Команда һәм хәйрия ярышлары: Казанда 14 февраль көнне Бөтенроссия «Россия чаңгы юлы» ярышлары уздырыла

Шимбә көнне, 14 февральдә, Татарстан Республикасы башкаласында 44 нче Бөтенроссия «Россия чаңгы юлы» массакүләм чаңгы ярышлары уздырыла. Ярышларны уздыру мәйданчыклары шәһәрнең һәр районында оештырыла. Чарада катнашу өчен гаризаларны «Дәүләт хезмәтләре» порталында 12 февральгә кадәр тапшырырга була. Әлеге күркәм спорт чарасын уздыру турында аппарат киңәшмәсендә Физик тәрбия һәм спорт комитеты рәисе Линар Гарипов сөйләде.

«Ел саен «Россия чаңгы юл» чын кышкы спорт бәйрәменә әверелә. Казанда яшәүче меңләгән кеше гаиләләре белән әлеге чарада бик теләп катнаша. Чара гөрләгән мәйданда сабыйлардан алып өлкән яшьтәге тормыш сөючеләребезне дә күрергә була. Бу елны ярышлар барлык районнарда да оештырыла. Һәм моның өчен бездә барысы да бар: теләсәң, һәвәскәрләр өчен әзерләнгән чаңгы трассаларында шуарга була, әзерлегең җитсә, профессиональ чаңгы-биатлон комплексында шөгыльләнә аласың. Узган ел «Россия чаңгы юлы»нда 20 меңнән артык һәвәскәр һәм профессионал катнашты. Бу елны да чара зур кызыксыну уятыр дип өметләнәбез», - дип билгеләп үтте ярышларның әһәмиятен Казан мэры Илсур Метшин.

Линар Гарипов сөйләгәнчә, катнашучыларга старт комплектлары 9 февральдән 13 февральгә кадәр Үзәк стадионның матбугат үзәгендә биреләчәк. Мандат комиссиясе 10:00 сәгатьтән 19:00 сәгатькә кадәр эшләячәк. Теркәлгән вакытта шәхесне ачыклый торган документ, медицина белешмәсе һәм иминият полисы таләп ителә.

Ярышлар түбәндәге дүрт мәйданчыкта үткәрелә:

Авиатөзелеш һәм Яңа Савин районнары – Гаврилов урамы янында Казансу елгасы тугаенда;

Вахитов һәм Идел буе районнары – Горки-Әмәт урманында;

Киров һәм Мәскәү районнары – «Локомотив» стадионында;

Совет районы – «Дәрвишләр» торак массивындагы Каенлыкта.

Профессиональ спортчылар өчен 5 һәм 10 чакрым ераклыкка исәпләнгән ярышлар «Локомотив» стадионында оештырыла. Биредә шулай ук спорт ветераннары һәм хәйрия ярышы уздырыла.

Бу елны беренче тапкыр «Безнең ишегалды чемпионнары» Спартакиадасы кысаларында торак комплексларда яшәүчеләр арасында эстафета форматында команда ярышлары оештырылачак. Командаларда катнашучыларның һәрберсенә 1 чакрым ара үтәргә туры киләчәк.

Калган мәйданчыкларда 2 чакрым ераклыкка каралган массакүләм ярышлар көтелә. Күркәм гадәт буенча, укучылар өчен ярышлар гомуми белем бирү мәктәпләре территориясендә уздырыла.

Массакүләм ярышта катнашу өчен 12 февральгә кадәр «Дәүләт хезмәтләре» порталы аша алдан теркәлү таләп ителә. Шәхси кабинетта мәгълүматны эзләү юлында «Россия чаңгы юлы»н язарга һәм, медицина белешмәсе булуын раслап, гариза тутырырга кирәк.

Линар Гарипов билгеләп үткәнчә, узган ел «Россия чаңгы юлы» чарасында 20 меңнән артык Казан халкы катнашкан.

Чыгыш ясаучы шулай ук Триатлон буенча балалар лигасы республика ярышларының яңа сезоны ачылуы турында искә төшерде. Ярышларның беренче этабы Үзәк стадионда узган. Ярышларда 7 яшьтән 17 яшькә кадәрге 200 дән артык малай һәм кыз катнашкн. Катнашучылар 3 чакрым ераклыкка исәпләнгән чаңгы ярышларында һәм кросста көч сынашкан.