Илсур Метшин – Владимир Путинга: «Барысы да дөньяга көнбатыш күзлеге аша карарга теләми»

(Казан шәһәре KZN.RU, 20 нче апрель, Диана Жиленкова). Бүген Россия Президенты Владимир Путин видеоэлемтә режимында Җирле үзидарәне үстерү советы утырышын уздырды. Чарада Казан Мэры Илсур Метшин катнашты. Ул федераль дәрәҗәдә кабул ителгән системалы карарлар ярдәмендә Татарстан башкаласында нинди үзгәрешләр булганы турында сөйләде, шулай ук «Берләшкән шәһәрләр һәм җирле хакимиятләр» бөтендөнья оешмасы кысаларында халыкара хезмәттәшлек темасын күтәрде.

Дәүләт башлыгына мөрәҗәгать итеп, Илсур Метшин муниципалитетларга системалы игътибар биргәне өчен рәхмәт белдерде. Шулай итеп, 15 ел элек Иминлек советының күчмә утырышында Торак фондын капиталь ремонтлау программасы турында карар кабул ителде. ТР башкаласында барлыгы 3,5 мең йорт яңартылган – бу ихтыяҗның 85% ы. «Бернинди муниципалитет та, бернинди шәһәр дә моны булдыра алмас иде», – дип ассызыклады И.Метшин. Ул илкүләм проектларны гамәлгә ашыру һәм май указлары, шулай ук коммуналь челтәрләрне капиталь ремонтлау программасы өчен рәхмәт белдерде. 

Соңгы 10 елда шәһәрдә 14 мәктәп, 91 балалар бакчасы, дистәләгән социаль объектлар төзелә, 42 парк булдырылган. Бу чорда халык саны үсеше 132 мең кеше тәшкил иткән. «Безнең халык бу авыр вакытта бернинди социаль программа да туктатылмавына бик сөенә, кадерен белә», – дип билгеләп үтте Илсур Метшин. 

Казан Мэры муниципалитетларның халыкара эшчәнлегенә аерым тукталды. Ул 20 ел дәвамында Россиянең дистәләгән шәһәрләренең «Берләшкән шәһәрләр һәм җирле хакимиятләр» оешмасында актив эшләвен искәртте. «Муниципалитетлар иң яхшы практикалар белән алмашалар һәм территорияләрне тотрыклы үстерү максатларын тормышка ашыралар, - дип билгеләп үтте И.Метшин. Илебезне барлык фронтлар – сәясәт, икътисад, спорт, мәдәният – буенча изоляцияләргә тырышу шартларында бу оешманы да Россиягә каршы трибунага әйләндерергә тырышулар булды». 

Ул ноябрьдә оешманың Көньяк Кореядагы Бөтендөнья советында булган хәл турында сөйләде, анда 140 илнең муниципалитетлары җыелды. Безнең коллегаларыбыз Латин Америкасы, Африка, Якын Көнчыгыш, Тын Океан төбәге, Кытай Халык Республикасы бердәм фронт белән Россияне яклаганда без бик гаҗәпләндек. Казан йөзендә без 300 мең муниципалитетны берләштерә торган БМОның җирле үзидарә буенча Консультатив комитетына сайланган. Һәм Сенегалдан коллегабызның чыгышы бик әһәмиятле булды, ул Европа һәм океан аръягындагы безнең белән дустанә булмаган илләр – бу нибары 700 миллион халык, ә дөньяда 7 миллиард кеше яши дип әйтте. Алар миннән сезгә рәхмәт сүзләре һәм уңышлар җиткерүемне сорадылар! Барысы да дөньяда нәрсә булганын көнбатыш күзлеге аша карарга теләми, һәм алар безгә теләктәшлек күрсәтәләр. Мин сезгә бу хакта хәбәр итәргә теләдем». 

И.Метшин искәрткәнчә, 2024 елда Казан БРИКС саммитын кабул итәчәк. «Әлеге чараны әзерләүгә керешү безнең өчен зур дәрәҗә. Аны лаеклы дәрәҗәдә уздырырбыз дип өметләнәбез. Бу безнең халыкара көн тәртибебездә яңа бит булачак», - дип билгеләп үтте Мэр. 

Россия президенты Илсур Метшин чыгышыннан соң: «Күпполярлыкка омтылыш котылгысыз, ул көчәя генә барачак. Моны аңламаган кешеләр бу трендта булмаячак һәм җиңеләчәк. Бу тулаем ачык факт. Моңа комачауларга тырышучылар өстәмә проблемалар белән генә очрашачак. Без үз юлыбыз буенча барабыз һәм яхшы нәтиҗәләр күрсәтәбез. Безнең бурыч – алга баруны арттыру». 

Утырышның көн тәртибенә муниципаль хезмәтнең кадрлар потенциалы мәсьәләләре, муниципаль берәмлекләрнең киңлек үсеше бурычлары һәм җирле үзидарәнең бердәм иҗтимагый хакимият системасындагы эш үзенчәлекләре керде. 

Мәсәлән, Владимир Путин махсус хәрби операциядә катнашучыларның гаиләләренә ярдәм итүгә игътибар итте. Дәүләт башлыгы сүзләренчә, муниципалитетлар һәм аларның хезмәткәрләре монда аерым роль уйный. «Минем моны ассызыклап үтәсем килә: мондый гаиләләрнең һәрберсенең ихтыяҗларын белергә кирәк – безнең сугышчылар үз балалары, хатыннары, әти-әниләре өчен тыныч булсын өчен, һәр шундый гаиләгә, актив, реаль ярдәм күрсәтергә», - диде ул. 

РФ Президенты ассызыклаганча, эшнең төп өстенлеге – халыкның иминлеген һәм тормыш сыйфатын арттыру. Цифрлаштыру гражданнар һәм хакимият арасындагы кире элемтәнең сыйфатын һәм нәтиҗәлелеген күтәрсә дә, шәхси элемтәләр һәм очрашулар турында онытмаска кирәк. Шул ук вакытта ил халкының төрле карарлар кабул итүдә турыдан-туры катнашуы да мөһим. 

Шулай ук Владимир Путин җирле үзидарәнең ныклы кадрлар нигезе һәм яшь белгечләрне җәлеп итү кирәклеген билгеләп үтте. «Сыйфатлы яңадан әзерләү, муниципаль хезмәткәрләрнең квалификациясен күтәрү дә әһәмиятле, ягъни лидерлык компетенцияләрен һәм проект белән идарә итү күнекмәләрен үстерү турындагы сорауга җавап бирергә кирәк», – диде дәүләт башлыгы. 

Утырыш ахырында В.Путин муниципаль берәмлекләр җитәкчеләренә ил үсешенә керткән өлешләре өчен рәхмәт белдерде, шулай ук якынлашып килүче бәйрәм – Җирле үзидарә көне белән котлады. Чарада шулай ук РФ Хөкүмәте рәисе урынбасары Марат Хөснуллин, РФ икътисади үсеш министры Максим Решетников, РФ финанс министры Антон Силуанов һәм башкалар катнашты. 

Исегезгә төшерәбез, күптән түгел Илсур Метшин Россия Президенты каршындагы җирле үзидарәне үстерү советының яңартылган составына кертелде. Указга дәүләт башлыгы Владимир Путин кул куйды.