И.Метшин Дәрвишләр бистәсендәге яңа балалар поликлиникасы турында: «Хастаханә түгел, ә сәламәтлек сарае»

(Казан шәһәре KZN.RU, 11 нче май, Юлия Летникова). Дәрвишләр бистәсендә балалар поликлиникасы төзелеше тәмамлана. Шул ук вакытта якындагы территориядә һәм мең кеше яши торган күрше ишегалларында да эшләр бара. Аларны «Безнең ишегалды» республика программасы буенча яңарталар. Дәрвишләр бистәсеннән һәм күрше поселоклардан 11,5 мең бала һәм яшүсмергә хезмәт күрсәтәчәк поликлиникада төзелеш эшләрен 1 нче июньдә тәмамларга планлаштыралар. Шуннан соң учреждениегә медицина җиһазлары һәм мебель китереләчәк. Бүген ТР төзелеш, архитектура һәм торак-коммуналь хуҗалык министры Марат Айзатуллин һәм Казан Мэры Илсур Метшин төзелеш мәйданчыгында һәм янәшәдәге территориядә эш барышын карадылар.

Травмпункт, көндезге стационар, ЛФК кабинеты һәм тоз бүлмәсе – поликлиникада нәрсә булачак?

6 нчы поликлиника филиалының дүрт катлы бинасы 6,4 мең кв.м мәйданны биләп тора. Медицина учреждениесенең зурлыгы заманча амбулатория өчен кирәкле барлык әйберләрне урнаштырырга мөмкинлек бирә. Поликлиника сменасына 180 кешегә исәпләнгән, анда 245 хезмәткәр – педиатрлар һәм тар профильле табиблар эшләячәк. 

«Яңа поликлиника – Дәрвишләр халкы өчен күптән көтелгән объект. 11,5 мең кеше моңа кадәр ата-аналарга да, балаларга да, безгә дә ошамаган шартларда хезмәт күрсәтелде. Тиздән объектны файдалануга тапшырачакбыз, - диде Казан Мэры. - Төзүчеләргә рәхмәт, балаларны яратып эшләдек. Һәм атмосфераның, дизайнның балаларны савыктыруга юнәлдерелгәнлеге күренә». Илсур Метшин ТР Рәисенә, ТР Төзелеш, архитектура һәм торак-коммуналь хуҗалык министрлыгына һәм ТР Сәламәтлек саклау министрлыгына ярдәмнәре һәм бердәм эшләре өчен рәхмәт белдерде, эшләрнең «Сәламәтлек саклау» илкүләм проекты буенча алып барылуын билгеләп үтте.  

Мэрга 6 нчы балалар поликлиникасының баш табибы Мансур Китаев сөйләгәнчә, бер урында пациентлар тупланмасын өчен, медицина учреждениесе бүлекчәләре блокларга бүленгән. Мәсәлән, беренче катта ресепшен, гардероб, уңайлы көтү зоналары һәм кафе урнашкан. Сөт кухнясы бирү зонасы, кабул итү бүлеге, инфекция блогы, лаборатория, травмпункт һәм рентген кабинеты каралган. 

Илсур Метшин һәм Марат Айзатуллин фойены карап чыктылар, аннан соң икенче катка күтәрелделәр, анда педиатрлар кабинетлары урнашкан – алар типик, иркен һәм якты. Поликлиникада 11 педиатрия участогы эшләячәк, уртача бер участок туганнан алып балигъ булганчыга кадәр мең балага хезмәт күрсәтә. Дәрвишләр халкыннан тыш, медицина учреждениесендә Чебакса, Нагорный, Абу-Даби, Киндери, Әки, Яңа Сосновка, Карьер, Колсәет, Научный городок һ.б. поселокларда яшәүче балалар да ярдәм ала алачак. 

