Казан Ратушасында зооботаника бакчасы директоры вазифасына конкурста катнашучыларның беренче смотры узды

Бүген Казан Ратушасында Казан зооботаника бакчасы директоры вазифасына конкурста катнашучыларның беренче смотры узды. Конкурска барлыгы 230 гариза бирелгән, ә финалда 7 конкурсант үз проект-үсеш концепцияләрен тәкъдим иткән. Катнашучыларның докладларын Казан мэры Илсур Метшин җитәкчелегендәге эксперт советы әгъзалары тыңлады.

Казан зооботаника бакчасы директоры вазифасына конкурс 9 июньдә игълан ителгән, ә гаризалар кабул итү 18 июньгә кадәр дәвам иткән. Бу вакыт эчендә бөтен илдән ике онлайн платформа: kzn.ru порталы һәм hh.ru сайтына 230 гариза килгән.

Казан мэры Илсур Метшин хәбәр иткәнчә, конкурсны уздыру турындагы карар Татарстан республикасы рәисе инициативасы белән Казан зооботаника бакчасын реконструкцияләүнең икенче этабы башлануга бәйле.

«Зооботаника бакчасын реконструкцияләү – шәһәребезнең мәдәни тормышында мөһим вакыйга. Зооботаника бакчасының яңа өлеше — «Замбези елгасы» зоопаркы – кунаклар һәм башкала халкы килү буенча бик яхшы нәтиҗәләр күрсәтә. Әмма реконструкциянең икенче этабы башланыр алдыннан техник биремне дөрес формалаштырырга, башка проектларның уңышлы тәҗрибәсен өйрәнергә һәм яңа өлешнең сыйфатлы һәм сакчыл төзелешен, шулай ук искесен торгызуны тәэмин итәргә кирәк. Шуңа бәйле рәвештә зоопарк директоры вазифасына конкурс уздыру турында карар кабул ителде», – диде Илсур Метшин.

Булачак җитәкчегә эре хуҗалык белән идарә итү, Казан зоопаркы инфраструктурасын үстерү, хайваннарны һәм үсемлекләрне карап тотуның заманча технологияләрен кертү, шулай ук агарту һәм фәнни эшчәнлекне оештыру белән бәйле киң колачлы бурычларны хәл итәргә туры киләчәк.

Кандидатларның стратегик күзаллауларын һәм компетенцияләрен бәяләү өчен аларга үз проектларын – Казан зооботаника бакчасын үстерү концепцияләрен эшләргә һәм күрсәтергә тәкъдим ителде.

Беренче булып үз проектын кече һәм урта эшмәкәрлек гомумроссия иҗтимагый оешмасының Татарстан республикасы бүлеге рәисе Антон Баклашов тәкъдим итте. Ул зооботаника бакчасын үстерүнең халыкара хезмәттәшлекне, финанслауны һәм цифрлаштыруны да кертеп, төп юнәлешләрен билгеләде. Аның тәкъдимнәре арасында – парк картасы, чаралар расписаниесе һәм сәламәтлек мөмкинлекләре чикләнгән килүчеләр өчен мәгълүмат белән мобиль кушымта төзү.

Шулай ук экскурсовод сыйфатында пилотсыз трансфер һәм ясалма интеллект кертү буенча идеяләр яңгырады. «Замбези елгасы», «Амазонка елгасы» зоналарын һәм Кабан күле акваториясен берләштерүче территорияне комплекслы үстерү проектына аерым игътибар бирелде.

Парклар һәм скверлар дирекциясенең арт-бүлеге җитәкчесе Асия Гыйззәтуллина зооботаника бакчасын шәһәрлеләр ялы өчен күп функцияле мәйдан буларак үстерергә тәкъдим итте. Аның планнарында – терлекләрне опекунлык итү практикасын кертү, яңгыр суын җыю өчен «яңгыр бакчасы», тере азык фабрикасы һәм кыргый хайваннарны тернәкләндерү үзәге булдыру. Ул зооботаника бакчасының тарихи өлешен һәм Кабан күленең яр буе территорияләрен төзекләндерүгә игътибарны юнәлтте, алар арасында инде булган һәм яңа инфраструктура аша органик элемтә булдырырга тәкъдим итте. Асия Гыйззәтуллина шулай ук сыйфатлы визуаль контент, сувенир продукциясе һәм волонтерлык агарту программалары аша зоопаркның җәлеп итүчәнлеген арттыруның мөһимлеген ассызыклады.

