Илсур Метшин «Алтын алка»ның шәһәр этабын ачу тантанасында «яшелләр» өчен чыгыш ясады

(Казан шәһәре KZN.RU, 5-нче февраль, Алинә Бережная). Бүген Казанның «Черек күл» паркында А.Тарасов исемендәге «Алтын алка» бөтенроссия ярышларының шәһәр этабы старт алды. Турнир командаларның дустанә матчы белән ачылды, алар составына спорт мәктәпләре һәм ишегалды клубларында тәрбияләнүчеләр белән бергә Казан Мэры Илсур Метшин, Казан Башкарма комитеты җитәкчесенең беренче урынбасары Рөстәм Гафаров, район администрацияләре башлыклары һәм танылган спортчылар керде.

Уен алдыннан шәһәр башлыгы яшь спортчыларны турнир башлану белән котлады. Ул билгеләп үткәнчә, быел турнирда 91 команда составында 1820 кеше катнаша. «Алтын алка» финалы – балалар, аларның әти-әниләре, тренерлар, шулай ук барлык хоккей сөючеләр өчен көтеп алынган вакыйга, - дип мөрәҗәгать итте турнирда катнашучыларга И.Метшин. - Кышын хоккей һәрвакыт популяр спорт төрләренең берсе булып тора, һәм без яшь спортчыларга шартлар тудыра алуыбызга шатбыз. Балаларның тимераякка басуын, кулларына кәшәкәләр алып, бозга чыгуларын күрү күңелле».

Быел 8-23 гыйнварда узган беренче этапның район уеннары нәтиҗәләре буенча финалга «Ишегалды спорты» дивизионының 24 командасы һәм «Спорт» дивизионының 7 командасы чыкты. Финал уеннары нәтиҗәләре буенча өч яшь төркемендә иң көчле командалар билгеләнәчәк. Бу командалар «Алтын алка» республика турнирында Казан данын яклаячак. Турнирның шәһәр этабы 17-нче февральгә кадәр дәвам итәчәк.

«Матч алдыннан дулкынланам, чөнки бу җиңү өчен бик җаваплы турнир, команданың аерылгысыз бер өлеше булырга, ихтыяр көченә һәм тырышлыкка ия булырга кирәк», - дип уртаклашты «Беркет» командасы уенчысы Лев Сапаров.

Казан хоккее легендасы, Урицкий исемендәге спорт клубының күп еллар капитаны булып торган һәм клуб тарихында иң яхшы бомбардир Сергей Столбун турнирда катнашучыларга гадел һәм матур уен теләде. «Бүгенге яшьләр арасында хоккейның зур популярлык казануына мин бик шат. Әлеге искиткеч турнирда катнашучылар саны да елдан-ел артсын иде. Мин уенчыларга матур уен телим», – диде С.Столбун.

Шуннан соң легендар хоккейчы Казан Мэры Илсур Метшин һәм 69-нчы номерлы мәктәп командасы һәм «Волна»ның капитаннары Вячеслав Гаранин белән Денис Зыбин бергә символик рәвештә алка ташладылар.

Ачылу тантанасында бозда «яшел» һәм «ак» командалары уенчылары кәшәкәләрен куйды. Беренчесенә Казан Мэры Илсур Метшин, Казан Башкарма комитеты җитәкчесенең беренче урынбасары Рөстәм Гафаров, Киров һәм Мәскәү районнары администрациясе башлыгы Сергей Миронов, «Ак Барс» хоккей клубы генераль менеджеры Рафыйк Якубов керде. Вахитов һәм Идел буе районнары администрациясе башлыгы Андрей Лобов, Совет районы администрациясе башлыгы Роман Фәтхетдинов һәм Казанның «Иске шәһәр» префектурасы башлыгы Роберт Гарипов аларның көндәшләре булды.

Беренче период тигез исәпкә 1:1 белән тәмамланды. Икенче периодта кискен көрәш барды, командалар бөтен көчләрен куеп көрәште. Уенның 22-нче минутында голны Илсур Метшин кертте. «Ак» командасында көндәшләр капкасына «Волна» командасы уенчысы Денис Елин алка кертте. Матч «яшелләр» файдасына 3:2 исәбе белән тәмамланды.

Исегезгә төшерәбез, «Алтын алка» турниры 1964 елның 8-нче декабреннән үткәрелә, аңа танылган тренер Анатолий Тарасов нигез сала. 1964-1965 елларда кышкы сезонда үткәрелгән турнирның беренче ярышларында 57 команда катнашты. Турнир уеннарында үз вакытында танылган хоккейчылар Владислав Третьяк, Александр Мальцев, Владимир Мышкин, Владимир Крутов, Вячеслав Фетисов катнашты.