Владимир Путин: «Гражданнарның ил эшенә кушылуы дәүләт уңышларын билгели»

(Казан шәһәре KZN.RU, 20-нче февраль, Ксения Швецова). Милли үсеш проектларын гамәлгә ашыру нәтиҗәләре илнең һәр субъектында һәм һәр муниципалитетында күренергә тиеш. Бу хакта бүген Россия Президенты Владимир Путин Гостиный дворда узган Федераль Җыенга еллык юлламасында белдерде. Ул балалар санына бәйле рәвештә гаиләгә салым йөкләнешен киметергә тәкъдим итте, регионнарны балалар бакчаларының һәркем файдалана алырлык булуын тәэмин итәргә өндәде һәм «ипотека каникуллары» кертергә тәкъдим итте. Президент сүзе 1,5 сәгатькә якын барды.

Чакырылган кунаклар арасында Федерация Советы әгъзалары, Дәүләт Думасы депутатлары, Хөкүмәт әгъзалары, Конституция, Югары һәм Арбитраж судлар җитәкчеләре, губернаторлар корпусы, Федерация субъектларының закон чыгару җыеннары рәисләре, традицион конфессияләр башлыклары, җәмәгать эшлеклеләре, шул исәптән төбәкләрнең иҗтимагый палаталары башлыклары, эре массакүләм мәгълүмат чаралары җитәкчеләре бар иде. Чарада Республика Президенты Рөстәм Миңнеханов һәм Казан Мэры Илсур Метшин катнашты.

«Әгәр кемдер намуссыз эшләүне өстен күрә икән, иң яхшысы - китү»

Юллама эчке социаль һәм икътисади үсеш мәсьәләләрендә тупланган. РФ Президенты май указында куелган бурычларга аерым игътибар бирде. Аларның эчтәлеге һәм ориентирлары гражданнарның ихтыяҗларын һәм көтүләрен чагылдыра, дип ассызыклады В. Путин. «Бу бурычлар безнең яктан зур тырышлык таләп итә, ләкин алар дөнья масштабына һәм үзгәреш тизлегенә җавап бирә. Әгәр кемдер намуссыз, тырышмыйча, инициативалар күрсәтмичә эшләүне өстен күрә,  һәм җаваплылыктан качарга тели икән, иң яхшысы - китәргә. Мондый кәефләр белән снарядка якын килмәскә кирәк», - диде Президент.

"Куелган максатларга ирешүдә илнең барлык төбәкләрендә дә гамәлгә ашырылырга тиешле милли проектлар аерым роль уйный", - дип билгеләп үтте В. Путин. "Ассызыклап һәм кабатлап әйтәсем килә: безнең үсеш проектлары – федераль түгел һәм бигрәк тә ведомствода булмаган. Алар нәкъ менә милли. Аларның нәтиҗәләре Федерациянең һәр субъектында, һәр муниципалитетта күренергә тиеш. Биредә, «җирдә», конкрет бурычларның төп массивы тормышка ашырыла», - дип ассызыклады ул.

Исегезгә төшерәбез, милли проектларның берсе – «Торак һәм шәһәр мохите»- узган атнада Владимир Путин катнашында Казанда фикер алыштылар. Бу очрашу илнең төп үсеш юнәлешләре буенча хәрәкәтен тәэмин итәргә тиешле илкүләм проектлар буенча фикер алышу сериясендә беренче булды.

«Гражданнарның фикере, бәяләре нигезендә киләсе ел башында милли проектлар буенча эшнең беренче нәтиҗәләрен чыгарачакбыз. Һәм башкарма хакимиятнең барлык дәрәҗәдәге эш сыйфаты һәм нәтиҗәләре турында тиешле нәтиҗәләр ясыйбыз», - дип билгеләп үтте РФ Президенты.

"Ипотека каникуллары» керем югалганда торакны саклап калырга ярдәм итәчәк

Бүген Россиядә ипотека һәм кулланучылар кредитлары саны арта. Шәһәр халкына ярдәм итү өчен РФ Президенты өстәмә закон гарантияләрен кертергә тәкъдим итте. "Тормышта төрле хәл булырга мөмкин: эшне югалту да, авыр авыру да. Һәм бу ситуациядә кешене тупикка кертү – соңгы эш, хәтта икътисади күзлектән дә мәгънәсез», - дип ассызыклады В. Путин һәм төрле сәбәпләр аркасында торак өчен кредит түләү вакытында керемнән мәхрүм калган гражданнар өчен «ипотека каникуллары» кертергә тәкъдим итте.