Казан зооботаника бакчасы директоры урынбасары Ольга Латфуллина гамәлдәге концепциянең әйдәп баручы чит ил зоопарклары тәҗрибәсен исәпкә алуын, ә 2020 елдан килүче кешеләр санының сизелерлек артканын билгеләп, учреждениенең агымдагы торышына анализ ясады. Аның үсеш планында – тарихи оранжерея һәм Фукс йортын (зоопаркның беренче бинасы) реконструкцияләү, шулай ук аның территориясендә кунакханә төзү. Билгеләнгән яңа тематик зоналар арасында – Россия киңлекләрендәге хайваннар белән «Россия» территориясе, аннан соң эксклюзив Көньяк Америка төрләре белән «Амазонка елгасы» территориясе төзеләчәк.

«Таттелеком» ГАҖ Казан филиалының элеккеге директоры Рамил Садыйков зооботаника бакчасының тарихи өлешендә стандарт булмаган архитектураны кертүне тәкъдим итте, хайваннар яши торган табигый тирәлекне максималь имитацияли торган уникаль вольерлар булдыруга басым ясады. Ул килүчеләр өчен оригиналь күңел ачу һәм белем бирү программаларын эшләүнең, шулай ук кунаклар белән багланышларны яхшырту өчен цифрлы технологияләрне актив куллануның мөһимлеген ассызыклады.

Казанның Совет районы башлыгы урынбасары Эдуард Солтанов реконструкцияләнә торган тарихи территория белән яңа җәяүлеләр элемтәсе булдыру идеясе белән чыгыш ясады. Ул кунакларның зоопаркка килүенең алар биредә даими рәвештә ял итәргә йөрерлек итә торган яңа сценариен эшләргә тәкъдим итте. Шулай ук читлекләр урынына табигый киртәләр булган вольерлар булдыру, балалар өчен экологик үсеш тарихи мәктәбен торгызу, хайваннар вольерларына панорама күренеше булган гастрономия оешмаларын ачу идеяләре яңгырады.

Тагын бер катнашучы – «НК Крон» ҖЧҖнең төбәк вәкиле Линар Тимергалиев зооботаника бакчасының кайбер проблемаларын билгеләде һәм аларны хәл итүнең конкрет юлларын тәкъдим итте. Аның чыгышында заманча ял итү һәм туклану зоналарын булдыру, төрле телләрдә электрон һәм тавыш экскурсияләрен кертү, шулай ук хезмәткәрләрне системалы укыту зарурлыгы ассызыкланды. Ул шулай ук зоопарк эшенең яшьләр аудиториясенә юнәлдерелүенә игътибар итәргә кирәклеген билгеләп үтте.

Конкурста иң яшь катнашучы, КФУ аспиранты Илнур Хаҗипов «Экопарк 2030» программасын тәкъдим итте, аның өч төп максаты бар: фәнни үзәк булдыру, кабат визитларны стимуллаштыру һәм мультимедиа инфраструктурасын модернизацияләү. Ул экопарк әһәмиятле җәлеп итү урынына әверелсен өчен яшьләрне һәм иҗтимагый берләшмәләрне актив җәлеп итүнең мөһимлеген билгеләп үтте.

Конкурс комиссиясе йомгагында Илсур Метшин конкурста актив катнашулары һәм Казанны яхшырак итәргә омтылулары өчен конкурсантларга рәхмәт белдерде.

«Бигрәк тә сезнең һәрберегезнең иң яхшы дөнья һәм Россия тәҗрибәсенә таянып, башкалабызны бизәячәк проект булдыру теләген белдерүе мөһим», – дип йомгаклады Илсур Метшин.

Киңәшмәдән соң жюри дүрт финалистны: Асия Гыйззәтуллина, Эдуард Солтанов, Линар Тимергалиев, Илнур Хаҗиповны сайлап алды. Аларга үз проектларын эшләп бетерергә һәм аларны жюрига тәкъдим итәргә кирәк.

Эксперт жюри составында шулай ук ТР Премьер-министры урынбасары Ләйлә Фазлыева, ТР төзелеш, архитектура һәм торак-коммуналь хуҗалык министры Марат Айзатуллин, Казан шәһәре муниципаль берәмлеге башлыгы урынбасары Денис Калинкин, Башкарма комитет җитәкчесе урынбасары Гүзәл Сәгыйтова, шәһәр Башкарма комитетының мәдәният идарәсе башлыгы Азат Абзалов, Башкарма комитет җитәкчесе Рөстәм Гафаров, Башкарма комитет Аппараты җитәкчесе Булат Алеев һәм «ТР шәһәрләрен үстерү институты» фонды директоры Наил Зиннәтуллин бар иде.