И.Метшин: «Казанның Ислам хезмәттәшлеге оешмасының яшьләр башкаласы исеменә лаек булуы белән горурланам»

(Казан шәһәре KZN.RU, 16 нчы декабрь, Юлия Летникова). Б.Рәмиев исемендәге IT-паркта «Ислам хезмәттәшлеге оешмасының яшьләр башкаласы – Казан 2022» халыкара программасын ябу тантанасы булды. Чарада гамәлгә ашырылган проектларга йомгак ясадылар, халыкара багланышлар юнәлеше буенча планнар билгеләделәр, алга таба хезмәттәшлек турында фикер алыштылар һәм «Ислам хезмәттәшлеге оешмасы илләренең яшьләр лидерлары» премияләрен тапшырдылар. Тантанада Казан Мэры Илсур Метшин катнашты.

Бәйрәм чарасы 30 дан артык ил вәкилләрен берләштергән түгәрәк өстәлдән башланды. Очрашуда катнашучылар Казанда узган иң зур чараларны искә алдылар. Ел дәвамында республикада 1000 нән артык кеше катнашында 10 масштаблы халыкара вакыйга үткәрелде. Алар арасында – Казан глобаль яшьләр саммиты, Коръән уку конкурсы, Ислам хезмәттәшлеге оешмасы илләренең фәнни конгрессы һәм Ислам хезмәттәшлеге оешмасы илләренең киберспорт буенча чемпионаты. 

Сәламләү сүзе белән Казан Мэры Илсур Метшин мөрәҗәгать итте. Казан башлыгы билгеләп үткәнчә, шәһәр Ислам хезмәттәшлеге оешмасының күзәтүче-илләр арасында Ислам хезмәттәшлеге оешмасы – 2022 яшьләр башкаласы статусына юктан гына беренчеләрдән булып ия булмаган. «Казанны юкка гына исламның төньяк башкаласы дип атамыйлар – ул шәһәр ДНКның, тарих һәм мәдәниятнең мөһим өлеше. Ислам хезмәттәшлеге оешмасының яшьләр башкаласы статусы быел Идел буе Болгарстанында ислам динен кабул итүгә 1100 ел тулу һәм Казанда тарихи традицияләр буенча чыгарылган беренче басма Коръәннең 500 еллыгы уңаеннан аерым әһәмияткә ия булды», - дип ассызыклады ул. 

Шәһәр башлыгы сүзләренә караганда, катлаулы сәяси вәзгыять шартларында яшьләр көн тәртибендәге актуаль мәсьәләләр турында турыдан-туры диалог барышында фикер алышу һәм дустанә илләр вәкилләре белән тәҗрибәләр алмашу мөмкинлеге булуы аеруча кыйммәтле. «Ислам дөньясы илләренең Россия белән конструктив диалогны үстерүе куанычлы», - дип өстәде ул. Илсур Метшин яшьләр хезмәттәшлеге илләр арасындагы хезмәттәшлекнең мөһим өлеше дип саный. «Ышанам ки, бу киләчәктә дә Россия белән Ислам хезмәттәшлеге оешмасы илләре арасындагы мөнәсәбәтләрне ныгытуга ярдәм итәчәк», – диде шәһәр башлыгы. 

Түгәрәк өстәлдә катнашучыларга шулай ук ТР Премьер-министры урынбасары Ләйлә Фазлыева мөрәҗәгать итте. «Бүген без йомгак ясыйбыз, әмма бу юнәлештә эшнең киләсе елда да дәвам итәчәгенә ышанабыз. Казан мәңгегә яшьләр башкаласы булып калачак», - диде ул һәм спикерларга уртак эшләре өчен рәхмәт белдерде. Аның мөрәҗәгатен ТР Яшьләр эшләре министры Тимур Сөләйманов тулыландырды. Ул быел Казанда узган иң зур чараларның киләчәктә шәһәрдә даими рәвештә үткәреләчәген әйтте. 

