Казанда яшәүче ике хатын-кыз «Ана даны – Материнская слава» медале белән бүләкләнде

(Казан шәһәре KZN.RU, 22 нче ноябрь, Зилә Гайфи). Татарстан башкаласы Мэры Илсур Метшин бүген Казан шәһәр Думасының XVIII сессиясендә муниципаль һәм дәүләт бүләкләрен тапшырды.

ТР башкаласының социаль-икътисади үсешенә зур өлеш керткәне, актив иҗтимагый һәм хәйрия эшчәнлеге өчен «Бәхетле-1» ҖЧҖ генераль директоры Мөслимә Латыйповага Казанның мактаулы гражданы исеме бирелде. «Исегезгә төшерәбез, XVI сессиядә без аның кандидатурасын хупладык һәм Казан шәһәр Думасының тиешле карарын кабул иттек», – дип билгеләде Мэр.

«Хөрмәтле Илсур Рәис улы, депутатлар, чакырылган кунаклар! Әлеге югары бүләк өчен сезгә рәхмәтемне белдерәм. Җирдәге иң матур һәм яраткан шәһәрнең Мактаулы гражданины булу – ул мактаулы, дәрәҗәле, җаваплы. Минем фикерем белән барысы да килешә дип уйлыйм. Барыбызга да үзебезне күрсәтү өчен яңа мөмкинлекләр, яңа бүләкләргә лаек булуыбызны телим, хезмәтебезнең нәтиҗәләре кирәкле һәм файдалы булсын, алга таба яңа казанышлар өчен трамплин булып хезмәт итсен. Быел компаниягә 25 ел булачак, биредә мин үтенеч белән мөрәҗәгать итмәгән кешеләр аз, җавап һәрвакыт уңай булды. Барыгыз алдында да баш иям һәм зур рәхмәт», – диде Мөслимә Латыйпова.

«Бәхетле-1» ҖЧҖ генераль директоры үз чыгышында хәйриячелеккә аерым игътибар бирде. «Без барыбыз да 90 нчы елларны хәтерлибез, ярдәм сораучыларга булыштык. Ул чакта барысы да хәйриячелекнең максатка ярамаган булуын аңлады. Мохтаҗларга адреслы ярдәм күрсәтергә теләгем туды, социаль ашханә булдыру идеясе килде. Бу идея белән Илсур Рәис улына мөрәҗәгать иттем, бу 2005 ел ахыры иде. Ул ярдәм итеп кенә калмады, үстерергә теләде, шулай ук актив ярдәм итте», – дип ассызыклады ул.

Шулай ук фән үсешенә, илнең югары белеменә, Россиянең авиация потенциалын арттыруга һәм югары квалификацияле белгечләр әзерләүгә зур өлеш керткәне өчен Туполев исемендәге Казан илкүләм тикшеренү техник университеты – КАИ Казанның Мактау китабына кертелде.

Ректор вазыйфаларын башкаручы Тимур Алибаев чарада катнашучыларга рәхмәт сүзләре белән мөрәҗәгать итте. «Унҗиде меңлек коллектив, укытучылар, фәнни хезмәткәрләр, студентлар исеменнән Татарстан Республикасы башкаласы үсешенә керткән өлешебезне бәяләгән өчен рәхмәт белдерәм. Үз вакытында Казан авиация заводы төзелешенә 100 мең кешенең килүе гаҗәпләндерде, ә Казанда бу вакытта 200 мең кеше яши иде.

Һәм менә 30 нчы елларда безнең вуз авиация, вертолет, мотор заводлары белән берлектә Казанда техник фикер, тикшеренүләр югарылыкта булсын өчен бик күп эш башкарды. Безнең уку йортын тәмамлаучылар бүген зур ватаныбызның барлык почмакларында да эшли, алар һәрвакыт Казанны һәм биредә үткәрелгән елларны искә алалар. Хәзерге вакытта безнең вуз шәһәр һәм республика хакимияте ярдәме белән файдаланды, без әлеге ярдәмне бүген дә тоябыз, үзебезгә бик югары максатлар куябыз. Сезне ышандырып әйтим, безнең вуз һәрвакыт Казанны студентлар, яшьләр, югары белем бирү, фән һәм технологияләр шәһәре буларак танытачак. Казан белән КАИ һәрвакыт югарылыкта булачак», – диде ул.

