Илсур Метшин шәһәрнең су инфраструктурасын үстерү буенча күчмә киңәшмә уздырды

Казанда «Казан – судагы шәһәр» проектын гамәлгә ашыруга керештеләр. Казан мэры Илсур Метшин су инфраструктурасының берничә объектында булды. Торфяная бистәсендәге вейк-парк территориясен 15 гектарга киңәйтү турында карар кабул ителде. Биредә Татарстан җыелма командасы шөгыльләнә, ә җәй көне көн саен 200гә якын һәвәскәр шуа. Парк киңәйтелгәннән соң су спорт төрләрен яратучыларны ике тапкыр күбрәк кабул итә алачак.

Торфяная бистәсендә күпфункцияле вейк-парк 2014 елда ачылган. Мәйданчык вейкбордта шуу өчен бер реверсив лебедкадан эшли башлады, бүген алар ике. Ике профессиональ катер-буксировщик шуу өчен ясалма дулкын тудыра.

Су чаңгысы җайланмаларында көнгә 13 дисциплина буенча 80 күнегү узышы уза. Вейк-парк танылган спорт төре, көн саен җәйге сезонда аңа 200гә кадәр кеше килә. Монда ук су чаңгысы спорты буенча Татарстан җыелма командасы да шөгыльләнә.

Вейк-паркта су чаңгысы спорты буенча балалар җәйге секциясе бар, анда 5 яшьтән 14 яшькә кадәрге 35 тән артык бала шөгыльләнә. Бу Россиядә яраклаштырылган махсус җиһазлар белән төзелгән бердәнбер вейк-парк. «Бездә мөмкинлекләре чикләнгән кешеләр шуарга мөмкин. Һәр сезонда без алар өчен бушлай мастер-класслар үткәрәбез», – дип сөйләде проект җитәкчесе Анна Лазина.

Хәзер объект йөкләнеш буенча чиккә җитте. Үсеш өчен судан файдалану территориясен киңәйтү кирәк.

«Безгә су куллану мәйданын киңәйтү өчен җир кишәрлеге кирәк, без һәвәскәрләр – балалар һәм өлкәннәр өчен дә, осталар өчен дә төрле дәрәҗәдәге лебедкалар урнаштыра алабыз. Без шулай ук яр буе линиясен төзекләндерү белән шөгыльләнәчәкбез, стационар объектлар урнаштырачакбыз һәм кемпинг оештырачакбыз», – дип мөрәҗәгать итте Илсур Метшинга проект җитәкчеләренең берсе Владимир Лазин. Аның сүзләренчә, бу планнарны тормышка ашыру 2-3 ел алачак.

Илсур Метшин киңлекне үстерү проектын раслады.

Киңәшмәдә катнашкан «Якорь» көймә станциясе кооперативы рәисе Владислав Поспелов Илсур Метшинга арендаторлар саны арту сәбәпле судан файдалану чикләрен киңәйтүне сорап мөрәҗәгать итте. Бүгенге көндә станция бюджет станцияләренең берсе булып санала, биредә 140 эллинг һәм арканга бастыру өчен пирс тәкъдим ителгән. Үз чиратында кооператив үз көчләре белән территорияне төзекләндерергә вәгъдә итә.

«Без су куллануны арттыру яклы. Без сезгә керү юлларын ясарбыз, ә сез территорияне тәртипкә китерерсез. Казанның үсеш институты сезгә бердәм стандартлы проектлар тәкъдим итәчәк», — диде Илсур Метшин.

Исегезгә төшерәбез, «Казан – судагы шәһәр» концепциясе шәһәр үсеше институты тарафыннан эшләнгән. Ул яр буендагы яңа җәмәгать киңлекләрен төзекләндерүне, Иделдә һәм Казансуда шәхси кече үлчәмле флот өчен яңа шәһәр инфраструктурасын булдыруны, шулай ук җилкәнле, су-мотор спортын һәм суднолар төзүне үстерүне күздә тота. Институт су инфраструктурасы объектлары өчен бердәм гадәти чишелешләр эшләде, алар бу өлкәдә үсәргә планлаштырган бизнесның тормышын җиңеләйтәчәк. Булачак инвесторлар территорияне бердәм стратегия кысаларында үстерә алачак.

Концепция беренче тапкыр 2023 елда «Казаныш» Халыкара архитектура форумында тәкъдим ителде.

Күчмә киңәшмәдә Казан Башкарма комитеты җитәкчесе урынбасары Илдар Шакиров, Казанның Совет районы администрациясе башлыгы Роман Фәтхетдинов, Казанның баш архитекторы Илсөяр Төхвәтуллина, Җир һәм милек мөнәсәбәтләре комитеты рәисе Ренат Галәветдинов һәм башкалар катнашты.