И.Метшин: «Казанда хезмәт базары әкренләп элеккеге дәрәҗәсенә чыга»

(Казан шәһәре KZN.RU, 28-нче июнь, Алинә Бережная). Казанның хезмәт базарында уңай динамика күзәтелә – эшсезлек дәрәҗәсе кими. Халык мәшгульлеге үзәкләрендә хисапта 9 мең 921 кеше эшсез сыйфатында теркәлгән. Узган елның шул ук чоры белән чагыштырганда эшсезләр саны 2,5 тапкырга кимегән, 2021 ел ахырына эшсезлекнең фаразланган дәрәҗәсе 1,1% тәшкил итәчәк. Гомумән алганда, мөрәҗәгать итүчеләр саныннан, ә бу ел башыннан 12 меңнән артык кеше, эшне 11 меңнән артык шәһәр кешесе тапкан, шул исәптән 8 мең эшсез. Эшкә урнашу күрсәткече 90,6%-ка җитте. Мондый саннарны бүген эшлекле дүшәмбедә Казан халкын эш белән тәэмин итү үзәге директоры Тимур Муллин белдерде.

Казан Мэры Илсур Метшин ассызыклаганча, хезмәт базарында уңай динамика икътисадны торгызу турында сөйли. «Казанда хезмәт базары әкренләп элеккеге дәрәҗәсенә чыга. Халык белән җитди эш алып барылды – 11 мең казанлы эш тапты, икътисад торгызыла. Статистика буенча, Казанда хезмәт базарындагы вәзгыять тулаем Россиягә караганда яхшырак», – дип билгеләп үтте шәһәр башлыгы.

2021 елның беренче яртыеллыгына теркәлә торган эшсезлек дәрәҗәсе эшче көчләр санының 1,55%-ын тәшкил итә. «2020 елга мөрәҗәгать иткән эшсезләр саныннан хәзерге вакытта 4 мең 700 кеше эшкә урнаштырылмаган», – диде Тимур Муллин. Аның сүзләренә караганда, уртача эшсезлек портреты түбәндәгечә: яше 30-дан 49 яшькә кадәр, урта гомуми яки урта һөнәри белем, хезмәт күрсәтү һәм сәүдә өлкәсендә эш тәҗрибәсе. Эшкә урнаштырылучыларның күбесе транспорт тармагында, сәүдә, җитештерү, сәламәтлек саклау, төзелештә билгеләп үтелә.

Тимур Муллин сөйләвенчә, хезмәт базарындагы вәзгыять узган ел белән чагыштырганда үзгәрде – икътисадның кайбер тармакларында кадрларга ихтыяҗ эзләүчеләр саныннан шактый артып китә, бу икътисадның реаль секторында билгеле бер кытлык тудыра. «Күп кенә эш бирүчеләр эш тәҗрибәсеннән башка, киләчәктә кирәкле күнекмәләргә өйрәтү белән эшкә алырга әзер», – дип билгеләп үтте ул. Казан халкын эш белән тәэмин итү үзәге базасында шәһәрнең предприятие һәм оешмаларының кадрлар хезмәтләре советы төзелде, ул бүгенге көнгә 80-нән артык эш бирүчене үз эченә ала.

Илсур Метшин ассызыклаганча, эшче куллар һәрвакыт кирәк, бигрәк тә шәһәрдә Вознесенский тракты төзелеше, Горький шоссесы дублеры һәм башкалар кебек эре проектлар гамәлгә ашырылганда. «Эре халыкара чаралар булмауга карамастан, без җитди инфраструктура проектлары өстендә эшне дәвам итәбез, ул вакытта эшче куллар санын арттырырга кирәк, һәм объектлар никадәр күбрәк булса, шулкадәр күбрәк белгечләр кирәк», – дип йомгаклады Илсур Метшин.