Илсур Метшин: «Бездә 10 елдан артык хезмәт иткән автобуслар юк диярлек»

33, 35, 35а, 53, 63 номерлы маршрутлар буенча 30 яңа газ моторлы автобус чыкты. Алар 12 ел эшләгән иске машиналар урынына сатып алынган. Яңа автобуслар «Евро-5» экологик класслы йөрткечләр, һава сафландыргыч, USB – розеткалар, уңайлы кәнәфиләр белән җиһазландырылган.  Казан мэры Илсур Метшин кичә яңа автобусларны карап чыкты һәм аларны йөртүчеләрнең фикере белән кызыксынды.

«Җәмәгать транспортын үстерү — шәһәрдәге иң мөһим мәсьәләләрнең берсе. Узган ел республика рәисе ярдәме белән без 127 автобус сатып алдык, ә быел – тагын 30 яңа берәмлек. Бүгенге көндә бездә 10 елдан артык хезмәт иткән автобуслар юк диярлек. Бездә автобусларның да, троллейбусларның да иң яңа хәрәкәтчән составларының берсе», – диде шәһәр мэры.

Автобус моделе НЕФАЗ-5299-40-57 «Евро-5» йөрткече белән 96 кешегә исәпләнгән, анда 29 утыру урыны бар. «9 нчы КПАТП» ҖЧҖ – 18, «7 нче КПАП» ҖЧҖ – тугыз, ә Р.И.Беляев ШЭ өч автобус сатып алган. Бу өч ташучы шәһәрнең автобус ташу базарында якынча 10% алып тора. Шәһәрнең транспорт челтәренә барлыгы җиде ташучы хезмәт күрсәтә — ике муниципаль унитар предприятие («Метроэлектротранс» МУП һәм «2 нче ПАТП» МУП) һәм биш шәхси.

Барлык сатып алынган автобуслар газ-мотор ягулыгында эшли. Ул атмосферага углекислталы газ чыгаруны киметергә һәм хезмәт күрсәтүгә чыгымнарны киметергә мөмкинлек бирә. 10 газ баллоны белән җиһазландыру нәтиҗәсендә (узган җыелмада сигез иде) автобусларга ягулык салмыйча ике көнлек рейс ясарга мөмкин булачак. Автобусларда куркынычсызлык өчен газ агып чыгу күрсәткечләре бар.

Шәһәрдә эксплуатацияләнә торган автобусларның гомуми саныннан 54% ы газ-моторлыларга туры килә. «Чыннан да тавыш дәрәҗәсе кимеде. Әгәр норматив буенча чик дәрәҗәсе 82 дб булса, бездә ул 72 дбга җитми. Бу пассажирларның акустик уңайлылыгы өчен мөһим. 25 елдан артык без пассажир транспортын үстерү белән шөгыльләнәбез һәм ел саен сыйфатын яхшыртабыз, моның өчен ташучылар белән даими элемтәдә торабыз», – диде КАМАЗ пассажир транспорты буенча директор урынбасары Алексей Сергеев.

Пассажирларга уңайлы булсын өчен салон йомшак утыргычлар, һава сафландыргыч, тавыш изоляциясе, йөртүчене чакыру төймәсе, USB-розеткалар һәм тоткаларда шууга каршы чехоллар белән җиһазландырылган. Аз хәрәкәтләнүче төркемнәргә уңайлы булуга да игътибар бирелде: автобусларда аппарель һәм инвалид коляскалары өчен урын бар.

Һава сафландыргычлар салонда гына түгел, машина йөртүчеләр кабиналарында да урнаштырылган. Автобуста тугыз видеокамера бар, алар ярдәмендә машина йөртүче салонда һәм тышкы яктан хәлне тикшерәчәк.

Идәннең түбән дәрәҗәсе баскычларсыз яки биеклектәге аермалардан башка пассажирларны утырту һәм төшерү тизлеген тәэмин итә, шулай ук маршрутта хәрәкәтне тизләтә. Пыяланың югары мәйданы салон эчендә күбрәк киңлек һәм тышкы яктан матур күренеш бирә.

«Җәмәгать транспортында уңайлылык бик мөһим — һава сафландыргыч һәм уңайлы кәнәфиләр. Экологик яктан гына түгел, уңайлылыкны да яхшырту өстендә эшләвегезне дәвам итүегез бик яхшы. Мин беренче автобусларны хәтерлим, бу, әлбәттә, җир һәм күк арасы шикелле», — диде Илсур Метшин.

Шәһәр башлыгы шулай ук маршрутта инде 10 ел эшләгән 33 нче номерлы автобус йөртүчесе Кирилл Камалеев белән аралашты. Машина йөртүче яңа модельнең уңайлылыгын билгеләп үтте. «Безнең КАМАЗ машиналарының шундый дәрәҗәгә җитүен күрү бик күңелле. Безнең өчен иң мөһиме – пассажирларның да, машина йөртүчеләрнең дә уңайлылыгы», – дип мөрәҗәгать итте шәһәр башлыгы.

Яңа автобуслар бүген линиягә чыкты һәм түбәндәге маршрутлар буенча йөриячәк: №33 («Ферма-2 торак массивы —Ленинград ур.»), №35 («Гаврилов ур.»), №35а («Тукай мәйданы» метро станциясе»), №53 («Елга порты – Ленинград ур.»), №63 («Яшьлек» метро станциясе – Сәнәгать базасы»). Автобуслар Татарстан хөкүмәте һәм «Татлизинг» ДУП ярдәмендә сатып алынган.

Исегезгә төшерәбез, узган ел Казанның җәмәгать транспорты 226,3 млн пассажир ташыган. 2018 елда Футбол буенча дөнья чемпионатына күчмә состав киң колач белән яңартылды (242 автобус, 20 трамвай). Автобус паркының уртача яше 5,9 ел тәшкил итә (тулаем ил буенча – 14,6).