Илсур Метшин: «Әлеге балалар бакчасының фасады Казанда иң гадәти булмаган фасад исеменә дәгъва кыла»

(Казан шәһәре KZN.RU, 23-нче ноябрь, Ксения Швецова). Казанның Мәскәү районында урнашкан тәрбия һәм укыту татар телендә алып барыла торган катнаш төрдәге 126-нчы номерлы балалар бакчасы корпусларының берсен капиталь ремонтлау төгәлләнде. Тунаков урамында урнашкан 80 еллык тарихы булган мәктәпкәчә белем бирү учреждениесе танымаслык булып үзгәрде. Башкарылган эшләрнең сыйфатын Татарстан башкаласы Мэры Илсур Метшин бәяләде. «Капиталь ремонттан соң гадәти булмаган фасад белән уникаль балалар бакчасы барлыкка килде, бу хәтта яңага караганда да яхшырак. Хәзер бу учреждениенең фасады Казанның мәктәпкәчә белем бирү учреждениеләре арасында иң матур һәм гадәти булмаган фасад исеменә дәгъва кыла, – диде шәһәр башлыгы.

Тунаков, 53а адресы буенча урнашкан, мәйданы 455,2 кв. м тәшкил иткән 126-нчы номерлы балалар бакчасының ике катлы бинасы 1943 елда төзелгән һәм элек аңа бер тапкыр да капиталь ремонт ясалмаган. Мәктәпкәчә белем бирү учреждениесенең корпусы 60 урынга исәпләнгән, биредә тәрбияләнүчеләрнең 3 төркеме оештырылган. Моннан тыш, балалар бакчасының Восстание урамы, 44а адресы буенча урнашкан икенче корпусы да бар.

«Балалар бакчасының ремонтка кадәр нинди булганын хәтерлим – бүген аны танып булмый, – диде Мэр. – Бина сугыш елларында төзелгән булган, ул вакытта, кыенлыкларга карамастан, балаларга шулай ук зур игътибар бирелгән. Бина сакланган һәм безнең көннәргә кадәр килеп җиткән. Бу коллективның сакчыл мөнәсәбәте һәм аның балаларга булган мәхәббәте турында сөйли, шулай ук төзелеш эшләренең югары сыйфатын раслый, кайбер туган якны өйрәнүчеләр әйтүенчә, төзелештә әсиргә алынган немецлар катнашкан».

Балалар бакчасын капиталь ремонтлауга 47 млн сумнан артык акча бүлеп бирелгән, подрядчы булып «Викара» җаваплылыгы чикләнгән җәмгыяте торды. Эшчеләр бинаның түбәсен, фасадын яңартты, тәрәзәләрен алыштырды, инженерлык челтәрләрен ремонтлады, җиһазларны алыштырды. Моннан тыш, бүлеп бирелгән акчаларга территорияне төзекләндерделәр һәм яңа беседкалар урнаштырдылар.

Бина һәм мәктәпкәчә учреждениенең барлык территориясе тәүлек әйләнәсе видеокүзәтү астында, бүлмәләр аварияле чыгу юллары белән җиһазландырылган, дип сөйләде Мэрга балалар бакчасы мөдире урынбасары Ралинә Хәбибуллина.

Мэр нәниләр бүлмәләрен карады, аларның һәркайсында үз санузелы, ванна бүлмәләре, шулай ук балаларга яңартылган азык-төлек блогында әзерләнгән ризыкны тарату почмагы бар.

Балалар бакчасы диварларына рәсемнәр ясалган, алар балаларга татар алфавитын һәм саннарын өйрәнергә ярдәм итә. Моннан тыш, мәктәпкәчә белем бирү учреждениесе интерактив уен комплексы урнаштыруга грант откан. Анда балалар уеннарда уйный, биремнәр үти һәм бер үк вакытта телләр өйрәнә ала.

Шәһәр башлыгы спорт залы белән берләштерелгән музыка залында булды. Бу – ике функциональ өлешкә бүленгән зур бүлмә, аларда дәресләр үткәрелә. «Музыка залы барлык кирәкле җиһазлар белән җиһазландырылган: электр пианиносы, синтезатор, төрле музыка кораллары бар, – дип сөйләде Ралинә Хәбибуллина. – Шулай ук физик күнегүләр өчен инвентарь да бар, аларны, теләгән очракта, күчереп тә була. Шул ук вакытта безнең музыка залын, пәрдә белән киртәләп, сәхнәсе булган тамаша залына үзгәртеп була».

Мэр мондый якын килүне бәяләде: «Кечкенә артистлар чыгыш ясарга әзер дип ышанам, алар өчен мондый шартлар тудырылуы бик шәп. Балалар бакчасының һәркайсы башкалардан аерылып тора, бу шатландыра».

Казанда быел ныклап 15 балалар бакчасы төзекләндерелде, бүгенгә бары тик ике – 362-нче һәм 104-нче номерлы мәктәпкәчә учреждениеләр генә ачылмаган (икенче бина Дуслык урамы буенча урнашкан). Беренчесенә җиһаз һәм йомшак инвентарь җибәрелә, икенчесендә эшләр тәмамланып килә.

5 ел эчендә Татарстан башкаласында 57 мәктәпкәчә белем бирү учреждениесе яңартылды, дип искәртте И.Метшин. «Инде 7,5 мең бала-чага шундый матур шартларда тәрбияләнә. Әлбәттә, алда әле зур эш көтә, әмма шундый нәтиҗәне һәм матурлыкны күргәч, боларның ни өчен икәнен аңлыйсың. Без монда балаларны көтеп калабыз – безне, әти-әниләрен куандырсыннар, ә без алар өчен эшләячәкбез».

Балалар бакчасын карауда Киров һәм Мәскәү районнары администрациясе башлыгы Сергей Миронов катнашты.