Казан лицейлары Идел буеның иң яхшы 20 мәктәбе исемлегенә керде

(Казан шәһәре KZN.RU, 4-нче октябрь, Камилә Гобәйдуллина). Казан мәктәпләре гомумроссия рейтингларында тотрыклы рәвештә алдынгы урыннарны били. Соңгы тикшеренүләр шулай ук шәһәрдә урта гомуми белем бирүнең югары дәрәҗәсен күрсәтте – Казан уку йортлары көндәшлеккә сәләтлелек буенча иң яхшы йөзлеккә керде, Россиянең алдынгы югары уку йортларына кергән чыгарылыш сыйныф укучылары саны буенча иң яхшы өч йөз арасына, Идел буе федераль округының иң яхшы 20 мәктәбе һәм RAEX тикшеренү агентлыгының башка рейтингларына керде. Бүген эшлекле дүшәмбедә Казан мәгариф идарәсе башлыгы Ирек Ризванов шәһәр мәктәпләренең казанышлары турында җентекләбрәк сөйләде.

Көндәшлеккә сәләтлелек буенча илнең иң яхшы йөз мәктәбе арасына 131-нче номерлы лицей, КФУның IT-лицее, Лобачевский исемендәге лицей, 2-нче номерлы лицей-интернат керде. Россиянең алдынгы югары уку йортларына кергән чыгарылыш сыйныф укучылары саны буенча иң яхшы 300 мәктәп исемлегенә шәһәрнең 7 мәгариф учреждениесе: 131-нче номерлы лицей, КФУның IT-лицее, Лобачевский исемендәге лицей, 2-нче номерлы лицей-интернат, 19-нчы номерлы гимназия, 177-нче номерлы лицей һәм 39-нчы номерлы мәктәп. Моннан тыш, 131-нче номерлы лицей, КФУның IT-лицее һәм Лобачевский исемендәге лицей Идел буе федераль округының иң яхшы 20 мәктәбе исемлегенә керде.

«Россиядәге белем бирүне ничек кенә сүксәләр дә, ул гадәттәгечә бик югары дәрәҗәдә кала бирә. Эш башка да, һәрвакыт һәрнәрсәдә нәрсәгә дә булса омтылырга, кая да үсәргә була. Барыбызның да моңа игътибар итүебез мөһим. Бу гомуми бурыч, гомуми максат, һәм без көн саен бергә эшләргә тиеш», – диде Казан Мэры Илсур Метшин.

Шулай ук белем бирү оешмалары социаль-гуманитар, техник һәм медицина юнәлешләрендәге иң яхшы мәктәпләр арасында билгеләп үтелде. Биш лицей техник профильнең иң яхшы югары уку йортлары өчен абитуриентлар әзерләүче иң яхшы 200 мәктәп исеме арасына керде: 131-нче  номерлылицей, Лобачевский исемендәге лицей, КФУның IT-лицее, 7-нче номерлы лицей-интернат, 145-нче номерлы лицей. Социаль һәм гуманитар фәннәргә йөз тоткан уку йортлары арасында Совет районының лицей – инженерлык үзәге һәм 2-нче номерлы лицей-интернат билгеләп үтелде. Төгәл һәм табигый фәннәргә йөз тоткан иң яхшы мәктәпләр исәбенә 131-нче номерлы лицей, КФУның IT-лицее һәм Лобачевский исемендәге лицей кертелгән. Медицина өлкәсенә басым ясалган иң яхшы мәктәпләр дип 179-нчы лицей, 116-нчы лицей, КФУның IT-лицее, 2-нче лицей-интернат һәм 139-нчы гимназия танылды.

«Бу әлеге оешмаларның педагогик коллективларының зур казанышы. Җитәкчеләр һәм педагогларның һөнәри осталыгын күтәрү өчен берничә проект эшли – шәһәрнең «Уңыш векторы» һәм «Киләчәк укытучысы» федераль проекты, аның кысаларында Казан укытучылары төрле дәрәҗәдәге һөнәри конкурсларда, шул исәптән халыкара конкурсларда катнаша һәм җиңәләр», – дип билгеләп үтте спикер.

Әйтик, агымдагы елның сентябрендә Казанның 2-нче номерлы лицей-интернатының математика укытучысы, хәзерге вакытта «Унбер» күппрофильле яңа лицей директоры Алмаз Хәмидуллин Global Teacher Prize 2021 халыкара конкурсы финалына чыкты. 211 илдән 8 меңнән артык кандидат җиңү өчен көрәште, соңгы этапка нибары 50 кандидат узды. Алмаз Хәмидуллин Россиядән бердәнбер финалист булды. Төп приз иясен ике атнадан соң игълан итәчәкләр. Шул ук вакытта 122-нче номерлы Казан гимназиясенең инглиз теле укытучысы Мария Голованова Россиянең иң яхшы 5 укытучысы исемлегенә керде һәм хәзер Татарстанны «Россия ел укытучысы – 2021» федераль конкурсының йомгаклау этабында тәкъдим итә. Җиңүченең исемен 10-нчы октябрь көнне игълан итәчәкләр.

«Мин чын күңелдән кадерле укытучыларыбызны якынлашып килүче һөнәри бәйрәмнәре белән котлыйм! Педагогларның эше уникаль. Бу белем бирү процессы гына түгел – көн саен укытучыларыбыз балаларга карата мәхәббәт белән аларда тормышка кирәкле күнекмәләрне үстерә, күп очракта ата-аналар белми дә торган сәләтләрен ачарга булыша. Һәм безнең сезнең белән бурыч – укытучыларны саклау һәм кайгырту, аларның авыр хезмәтләренә хөрмәт белән карап, тиешле бәя бирү», – дип йомгаклады Илсур Метшин.