Күпьеллык нәтиҗәле эшчәнлеге өчен «Фидакарь хезмәт өчен» медале белән хезмәт ветераны («Шатлык» балалар сөт кухнясы челтәренең элеккеге директоры) Тәнзилә Иштирәкова бүләкләнде.

11 елдан артык 99 нчы номерлы балалар бакчасында кече тәрбияче булып эшләүче, җиде бала анасы Лиса Арслан балаларны тәрбияләүдә һәм гаилә традицияләрен ныгытуда күрсәткән хезмәтләре өчен «Ана даны – Материнская слава» медале белән бүләкләнде. Шулай ук «Ана даны – Материнская слава» медале белән алты бала анасы, 103 нче балалар бакчасының 22 еллык стажлы педагог-психологы Гөлнара Вәлиуллина бүләкләнде.

Намуслы хезмәте һәм оптик-электрон системаларны эшләүгә керткән өлеше өчен «Казанның мактауга лаеклы хезмәте өчен» билгесе белән «ГИПО» фәнни-җитештерү берләшмәсе» АҖ сынаулар бригадасының радиоэлектрон аппаратура һәм 6 нчы разрядлы приборлар көйләүчесе Владимир Архипов бүләкләнде.

Күпьеллык нәтиҗәле хезмәте һәм сәнәгать тармагын үстерүгә керткән өлеше өчен Республика Президентының Рәхмәте Казан дәүләт казна дары заводының 7 нче цех остасы Андрей Изгаровка белдерелде.

Күпьеллык нәтиҗәле хезмәте һәм транспорт системасы үсешенә керткән өлеше өчен Казан Мэрының Рәхмәте «ПАТП-2» МУП автобус йөртүчесе Равил Баһавиевка белдерелде.

Торак-коммуналь хуҗалык тармагын үстерүгә керткән өлеше һәм күпьеллык нәтиҗәле хезмәте өчен «Татарстан Республикасының Атказанган торак-коммуналь хуҗалыгы хезмәткәре» исеме «Шәһәр төзекләндерү» муниципаль унитар предприятиесенең юллар белән тәэмин итү идарәсе участогы җитәкчесе Латыйп Хафизовка бирелде.

Намуслы хезмәте өчен Республика Президентының Рәхмәте Казанның азык-төлек һәм социаль туклану департаментының 1 нче номерлы ашханәсе администраторы Айгөл Бәшировага белдерелде.

Күпьеллык нәтиҗәле хезмәте һәм һөнәри эшчәнлектәге казанышлары өчен Татарстан Республикасы Президентының Рәхмәте Киров һәм Мәскәү районнары администрациясенең сатып алулар бүлегенең баш белгече Ирина Остальцевага белдерелде.

Намуслы хезмәте һәм сайлау системасы үсешенә керткән өлеше өчен «Казан файдасына хезмәт һәм батырлык өчен» мактау билгесе Казан сайлау комиссиясе рәисе Фәрит Гәрәевка тапшырылды.

Намуслы хезмәте һәм төзелеш тармагын үстерүгә керткән өлеше өчен «ДиВиЭм групп» ҖЧҖ директоры урынбасары Снежана Кирилюк Казанның Мактау грамотасы белән бүләкләнде.

ТРның социаль-икътисади потенциалын ныгытуга керткән өлеше һәм күпьеллык нәтиҗәле хезмәте өчен «Водоканал» МУП директоры Андрей Егоров «ТАССР төзелүгә 100 ел» медале белән бүләкләнде.

Күпьеллык нәтиҗәле хезмәте өчен Казан Башкарма комитеты Аппаратының Муниципаль архив идарәсе җитәкчесе Гөлнара Мусинага Казанның Мактау грамотасы тапшырылды.