да шәһәрлеләргә башка кабинетларга мөстәкыйль йөрергә, икенче, өченче, дүртенче катларга менәргә туры килде. Бүгенге көндә аларда мондый ихтыяҗ юк». С.Миронов аңлатканча, хезмәт күрсәтүне шәһәрлеләр өчен максималь уңайлы итәргә карар кылганнар һәм бердәм экспресс-офис булдырганнар, анда яшәүчеләр административ, коммуналь һәм социаль хезмәтләр комплексын ала алалар.

«Без киңлекне үзгәртеп кордык, документларны кабул итү һәм бирү өчен дүрт зона оештырдык, – дип сөйләде администрация башлыгы. - Халык безгә килә, талон буенча электрон чиратка баса, алар өчен уңайлы көтү залы бар. Чират җиткәч, алар белгечкә кабул итүгә эләгә һәм үз сорауларын тиз арада хәл итә алалар».

Шәһәрлеләргә ориентлашу уңайлы булсын өчен, алар өчен теге яки бу хезмәт күрсәтү өчен кирәкле документлар исемлеге белән махсус чек-листлар булдырдык.

Мэр төзелгән офисның ни дәрәҗәдә нәтиҗәле эшләве һәм шәһәр халкының аны ничек бәяләве белән кызыксынды. С.Миронов сүзләренә караганда, килүчеләрдән кире элемтәне контрольдә тоту һәм даими мониторинг үткәрү хезмәт күрсәтүне камилләштерү өстендә эшләргә мөмкинлек бирә. Ә хезмәт күрсәтү өчен документлар кабул итә торган барлык хезмәткәрләр дә махсус әзерлек уздылар - алар барысы да уртак тел таба белергә, кешеләргә игътибарлы булырга, килүчеләргә карата стресска чыдам һәм лояль булырга тиеш.

Комплекслы якын килү дәүләт һәм муниципаль хезмәтләр күрсәтү процессын шактый гадиләштерә һәм хезмәткәрләрдән югары профессиональлек таләп итә, дип билгеләде И.Метшин. «Яңа алымнарны гамәлгә кертү, бу юнәлештә инновацион проектларны гамәлгә ашыру кабинетлар буенча чиксез йөрүне киметергә генә түгел, урында хәл итәргә дә мөмкинлек бирә. Бу шәһәрлеләргә вакытларын янга калдырырга, үз мәсьәләләрен тиз һәм артык проблемаларсыз хәл итәргә мөмкинлек бирә», - диде Мэр.

Шәһәр башлыгы бүген Казанда хезмәтләрне оптимальләштерү һәм аларны электрон рәвешкә күчерү буенча масштаблы эш алып барылуын искә төшерде. Әйтик, агымдагы ел башыннан шәһәр халкына цифрлы форматта 47 муниципаль хезмәт күрсәтелә - бу шәһәр Башкарма комитетына мөрәҗәгать итүчеләрнең барлык мөрәҗәгатьләренең 78%-ы.

И.Метшин оештырылган экспресс-офисны югары бәяләде һәм мондый тәҗрибәне башка муниципаль структураларга да үстерергә һәм таратырга кирәклеген билгеләп үтте.

Чарада Башкарма комитет җитәкчесе Денис Калинкин, Башкарма комитет җитәкчесе урынбасары Радик Шәфигуллин, Башкарма комитет Аппараты җитәкчесе Евгений Варакин һәм башкалар катнашты.