И.Метшин: «Без капиталь ремонтлау белән генә чикләнеп калмыйча, балалар өчен социаль объектларны да яңа дәрәҗәгә чыгарачакбыз»

(Казан шәһәре KZN.RU, 17 нче апрель, Диана Жиленкова). 2022 елда Казан Башкарма комитетының Капиталь төзелеш һәм реконструкция идарәсе 28 социаль объектны проектлау, төзү, реконструкцияләү һәм капиталь ремонтлау буенча заказчы булып тора. Капиталь ремонтланган биналар арасында Чайковский исемендәге 1 нче номерлы музыка мәктәбе, Мәүлетов урамындагы 13 нче китапханә, «Игелекле Казан» һәм ветераннар советы урнашкан Сеченов урамындагы бина бар. Барлык объектлар буенча 722,5 млн сумлык эш актлары кабул ителде, дип хәбәр итте эшлекле дүшәмбедә идарә башлыгы Марат Сәмигулин.

Порт урамы районында яр буе булдыру буенча проект-смета документациясе эшләнә башлый

«Безне ишеткәннәре өчен республика хөкүмәтенә, коллегаларга һәм шәхсән Татарстан Рәисе Рөстәм Миңнехановка рәхмәт белдерәсем килә, – диде Казан Мэры Илсур Метшин. - Без даими рәвештә социаль инфраструктура объектлары буенча сораулар куябыз, тиешлесен бирергә кирәк – алар буенча озак төзелешләр юк. Шул ук музыка мәктәбе буенча сроклар бераз күчерелә, ләкин алар бары тик барысын да тиешле дәрәҗәдә эшләү теләге белән генә бәйле. Бу исә – я тавыш җиһазлары, я тавыш изоляциясе. Махсус операция башланган чорда материаллар белән тәэмин итү белән проблемалар булды. Ләкин бүгенге көндә бу сораулар хәл ителде». 

Әйтик, узган ел Чайковский исемендәге 1 нче балалар музыка мәктәбенә капиталь ремонт ясалды, аның бинасы республика әһәмиятендәге мәдәни мирас объекты булып тора. Мәүлетов урамындагы 13 нче китапханә дә яңартылган. «Без бинаны гына түгел, ә китапханә фондын тулыландырырга, җиһазларны тулысынча алыштырырга, музыка мәктәпләрен җиһазлар белән тәэмин итәргә тырышабыз. Шуңа күрә бу безнең мәктәптән тыш эшебезнең бөтенләй яңа дәрәҗәсе, һәм без капиталь ремонтны гына түгел, балалар өчен социаль объектларны да яңа дәрәҗәгә күтәрүне дәвам итәчәкбез», – дип ассызыклады Илсур Метшин.  

Марат Сәмигулин сөйләвенчә, Шәһәрне үстерү институты (Достоевский урамы, 35) урнашкан бинаны капремонтлау буенча сезонлы эшләр тәмамлануга якынлаша. Кремль урамындагы «Шәһәр Думасы биналары комплексы» мәдәни мирас объектларын һәм Алиш исемендәге шәһәр балалар иҗаты сараен ремонтлау буенча проект-смета документациясе эшләнгән. Шулай ук Порт урамы районында ярны ныгыту һәм яр буе булдыру буенча проект-смета документациясен эшләү башланды. 

2023 елда Баруди урамындагы китапханәне һәм 2 нче музыка мәктәбе капиталь ремонтланачак

Быел Яңа Савин районындагы 49 нчы мәктәп территориясендә спорт залы һәм ачык типтагы физкультура-сәламәтләндерү комплексы булган корпус төзелешен тәмамлау планлаштырыла. Үзәктә сәламәтлек мөмкинлекләре чикле балалар спорт белән шөгыльләнә алачак. 

Илсур Метшин билгеләп үткәнчә, Казанда инклюзияне үстерү эшнең иң мөһим өстенлекләренең берсе булып тора. Ул искә төшергәнчә, элегрәк 49 нчы мәктәп каршында сәламәтлек мөмкинлекләре чикле укучылар һәм балалар өчен «МастерОК» иҗади ял үзәге ачылган иде. Шулай итеп, объект үзенчә бер инклюзия кластеры булачак.  

Моннан тыш, «Игелекле Казан» (Себер тракты, 28) өчен биналарны капиталь ремонтлауны тәмамлау планлаштырыла, анда сәламәтлек мөмкинлекләре чикле балалар һәм аларның ата-аналары өчен инклюзив үзәк барлыкка киләчәк. Бинада коворкинг, балалар бүлмәсе, психолог кабинеты һәм тегү цехы урнашачак. Аерым алганда, үзенчәлекле балалар өчен кием тегү эше белән Казан шәһәр Думасы депутаты Далия Гайнанова шөгыльләнә. «Остаханәгә заказлар республикадан һәм хәтта илдән читтән дә килә. Шуңа күрә бу проектны һичшиксез хуплыйбыз һәм быел аны гамәлгә ашырачакбыз», - диде Мэр. 

2023 елга планнарда – 2 нче балалар музыка мәктәбе бинасын капиталь ремонтлауны тәмамлау һәм Галимҗан Баруди урамындагы китапханәне яңарту. Кремль урамындагы 1 нче бинада ремонт-реставрация эшләре тәмамланачак, Достоевский урамы, 35 адресы буенча биналар комплексын яңарту дәвам итәчәк.  

Кремль урамындагы 7 нче номерлы бинаны реконструкцияләү барышында зур күләмдә эшләр башкарырга планлаштыралар. «Бу итексез итекче очрагы», – диде Илсур Метшин. - Без озак вакыт тарихи бинабызны капиталь ремонтлауны кичектереп тордык. Кызганычка каршы, бу безне бизәмәде. Ләкин зур инвестицияләр кирәк иде, без узган ел аны туплый алдык». 

Мэр сүзләренчә, реставрация проекты эшләнгән, бүгенге көндә актив эш алып барыла. Киләчәктә яңартылган бинада Мәгълүмати технологияләр һәм элемтә идарәсе һәм Казан Башкарма комитетының Кадрлар сәясәте идарәсе урнашачак. «Кадрлар барысын да хәл итә, ә цифрлаштыру буенча кабул ителгән карарлар структураларыбыз һәм бүлекчәләребезнең эшен яхшырта, Казан халкы һәм бизнес өчен гамәлгә ашырган һәм якын киләчәктә гамәлгә ашырырга җыенган проектлар уңайлырак була бара. Ремонттан соң, әлбәттә, төзекләндерү үткәрәчәкбез һәм быел Казан халкын һәм үзәктә булырга яратучы күпсанлы кунакларны сөендерербез дип өметләнәбез», – дип нәтиҗә ясады шәһәр башлыгы.