И.Метшин: «Бу — уртак тырышлык белән шундый уңайлы, матур, рәхәт киңлекләр тудыру үрнәге»

Бүген Казанда, Республика һәм Шәһәр көнендә Серов урамындагы бульварны төзекләндерүнең икенче этабы ачылды. Биредә күлне тернәкләндерделәр, ә иҗтимагый киңлек яңа күп функцияле мәйданчыклы булды. Биредә лекторий һәм сәламәтлек мөмкинлекләре чикләнгән балалар өчен махсуслаштырылган велосипедлар прокаты булган экологик күшәк барлыкка килде. Территорияне төзекләндерү «Тормыш өчен инфраструктура» милли проекты кысаларында алып барыла. Бульвар ачылу хөрмәтенә халык өчен «Синең яшел гадәтләрең» балалар экофестивале, үсемлекләр утырту һәм мастер-класслар оештырылды. Яңартылган җәмәгать киңлеге буйлап ТР рәисе Рөстәм Миңнеханов һәм Казан мэры Илсур Метшин йөреп чыктылар.

«Бу уртак тырышлык белән – федераль үзәк, республика, «Сибур», җаваплы затлар ярдәме белән, һәм әлбәттә, актив халык теләге белән шундый уңайлы, матур, рәхәт киңлекләр булдыру үрнәге», – дип билгеләде Казан мэры Илсур Метшин.

Икенче чиратны төзекләндерү бульварның үзәк территориясенә кагылды: спорт мәйданчыгыннан алып күлгә кадәр тулысынча торгызылды.

Элек монда ташландык сазлык булган, ә хәзер матур җәяүле зона булдырыла. «Сибур» компаниясе ярдәме белән сулык экосистемасын торгызу буенча зур эшләр башкарылды. ТР Фәннәр академиясе галимнәре үткәргән анализдан соң экологлар күлдән 2,6 мең тонна су төбе катламнарын җыеп алганнар. Шул ук вакытта сулыкның күләме ике тапкырга арткан, бу территориядә тарихи рәвештә яшәгән су кошларының яшәү урыннары сакланган, шулай ук суны чистартуга ярдәм итә торган су үсемлекләре утыртылган. Кертемнең гомуми күләме 41 миллион сум тәшкил иткән.

Моннан тыш, территорияне яшелләндерделәр: агачлар, куаклар һәм күпьеллык үсемлекләр утырттылар. Киләчәктә күл тирәли район халкы өчен җәяүлеләр юлы салу планлаштырыла, шулай ук физик мөмкинлекләре чикләнгән балаларга махсус велосипедлар өчен велосипед юлы барлыкка киләчәк.

Бульварның үзәк өлешендә СИБУР экологик күшәге урнашкан. Аның фасады «Сафпласт» компаниясе тарафыннан «Казаноргсинтез» ГАҖ полимер чималыннан җитештерелгән йозак поликарбонат панельләрдән эшләнгән. Киңлек эчендәге җиһазлар икенчел эшкәртелгән пластиктан эшләнгән.

Күшәктә лекцияләр, экология дәресләре һәм иҗтимагый очрашулар үткәреләчәк. Шәһәрлеләр өчен китаплар һәм мәгърифәт такталары булган мәгариф почмагыннан файдаланырга мөмкин. Соңрак монда кулланылган ПЭТ-шешәләрне җыю һәм эшкәртүгә җибәрү өчен фандомат эшләячәк. Шулай ук күшәктә церебраль параличлы балалар өчен «Игелекле Казан» АКБО оештырган велосипед прокаты пункты да эшли. Велосипедта балалар махсус велосипед юллары буенча йөри ала, аларның киңлеге нәкъ менә шушы велосипедларга туры килә.

Территориядә рус ишарәләре теле дәресләре өчен зона булдырылган. Дәресләр түгәрәк эскәмиядә узачак, бу катнашучыларның аралашуын уңайлы итә. Янәшәдә урам китапханәсе урнашкан, анда яшәүчеләр үз китапларын алып килә һәм башкаларны укый ала.

Күрше йортларда яшәүчеләр өчен яшелчә бакчасы ясалды, анда 5 кисмәк, инвентарь өчен шкаф, хәрәкәтләре аз булган төркем кешеләре өчен махсус өстәл бар.

Территориянең төзеклеген күрше йортларда яшәүчеләр бәяләгән инде. «Безгә барысы да ошый. Бала белән коляскада йөрү бик уңайлы. Мин мондый паркларның безнең шәһәрдә торган саен күбрәк булуын, яшеллек, матур, ә иң мөһиме уңайлы булуын теләр идем», — дип хис-кичерешләре белән уртаклашты сәламәтлек мөмкинлекләре чикләнгән баланың әнисе Любовь Тарасова.

Шулай ук күл янында балаларның когнитив, физик һәм социаль күнекмәләрен үстерүгә ярдәм итә торган су белән уеннар өчен мәйданчык урнаштырылган.

Моннан тыш, паркны яктырту һәм агачларны яктырту эшләре башкарылды. Мәгълүмат такталары урнаштырылган, ә төп нокталар бульвар зоналары турында мәгълүмат алу өчен трансмиттерлар белән җиһазландырылган.

Исегезгә төшерәбез, Серов урамындагы бульвар 2023 елда төзекләндерү өчен киңлекләрне сайлау буенча тавыш бирүдә җиңүче булды. Узган елның октябрендә «Ярдәм» мәчете янындагы территориянең көнбатыш өлешен төзекләндерү төгәлләнде. Биредә беренче инклюзив иҗтимагый киңлек барлыкка килде, анда бөтен инфраструктура инвалидлар мөмкинлекләренә җайлаштырылган.