Илсур Метшин: «Быел без Алиш исемендәге легендар балалар иҗаты үзәген төзекләндерә башлыйбыз»

Бүген Казан мэры Илсур Метшин Абдулла Алиш исемендәге балалар иҗаты сараен төзекләндерү проекты буенча фикер алышты, анда ел саен 2000нән артык бала шөгыльләнде. Гомуми мәйданы 4800 квадрат метр булган бина 64 ел элек Сталин ампиры стилистикасында төзелгән, ул республика әһәмиятендәге мәдәни мирас объекты – биек аркалы тәрәзәләре, имән култыксалары һәм тарихи паркеты булган. Бөтен тарих дәвамында биредә бер тапкыр да капиталь ремонт булмаган.

«Совет чорыннан безнең балаларга балалар иҗаты үзәкләренең, искечә Пионерлар йортларының алдынгы төзелешләре эләкте. Һәм менә шуларның берсе — Алиш исемендәге яраткан Сарай, ул меңләгән бала тәрбияләп үстергән, үз эшен яраткан педагоглар ярдәмендә төрле өлкәләрдә аларның сәләтләрен ачарга булышкан. Бу бинага киләсе елда 65 ел була. Без республика рәисе Рөстәм Миңнехановка рәхмәтле, аның карары буенча быел без бу бинаны төзекләндерә башлыйбыз. Сарай шактый зур булганга һәм ул мәдәни мирас объекты булганга, мондагы яңарту аерым ысулны, игътибарны, тарихи мирасны саклауның барлык катгый нормаларын үтәүне таләп итә», — дип билгеләде объектта Казан башлыгы Илсур Метшин.

Элек Пионерлар һәм Укучылар сарае буларак билгеле булган Абдулла Алиш исемендәге балалар иҗаты үзәген 1956 елда төзи башлаганнар. Аны архитекторлар Павел Саначин һәм Георгий Солдатов проекты буенча төзегәннәр. Объект төзелешенә өлешне белгечләр генә кертмәгән — процесста шулай ук пионерлар һәм комсомоллар да катнашкан. Учреждениегә татар шагыйре һәм язучысы исеме 1965 елда бирелгән.

Галактионов урамындагы үзәктә ел саен 2 меңгә якын бала шөгыльләнгән. Бинада 50дән артык бүлмә бар, шул исәптән спорт залы, актлар, баллар һәм хореография заллары. Үзәк төрле юнәлешләр буенча эшләде: сәнгать, табигать белеме, спорт, техник белемнәр, туган якны өйрәнү һәм социаль-гуманитар юнәлеш. Әмма узган ел 1961 елда төзелгән бинаны аның хәле аркасында ябарга туры килгән.

Төзекләндерү проекты буенча объектта инженер системаларын һәм түбәсен тулысынча алыштыру, зыян күргән таяныч корылмаларны һәм фундаментларны ныгыту, фасадны һәм эчке бүлмәләрне төзәтү, технологик җиһазлар сатып алу планлаштырыла. Белгечләр шулай ук ишегалды корылмаларын ремонтлаячак һәм энергия белән тәэмин итү челтәрләрен алыштырачак. Моннан тыш, сарай территориясен кече архитектура формалары һәм чыгышлар өчен сәхнәләр белән төзекләндерәчәкләр.

Ремонт вакытында балаларны һәм педагогларны Казанның мәгариф учреждениеләренә бүләргә карар кылынды. Сарай администрациясе һәм педагогларның бер өлеше хәзер Айвазовский урамындагы 19 йорт адресы буенча урнашкан бинада эшли. Учреждениедә 145 кеше эшли. Түгәрәк берләшмәләре – бүгенге көндә алар 303 — шәһәрнең 18 мәгариф учреждениесе базасында эшләвен дәвам итә.

Чарада шулай ук Вахитов һәм Идел буе районнары администрациясе башлыгы Альберт Салихов, Мәгариф идарәсе башлыгы Ирек Ризванов, Социаль өлкә учреждениеләрен тоту һәм аларга хезмәт күрсәтү департаменты директоры Илья Коротихин һәм башкалар катнашты.