Азәрбайҗан яшьләр һәм спорт министры урынбасары Индира Гаджиева узган чаралар турындагы фикерләре белән уртаклашты. Ул билгеләп үткәнчә, Казан Ислам хезмәттәшлеге оешмасының яшьләр башкаласы статусына яңа мәгънә өстәде һәм ел дәвамында үз бурычларын яхшы башкарды. «Иң мөһиме, сез яшьләр проблемаларына басым ясадыгыз», - дип ассызыклады И.Гаджиева. 

Ислам хезмәттәшлеге оешмасының яшьләр форумы президенты Таха Айхан Казан тәҗрибәсенең яшьләр башкаласы статусына ия булучылар өчен үрнәк булачагын билгеләп үтте. «Хәзер эстафетаны Африка континенты кабул итә. Биредә яшәүчеләр киләсе елда Ислам хезмәттәшлеге оешмасы яшьләр башкаласының кайда булачагын инде хәл итә. Без Татарстанда эшләтеп җибәргән проектларның җәмгыять үсеше өчен зур әһәмияткә ия булачагына һәм башка илләргә дә таралачагына ышанам», - диде ул. 

Түгәрәк өстәл барышында шулай ук РФ Тышкы эшләр министрлыгының мөселман дәүләтләре оешмалары белән багланышлар буенча махсус вәкиле Константин Шувалов, РФ фән һәм югары белем министры урынбасары Айрат Гатиятов та мөрәҗәгать итте. 

IT-парк конференц-залындагы түгәрәк өстәлдән соң «Ислам хезмәттәшлеге оешмасы илләренең яшьләр лидерлары» премиясен тапшыру тантанасы башланды. Елның яшь өйрәнүчеләре Нигердан Мутари Сулей Калло һәм Төркиядән Эркоч Байдар Туба булды. «Ел фотографиясе» номинациясендә җиңүне Бангладештан Мд Назмул Хасан Хан, ә «Елның яшь медиа-инфлюенсеры» номинациясендә Алжирдан Хубайб Куас яулады. «Елның яшь социаль эшкуары» номинациясендә бүләкне Азәрбайҗаннан Сара Раджабли һәм Буркина-Фасодан глобаль яшьләр илчесе Абдул-Фатау Маига алды. Оештыручылар шулай ук гавами дипломатия буенча проектның иң яхшы авторын сайладылар, ул Иорданиядән Рама Ассаф булды. «Елның яшь этноспортчысы» номинациясендә Татарстан вәкиле, билбау көрәше буенча ике тапкыр дөнья чемпионы Азат Нурмөхәммәтов җиңде. Ислам мәдәниятенең һәм сәнгатенең иң яхшы яшь илчесе Индонезия җырчысы Ихтиар Ринрин Тарапти булды. 

«Мин Казанның Ислам хезмәттәшлеге оешмасының яшьләр башкаласы исеменә лаек булуы белән горурланам. Ел пуля кебек үтте. Вакыйгалар 70 илдән вәкилләрне берләштерде, алар Казанга иң яхшы тәҗрибәләр белән уртаклашырга килделәр, – диде Илсур Метшин. - Һәр чарадан соң безнең дусларыбыз кала. Мондый авыр вакытта тормышны яхшы якка үзгәртәчәк мөнәсәбәтләр формалашуы бик шәп. Яшьләр башкаласы статусы безнең белән мәңгегә калачак. Без яшьләр тормышларын яхшы якка үзгәртә алсын өчен барысын да эшләячәкбез». 

Исегезгә төшерәбез, Казанга Ислам хезмәттәшлеге оешмасы – 2022 яшьләр башкаласы статусын бирү турында карар узган елның ноябрендә Ислам хезмәттәшлеге оешмасы яшьләр форумы идарәсе утырышында кабул ителгән иде. Төрле елларда бу югары статуска Истанбул (Төркия), Шираз (Иран), Путраджая (Малайзия), Фес (Марокко), Доха (Катар) кебек шәһәрләр ия булдылар.