Өченче катта көндезге стационар, тар профильле табиблар кабинетлары, тоз бүлмәсе, киенү бүлмәләре белән ЛФК кабинеты һәм физиотерапия кабинеты урнашкан. Көндезге стационар ике палатаны үз эченә ала – малайлар һәм кызлар өчен – һәркайсында 5 урын. «Стационар кирәк булганда берничә сменада эшләячәк. Аның үткәрү сәләте тәүлегенә 10 кешедән берничә тапкыр югарырак», – дип аңлатты ТР сәламәтлек саклау министры урынбасары – ТР ССМ Сәламәтлек саклау идарәсе башлыгы Владимир Жаворонков.  

Тоз бүлмәсе аерым игътибарга лаек – дәүләт поликлиникаларында мондый биналар гадәттә булмый. Тоз бүлмәсенә сулыш органнары авыруларын профилактикалау һәм дәвалау өчен керергә мөмкин, бу аеруча коронавирус белән авырган балалар өчен актуаль. Тоз бүлмәсе өчен генераторны инде алып килгәннәр, тиздән аны урнаштырачаклар. «Һәр объектның үз үзенчәлеге булуы бик яхшы. Бу поликлиникада яңалыклар тулы бер җыелма: ЛФК өчен иркен кабинет, көндезге стационар, травмпункт. Бу бик зур эш. Хастаханә түгел, ә сәламәтлек сарае», - дип ассызыклады И.Метшин. 

Балалар поликлиникасы һәм төзекләндерелгән ишегаллары бердәм киңлеккә әвереләчәк

Поликлиниканың яңа филиалына 33 мең кв.м мәйданлы 5 йорт тоташа. Алар 12 йортны берләштерә (Совет урамы, 19, 21, 23, 25; Халезов урамы, 4, 6; Правда урамы, 16, 20, 22, 24, 26, 28), анда мең казанлы яши. Медицина учреждениесе төзелгәннән соң, «Безнең ишегалды» республика программасы буенча янәшәдәге территорияне төзекләндерү турында карар кабул ителгән. 

Ишегалдын караганда Илсур Метшинга йортларда яшәүчеләрнең берсе мөрәҗәгать итте. Ул шәһәр башлыгына территорияне төзекләндергән өчен рәхмәт белдерде. «Эшләр бар әле, ләкин җәйнең башын яңартылган ишегалдында каршы алачакбыз», – дип җавап бирде Мэр. 

Совет районы администрациясе башлыгы Роман Фәтхетдинов сөйләгәнчә, июнь аенда ишегалларында асфальт ремонтланачак, яктырту системасы яңартылачак, кече архитектура формалары урнаштырылачак. Хәзер инде территориядә ике балалар мәйданчыгы һәм ике воркаут зонасы төзелгән. Өстәмә рәвештә ишегалларында 70 агач һәм 150 куак утыртылачак, шулай ук 13,4 мең кв.м мәйданда газон чәчеләчәк. Койма һәм җылылык пункты граффити белән бизәләчәк.  

Агымдагы һәм капиталь ремонт программалары буенча «ТКХ Дербышки» идарәче компаниясе фасадны, керү төркемнәрен, йортларның нигез кырларын һәм түбәсен яңартачак. Шулай ук «Казэнерго» АҖ 14 җылылык камерасын реконструкцияли һәм 80 погон метр озынлыктагы җылылык трассасы торбаларын алыштыра. 

Аннары шәһәр башлыгы «Смородина» торак комплексы янында төзелә торган мунча комплексында булды. Аны шулай ук Дәрвишләр халкы көткән – ул берничә ел элек авария хәлендә булу сәбәпле эшләми башлаган. 

Исегезгә төшерәбез, Дәрвишләр балалар поликлиникасы филиалын ачудан тыш, Чебакса торак массивында гомуми практика табибы һәм педиатр үзәген төзү планлаштырыла. Көз башына Казанда 7 нче госпиталь янында перинаталь үзәк ачылачак. Моннан тыш, Гаврилов урамындагы 1 нче балалар хастаханәсен проектлау дәвам итә. 

«Безнең ишегалды» программасы буенча быел 482 йортның территориясе төзекләндереләчәк, үзгәрешләрне Казанда яшәүче 100 меңгә якын кешене бәяли алачак. Бүгенге көндә 136 йортта эшләр алып барыла – программа 17,2% ка үтәлгән.