Илсур Метшин: «2025 елда без инде 200 мең укучыны көтәбез»

(Казан шәһәре KZN.RU, 31 нче август, Диана Жиленкова). Белем көнендә Казанда алты мең укучыга дүрт яңа мәктәп ишекләрен ачачаклар, бу яңа шәһәр рекорды булачак. 1 нче сентябрь алдыннан ТР Рәисе 11 яңа мәктәпне кабул итү һәм файдалануга тапшыру тантанасында катнашты. ВКС режимында аңа Россиянең мәгариф министры Сергей Кравцов, «ВЭБ.РФ» дәүләт үсеш корпорациясе рәисе Игорь Шувалов һәм Казан Мэры Илсур Метшин да кушылды.

Сергей Кравцов: «Татарстан – мәгариф системасында лидер»

Катнашучыларны сәламләп, Россия мәгариф министры Сергей Кравцов 1 нче сентябрьдә илдә 160 яңа мәктәпнең ишекләре ачылачагын әйтте. Шул исәптән 25 мең урынга исәпләнгән 28 уку йорты 2019-2022 елларда Татарстанда «Мәгариф» илкүләм проекты буенча төзелгән. 

«Мондый күләмдә мәктәпләр, балалар бакчалары төзү беркайчан да булмады. Гомумән алганда, Татарстан – мәгариф системасында лидер. Илдә тормышка ашырылганнарның күбесен без республикадан алабыз. Рөстәм Нургалиевич, сезнең бөтен командагызга, шәхсән Үзегезгә рәхмәт белдерәсем килә. Бу бик кыска вакытта тоткарлыксыз нәтиҗәләргә ирешергә мөмкинлек бирә торган идарә», - диде РФ Мәгариф һәм фән министрлыгы башлыгы.

«Рәхмәт, Рөстәм Нургалиевич. Без сезнең белән бергә алынган теләсә нинди проект белән һәрвакыт уңышка ирешәбез. Тагын бер тапкыр сез идарә итү сәләтегезнең уникаль булуын расладыгыз. Татарстан тәҗрибәсе ил күләмендә таратылачак, бу безгә бөтен ил буенча мәктәпләрне файдалануга тапшырырга да ярдәм итәчәк», – дип ассызыклады «ВЭБ.РФ» дәүләт корпорациясе рәисе Игорь Шувалов.

ТР Рәисе Рөстәм Миңнеханов сөйләвенчә, илкүләм проектлар һәм федераль программалар ярдәмендә яңа уку елына 11 мәгариф объекты төзелгән, аларның гомуми суммасы 17 млрд сумнан артык.

«ПроШкола» ҖЧҖ, «ВЭБ.РФ» дәүләт корпорациясенең бүлендек структурасы белән хезмәттәшлекне аерым билгеләп үтәсем килә, конституцион килешүләр кысаларында ТРда өч мәктәп төзелде һәм ремонтланды, 5,7 млрд сумлык 139 мәктәп, 143 мәктәптә ике спорт залы һәм азык-төлек блогы җиһазландырылды», - дип сөйләде Рөстәм Миңнеханов. 

Казан Мэры Илсур Метшин, ул чарага Рауис Гәрәев урамындагы яңа мәктәптән кушылды, Белем көнендә шәһәр мәктәпләренә рекордлы санда укучылар киләчәген хәбәр итте. Парталар артына 174 мең мәктәп укучысы утырачак, шуларның 20 меңе – беренче сыйныф укучылары. Аның сүзләренчә, кайбер мәктәпләрдә 13-15 беренче сыйныф бар.

«2025 елда без инде 200 мең укучыны көтәбез. Казанда халык саны арта, безне яшь гаиләләр шатландыра. Шуңа күрә мәктәпләр, балалар бакчалары төзелешеннән башка бүгенге көнне күз алдына китерү кыен. Мин барыгызга да рәхмәт белдерәсем килә һәм, Сергей Сергеевич, сезгә илкүләм проект өчен. Без аның дәвамлы булачагына ышанабыз, балалар бакчалары һәм мәктәпләрнең саны артачак», - диде шәһәр башлыгы.

Быел ТР башкаласында яңа төзелгән микрорайоннарда алты мең балага дүрт мәктәп төзеделәр.

«Бу Салават Күпере, Светлая долина, Сибгат Хәким урамында һәм Ферма шоссесы районында, без хәзерге вакытта биредә. 17 мәктәп капиталь ремонтланды, ә Рәис программасы буенча без соңгы сигез елда яше 30 дан арткан 140 тан артык мәктәпне ремонтладык», – дип билгеләп үтте Мэр.

Р.Гәрәев урамындагы яңа мәктәп: ике бассейн һәм 750 урынлы ашханә

Рауис Гәрәев урамындагы 1501 урынга һәм 62 сыйныфка исәпләнгән яңа мәктәп 2019 елда ачылган 186 нчы күп профильле «Перспектива» лицееның өстәмә уку корпусы булачак. 1224 укучыга исәпләнгән проект куәте белән учреждениедә 2351 бала белем ала, шуңа күрә яңа объект аны бушатырга һәм яңа укучыларны кабул итәргә мөмкинлек бирәчәк. 

