И.Метшин Киров һәм Мәскәү районнары турында: «Һәркайсының үзенә генә хас җәлеп итү көче, тарихы һәм үзенчәлеге бар, әмма алар бергә үсә»

2023 елда Казанның Киров һәм Мәскәү районнарының төп капиталына 24,5 млрд сум инвестиция җәлеп ителгән, бу 2022 ел белән чагыштырганда ике тапкырга күбрәк. Быел 1,7 мең фатирга исәпләнгән яңа торак файдалануга тапшыру, 45 йортны капиталь ремонтлау һәм 60 тан артык ишегалдын яңарту планлаштырыла. Болар хакында Башкарма комитетта узган эшлекле дүшәмбедә район администрациясе башлыгы Сергей Миронов хәбәр итте.

«Чыгышны игътибар белән тыңлаганнан соң, мондый доклад Россия Федерациясе субъектлары башкалалары мэрларының да һәркайсында булмый, дигән фикер туды, – диде мэр Илсур Метшин. – Татарстан җитәкчелегенә, рәис Рөстәм Нургали улы Миңнехановка республикадагы дистәләгән проектлар өчен рәхмәтемне белдерәм. Авырлыкларга карамастан, аларны гамәлгә ашыру дәвам итә».

Шәһәр башлыгы районнар администрациясе командасының эш нәтиҗәләренә дә игътибар итте. «Бу һәрвакыт яңа юнәлешләр эзли торган бердәм, яшь, мавыгучан, иҗади коллектив. Алар һәрвакыт кыю идеяләр белән яши, күп кенә юнәлешләрдә башлап йөрүчеләр», – дип билгеләп үтте Илсур Метшин.

Әмма элегрәк районда вазгыять башкача иде, дип дәвам итте ул. Казанның меңьеллыгын билгеләп үткәннән соң, 2005 елда, Киров районы икътисады уртачадан түбән, ә социаль инфраструктурасы иң артта калган район булып санала иде. Алга таба аны Мәскәү районы белән берләштерү турында карар кабул ителде.

«Вакыт әлеге карарның дөрес булуын исбатлады. Ике район арасында лидер да, аутсайдер да юк, һәркайсының үзенә генә хас җәлеп итү көче, тарихы һәм үзенчәлеге бар, әмма алар бергә үсә. Бу, мәсәлән, юл һәм социаль инфраструктурага кагыла, яңа торак микрорайоннар барлыкка килә, Горький шоссесы реконструкцияләнә, ә Салават Күпере яңа торак йортлар һәм социаль объектлар хисабына киңәя», – дип сүзен йомгаклады шәһәр башлыгы.

Уртача хезмәт хакы 73 мең сумны тәшкил иткән.

Сергей Миронов сүзләренә караганда, 2023 елда Киров һәм Мәскәү районнарында шәхси эшмәкәрләр саны – меңгә, ә үзмәшгульләр саны өч меңгә арткан.

Кулланучылар базары һәм хезмәтләр күрсәтү өлкәсе белән бәйле 30 яңа объект ачылган, аларның гомуми мәйданы – 7 мең кв. метрдан артык. Яз һәм көз айларында дүрт мәйданчыкта 21 авыл хуҗалыгы ярминкәсе үткәрелгән. Бер ел эчендә кертелгән продукциянең гомуми күләме 318 млн сумга җиткән.

1,2 мең фатирлы 10 яңа йорт файдалануга тапшырылган

Узган ел 56 меңнән артык кешегә хезмәт күрсәтә торган 16 нчы номерлы шәһәр хастаханәсенең берьюлы ике корпусында капиталь ремонт эшләре башкарылган. Сәламәтлек саклау учреждениесе стационарында ел саен 12 меңгә якын пациент дәвалана. 1 нче номерлы шәһәр хастаханәсе һәм сугыш ветераннары өчен госпиталь бинасы капиталь ремонтланган, анда махсус хәрби операциядә катнашучыларны дәвалау һәм реабилитацияләү буенча махсус бүлек ачылган. Күнекмәләр һәм дәвалау процедуралары, диагностика үткәрә торган, терапиянең нәтиҗәлелеген бәяли торган робот-комплекслар сатып алынган.

«2 нче номерлы клиник хастаханә стационарында капиталь ремонт дәвам итә. Ә Салават Күперендә өлкәннәр һәм балалар өчени бүлекчәләрне, хатын-кызлар консультациясен һәм ашыгыч ярдәм хезмәтен берләштерә торган дәваханә төзелә», – дип уртаклашты район администрациясе башлыгы.

Узган ел нәтиҗәләре буенча 1222 фатирлы 10 яңа йорт файдалануга тапшырылган. Торак программаларын гамәлгә ашыру нәтиҗәсендә 189 гаилә үзенең торак шартларын яхшырта алган. Быел 1707 фатирга исәпләнгән тагын 12 йорт, шул исәптән Салават Күперендә социаль ипотека программасы буенча 880 фатирлы алты йорты файдалануга тапшырылачак.

Поселокларда каты коммуналь калдыклар җыю өчен 11 яңа мәйданчык барлыкка киләчәк

«Имин һәм сыйфатлы юллар» илкүләм проекты нигезендә 2023 елда Коләхмәтов, Городская һәм Хәсән Туфан урамнары участокларында юл өслеге яңартылган. 120 мең кв.м мәйданда үткәрелгән ремонт эшләре Күзәмәт, Сосновая, Майкоп, Богатырев, Путейская һәм Энергетиклар урамнарына кагылган.

Горький шоссесын реконструкцияләүнең беренче этабы тәмамланган. Проектны быел тапшырырга планлаштыралар. 11 км озынлыктагы светофорсыз магистральнең үткәрүчәнлек сәләте, якынча ике тапкыр артып, сәгатенә 11 мең автомобильне тәшкил итәчәк.

2023 елда поселокларда каты коммуналь калдыклар җыю өчен 11 яңа мәйданчык барлыкка килгән, 2024 елда тагын шуның кадәр мәйданчыкны җиһазландырырга планлаштыралар.

Мәскәү районындагы Серов урамында урнашкан бульварны төзү эшләре дәвам итә. Ә Киров районында Балыкчы бакчасын реконструкцияләү тәмамланган, анда керү төркемнәре яңартылган, эскәмияләр урнаштырылган һәм велосипедчылар өчен юллар булдырылган, спорт мәйданчыклары җиһазландырылган.

«Өлкән яшьтәгеләр тәкъдиме буенча бакчада бию өчен зона булдырылды, шулай ук тарихи фонтан һәм балалар мәйданчыгы яңартылды», – дип хәбәр итте Сергей Миронов.