"Без күптән түгел Казанда бу хакта сөйләштек, - дип искәртте РФ Президенты. - Кешеләргә үзләренең бердәнбер торагын саклап калу мөмкинлеге бирергә, ә кредитны соңрак кайтарырга кирәк».

В. Путин финанс оешмаларына зыян китермичә, авыр хәлгә эләккән кешеләргә ярдәм итү өчен яңа ярдәмне гамәлгә ашыру механизмын уйларга кушты.

Ипотеканы түләгәндә аерым ярдәм чараларын балалы гаиләләр өчен күздә тоту планлаштырыла. Узган елдан башлап икенче яки аннан соңгы бала туган гаиләләр өчен 6% ташламалы ипотека программасы эшли, дип искәртте РФ Президенты һәм бүгенге көндә ташламадан нибары 4,5 мең гаилә файдалануын билгеләп үтте.

"Ипотека кредиты гамәлдә булган бөтен вакытка ташлама билгеләргә тәкъдим итәм", - диде В. Путин, хәзер ставка беренче 3 яки 5 елга гына субсидияләнә һәм бу гаиләләргә ташламадан файдаланырга комачаулавын искәртте.

Шулай ук дәүләт башлыгы күп балалы гаиләләр өчен күчемсез мөлкәткә салым буенча федераль ташламаны арттырырга, һәр бала исәбеннән фатирда 5 квадрат метр һәм шәхси йортта 7 квадрат метр салымнан өстәмә рәвештә азат итүне тәкъдим итте. "Принцип бик гади булырга тиеш: балалар күбрәк-салым азрак», - диде Президент. Әлеге ташлама пенсия яшенә җитмәгән гражданнар өчен дә каралган, дип өстәде В. Путин.

"2021 ел ахырына кадәр ясләләр проблемасын тулысынча хәл итәргә кирәк»

Россиядә катлаулы демографик чор башланды, әмма 2023-2024 еллар чигендә халыкның табигый үсешен яңадан торгызуга ирешү планлаштырыла. Моның өчен күп балалы гаиләләргә ярдәм итү буенча төрле программаларны тормышка ашыру планлаштырылган. Аларны гамәлгә ашыру белән беррәттән, барлык төбәкләр өчен дә диярлек актуаль булган ясләләр җитмәү проблемасын хәл итәргә кирәк, дип билгеләп үтте В. Путин. Ул искәрткәнчә, бүгенге көндә 3 яшьтән өлкәнрәк балалар өчен бөтен җирдә диярлек балалар бакчалары тәэмин ителгән.

2021 елга кадәр ясләләр проблемасын тулысынча хәл итәргә, аларда дәүләтнеке булмаган секторны да кертеп, 270 меңнән дә ким булмаган яңа урын булдырырга кирәк. Өстәвенә, быел ук 90 мең урын булдырылырга тиеш.

«Өч ел эчендә бу максатларга федераль һәм төбәк бюджетларыннан 147 миллиард сум акча юнәлдерелергә тиеш", - диде В. Путин.

Исегезгә төшерәбез, быел Казанда 11 яңа балалар бакчасы төзү планлаштырыла, 10 объектта эшләр башланган инде. Федераль һәм республика программалары буенча агымдагы елда барлыгы 2510 мәктәпкәчә яшьтәге урын булдыру планлаштырыла, шулардан 1110 урын яслә төркемнәрдә төзеләчәк. Моннан тыш, 2020-2021 елларга планлаштырылган «Демография» федераль проекты кысаларында 4440 урынга исәпләнгән 20 балалар бакчасы төзү өчен җир участоклары формалаша.

Ясләдә һәм балалар бакчасына язылу, шулай ук ташламалар, пособияләр, салымнан тотып калуларны өстәмә гаризасыз рәсмиләштерү зарур, дип ассызыклады В. Путин һәм 2020 ел азагына кадәр моның өчен барлык төп дәүләт хезмәтләрен  проактив форматка күчерергә кирәк "бу, кешеләргә кирәк булган хезмәтләрне алуга гариза җибәргәч, калганын система үзе автоматик рәвештә эшләү", дип аңлатты.