27 мең кв.м мәйданлы өч катлы бинада ике спорт залы һәм бассейн, 680 урынлы актлар залы, 750 урынлы ашханә һәм 680 кв.м мәйданлы төшке аш залы бар. Уку кабинетларына кирәкле җиһазлар кайтарылган, аларны интерактив техника һәм стационар компьютерлар белән җиһазландырганнар.

Биология, химия, физика, робототехника, технология, информатика дәресләрен үткәрү өчен махсус урыннар, мобиль сыйныфлар һәм цифрлы лабораторияләр белән җиһазландырылган лингафон кабинетлар каралган. Сәламәтлек мөмкинлекләре чикләнгән балалар өчен ике махсус лифт эшләячәк.

Китапханә тулысынча уку әдәбияты белән җиһазландырылган, аннан ике уку залында файдаланырга мөмкин булачак. Мәктәп укучыларына медицина ярдәме аерым табиб кабинеты булган махсус блокта күрсәтеләчәк. Мәктәп территориясендә шулай ук футбол һәм волейбол мәйданчыклары, хоккей тартмасы һәм тренажерлары булган зона урнашкан. 

Яңа уку елында мәктәптә профильле медицина, инженерлык һәм экология сыйныфлары ачылачак. Моның өчен лицей администрациясе республиканың көллиятләре һәм югары уку йортлары белән хезмәттәшлекне җайга салды. Гомумән алганда, учреждениедә 86 кеше укытачак.

С.Хәким, Курынов урамнарында һәм Салават Күперендә яңа мәктәпләр

Шул ук вакытта Сибгат Хәким урамында 1224 укучыга исәпләнгән 107 нче «Открытие» гимназиясе дә укучыларны кабул итәчәк, аның турында Авиатөзелеш һәм Яңа Савин районнары администрациясе башлыгы Фәнис Нурмөхәммәтов сөйләде. Өч катлы бинаның мәйданы 28 мең кв.м тәшкил итә. Педагогик состав 71 кешедән тора, дип билгеләде ул. 

Беренче катта ике бассейн һәм 612 урынга ашханә урнашкан. Икенче һәм өченче катларда 560 урынга исәпләнгән актлар залы һәм рәсем сәнгате белән шөгыльләнү өчен студия, ике спорт залы, ике уку залы булган китапханә җиһазландырылган.

Укучылар өчен волейбол, теннис һәм футбол кыры мәйданчыклары булдырылган. Белем бирү учреждениесе шулай ук сәламәтлек мөмкинлекләре чикләнгән балалар өчен дә җайлаштырылган.

Курынов урамында 1501 урынга исәпләнгән тагын бер уку йорты төзелә – ул М.И. Мәхмүтов исемендәге 184 нче мәктәпнең өстәмә корпусы булачак. Аның презентациясе белән Совет районы администрациясе башлыгы Роман Фәтхетдинов чыгыш ясады. Ул иске бинада – башлангыч сыйныфлар өчен дәресләр, ә яңа бинада бишенче сыйныфтан 11 нче сыйныфка кадәр дәресләр узачагын сөйләде.

Мәктәптә зур һәм кечкенә спорт заллары, ике бассейн, 612 урынга ашханә һәм 756 урынга актлар залы, табиб кабинеты белән медицина блогы һәм ике китап саклагычы һәм уку залы булган китапханә бар. 

Яңа учреждениенең концепциясе үсмерләргә һөнәри юнәлеш бирү булачак. Мәктәп укучыларын әкренләп төрле һөнәрләр белән таныштырачаклар, шуңа күрә тугызынчы сыйныфка аларның нинди һөнәри юл сайларга теләүләре турында күзаллаулары барлыкка киләчәк. 

Киров һәм Мәскәү районнары администрациясе башлыгы Сергей Миронов сөйләвенчә, 1501 урынга исәпләнгән 182 нче политехник лицейның өстәмә уку корпусы Салават Күпере микрорайонында төзелгән. Анда 1,4 мең 5-11 нче сыйныф укучысы белем алачак. Югары сыйныф укучылары өчен һөнәр сайлауга әзерлек өчен профильле лабораторияләр каралган.

Спорт блогы ике бассейнны, уен спорт залын, көрәш залын, скалодромны, ике хореография залын һәм киенү бүлмәләре һәм душ бүлмәләре белән тренажер залын, ул шул исәптән сәламәтлек мөмкинлекләре чикләнгән балалар өчен дә, үз эченә ала. 

Ашханә – 750 урынга, актлар залы 650 урынга исәпләнгән. Китапханә һәм табиб, стоматолог кабинеты һәм процедура кабинеты булган медицина блогы җиһазландырылган.

Исегезгә төшерәбез, соңгы биш елда 16,5 мең укучы өчен 16 мәктәп һәм өстәмә корпус һәм 32 балалар бакчасы төзелде. Соңгы 5 елда укучылар саны 33 меңгә артты.

Татарстан Республикасы башкаласында шулай ук мәгариф учреждениеләрен капиталь ремонтлау буенча системалы эш алып барыла. 10 ел эчендә 106 мәктәп һәм 88 балалар бакчасы яңартылды. Агымдагы елда 17 мәктәптә һәм җиде балалар бакчасында ремонт эшләре төгәлләнә.