Илсур Метшин: «КТЭЦ-1 не модернизацияләү микрорайоннар төзү өчен мөмкинлекләр бирде»

(Казан шәһәре KZN.RU, 12 нче декабрь, Камилә Вилданова). Казан Мэры Илсур Метшин бүген Казанның 1 нче җылылык электр үзәк магистралендә булды. Эре энергетика предприятиесе предприятиеләрне һәм шәһәрнең Идел буе һәм Вахитов районнарында яшәүчеләрне җылылык белән тәэмин итә – барлыгы 750 торак йортны һәм 123 социаль объектны. Үз вакытында үткәрелгән модернизация нәтиҗәсендә, ТЭЦ-1 нең җитештерү куәте Казанның яңа микрорайоннарына (алар шул исәптән Порт урамы һәм Вознесение тракты янындагы территорияләрдә төзелә) хезмәт күрсәтү өчен дә җитәрлек.

«Казанның энергосистемасының эше даими рәвештә салкыннар белән сынала. Көн саен без һәркайда җылылык бармы-юкмы икәнен тикшерүдән башлыйбыз. КТЭЦ-1 – Казанның энергосистемасының төп объектларының берсе, ул 750 торак йортны һәм 123 социаль объектны туендыра. Гомумән, салкыннар безне һәм кышка әзерлегебезне тагын бер тапкыр сыный. Ул әле башлана гына, аны проблемаларсыз узарбыз дип өметләнәбез», - дип билгеләде Илсур Метшин.

Мэр ассызыклаганча, бүген предприятиенең яхшы куәт запасы булдырылган, бу шәһәргә торак кварталларны үстерүне һәм эре объектлар төзүне планлаштырырга мөмкинлек бирә.

«КТЭЦ-1 не модернизацияләү нәтиҗәсендә микрорайоннар төзү өчен яңа мөмкинлекләр бар. Сүз Порт урамы турында бара, анда без бер миллион квадрат метрдан артык торак төзергә җыенабыз. Шулай ук өстәмә рәвештә «Горки» котельныен эшкә җигү планлаштырыла, шуның нәтиҗәсендә Вознесение тракты буйлап яңа торак микрорайоннар җылылык белән тәэмин ителәчәк. Халык һәрвакыт җылылык белән тәэмин ителсен өчен, уңышлы һәм авариясез эш телим», – дип мөрәҗәгать итте предприятие җитәкчелегенә Илсур Метшин.

Яңа микрорайоннарны җылылык белән ничек тәэмин итәргә планлаштырулары турында шәһәр башлыгына «Татэнерго» АҖ генераль директоры Раузил Хаҗиев һәм КТЭЦ-1 директоры Виталий Тюклин сөйләде. Алар сүзләренчә, елга порты янында микрорайонда барлыкка киләчәк барлык яңа объектлар КТЭЦ-1 куәтләре хисабына җылылык белән тәэмин ителәчәк. Моннан тыш, тиздән үзәк магистральга караган «Горки» котельныеннан җылылык энергиясе Вознесение трактында төзелә торган торак йортларга һәм социаль объектларга керәчәк.

Эшләр шул исәптән БРИКС саммитына (ул Казанда 2024 елның октябрендә узачак) әзерлек кысаларында үткәреләчәк. «Без чараның мөһимлеген аңлыйбыз, бу дөнья вакыйгасы. Төзелеш өчен документларыбыз әзер инде. Барысы да республиканың Төзелеш министрлыгы белән килештереләчәк», - диде Раузил Хаҗиев.

«КТЭЦ-1 – Казанның сулъяк яр буеның төп җылылык чыганагы. Ул «Горки» һәм «Азино» котельныйларыннан тора. Соңгысы 357 гектар мәйданны үз эченә ала, якынча ике миллион квадрат метр торак төзү планлаштырыла, бу сәгатенә 218 гигакалорий куллануны күздә тота», - дип өстәде Виталий Тюклин.

Шәһәр Мэрына төп бинада техник җиһазларны күрсәттеләр. Бүген КТЭЦ-1 нең билгеләнгән җылылык куәте 721 Гкал/сәг, ә электр куәте 453 МВт тәшкил итә. «Азино» һәм «Горки» котельныйларында җылылык куәте 460 Гкал/сәг һәм 200 Гкал/сәг дип бәяләнә.

ТЭЦ-1 нең җылылык энергиясен төп кулланучы булып Идел буе һәм Вахитов районнары халкы тора. Пик су җылыту котельныеның басым коллекторларыннан челтәр суы торак йортларны һәм предприятиеләрне җылыту, вентиляция һәм кайнар су белән тәэмин итү өчен җибәрелә. Мәсәлән, 1 нче номерлы җылылык үткәргеч буенча җылылык – Көньяк сәнәгать районына, 2 нче номерлы «Центр» җылылык үткәргече буенча Төньяк сәнәгать районына бирелә. Шулай ук пар рәвешендә җылылык белән берничә эре шәһәр предприятиесе тәэмин ителгән. Алар арасында – «Казан синтетик каучук заводы» АҖ, «Кварт» АҖ, «Татспиртпром» АҖ («Казан винзаводы» филиалы), «Нэфис Косметикс» АҖ, «Компас» НПО» ҖЧҖ.

2005 елда КТЭЦ-1 составына шәһәрнең көньяк-көнчыгыш өлешен җылылык белән тәэмин итү чыганагы булган «Азино» һәм «Горки» котельныйлары кертелде. «Азино» котельные 617 объектка хезмәт күрсәтә, шуларның 464 е – социаль әһәмияткә ия (торак йортлар, мәктәпләр, балалар бакчалары һәм сәламәтлек саклау учреждениеләре). Үз чиратында, «Горки» котельные Горки, Яңа Горки һәм «Родина» ТК микрорайоннарына исәпләнгән. Хезмәт 538 объектка, шул исәптән 412 социаль әһәмиятле объектка күрсәтелә.

Предприятие җитәкчелеге КТЭЦ-1 нең СССР заманнарыннан бирле стратегик әһәмияткә ия булуын ассызыклады. Мәсәлән, шәһәр башлыгына Бөек Ватан сугышы вакытында Германия разведчиклары төшергән сурәтләрне күрсәттеләр – сурәтләрдә Казан җылылык электр үзәк магистрале объектларын күрергә була.

Электр станциясе 1933 елда салынган. Ул Россиянең электрлаштыру буенча дәүләт комиссиясе планы буенча төзелә һәм СССРның халык хуҗалыгын үстерү буенча беренче бишеллык елларында илнең 518 удар төзелеше санына керә. КТЭЦ-1 төзелеше Казанда тулаем сәнәгать үсешенә һәм шәһәргә якын районнарга көчле импульс биргән.