«Алга киткән карарлар чыгара алырлык белгечләр кирәк»

В. Путин Юлламасында һөнәри кадрлар әзерләү мөһим тема булды. Технологик үсеш өчен заманча тикшеренүләр һәм эшләнмәләр моделен төзергә кирәк, нәкъ менә шуның өчен төбәкләрдә фәнни-мәгариф үзәкләре булдырыла. Алар белем бирүнең барлык дәрәҗәләрен, фәнни оешмаларның һәм бизнесның мөмкинлекләрен интеграцияләргә тиеш, дип билгеләп үтте РФ Президенты. Өч ел дәвамында мондый үзәкләр илнең 15 субъектында төзелергә тиеш. Исегезгә төшерәбез, Казан Мәскәү, Санкт-Петербург һәм Новосибирск белән беррәттән, фәнни-мәгариф математика үзәге ачылган Россиянең дүрт шәһәреннән берсе булды.

"Август ахырында Россиядә эшче һөнәрләр буенча WorldSkills дөнья чемпионаты узачак, - дип искәртте дәүләт башлыгы. - Әйдәгез, командабызга уңышлар телик. Бу уңыш эшче һөнәрләрнең абруен күтәрү өчен мөһим. Һөнәр, иҗат белән мавыгу әле яшь елларда ук формалаша». WorldSkills хәрәкәте тәҗрибәсенә таянып, урта һөнәри белем бирүне модернизацияләүне тизләтергә кирәк, дип өстәде РФ Президенты һәм 2022 елга көллият һәм техникумнарда 2 меңнән артык мастерскойларда заманча җиһазлар булдыру планлаштырылуын билгеләп үтте.

Киләсе өч елда балалар технопарклары, кванториумнар, цифрлы, табигый-фәнни, гуманитар үсеш үзәкләре челтәрен киңәйтү хисабына өстәмә белем бирү системасында якынча миллион яңа урын булдырылачак, дип планнары белән уртаклашты В. Путин. "Гомумән, яшьләргә игътибар итәсем килә. Сезнең талантыгыз, энергия, креатив сәләтегез – Россиядә иң көчле конкурент өстенлекләре арасында. Без моны аңлыйбыз һәм бик бәялибез. Безгә алга киткән карарлар чыгара алырлык белгечләр кирәк», - диде ул.

Исегезгә төшерәбез, һөнәри осталык буенча WorldSkills Kazan 2019 дөнья чемпионаты Казанда 22-27 августта узачак. Турнирның 56 компетенциясендә дөньяның 60 иленнән яшь белгечләр катнашачак. 20-нче майдан 24-нче майга кадәр Татарстан Республикасы башкаласы "Яшь профессионаллар" VII Илкүләм чемпионаты финалын кабул итәчәк.

Владимир Путин каты калдыклар белән эш итү темасына аерым тукталды, илдә үсә торган чүплекләр проблемасы һәм илдә  чүп эшкәртү эшләре белән шөгыльләнүче беркайчан да булмау сәбәпле бүген бу һәр төбәк өчен төп мәсьәләләрнең берсе, дип билгеләп үтте. "Яңа миллионлаган тонна чүп-чар җәймәс өчен, калдыкларны эшкәртү өлешен бүгенге 8-9% тан 60% ка кадәр  арттырырга кирәк, - диде Президент һәм барлык гражданнарны калдыкларны аерым җыю эшенә актив кушылырга чакырды.

Шулай ук В. Путин үзенең юлламасында сәламәтлек саклауны үстерү, социаль учреждениеләрдә заманча җиһазлар кертү, хакимиятнең бизнес белән хезмәттәшлеге һәм башка мәсьәләләргә дә кагылды.

Чыгышының ахырында РФ Президенты илнең үсеше һәр кешенең эш нәтиҗәләренә бәйле, шуңа күрә һәркемгә сәләт һәм күңел буенча эш табарга кирәк, дип билгеләп үтте. "Безнең көчләргә уртак ышаныч, гражданнарның ил эшенә кушылуы уңышка ирешүне билгели", - дип йомгаклады В. Путин.