И.Метшин мәгариф учреждениеләренең иминлеге турында: «Без 1 сентябрьгә кадәр барлык объектларда җитешсезлекләрне төзәтү бурычын куйдык»

(Казан шәһәре KZN.RU, 15-нче июнь, Камилә Гобәйдуллина). Казан Мэры Илсур Метшин бүген аппарат киңәшмәсендә 1-нче сентябрьгә шәһәрнең социаль-мәдәни өлкәсе учреждениеләрендә куркынычсызлыкны тәэмин итү системасын тиешле хәлгә китерергә кушты, бу эшкә Башкарма комитет белән берлектә барлык җитешсезлекләрне бетерү өчен хокук саклау органнарын да җәлеп итеп.

«Без мәктәпләрдә генә түгел, ә социаль-мәдәни өлкәнең барлык объектларында куркынычсызлыкны тәэмин итү системасында үзебезнең «тар урыннарны» ачыклау буенча зур эш башкардык. Казанда алар 801, һәм һәркайсы каравыл оештыруны таләп итә, – дип билгеләде ул. – Бердәм стандартны кертү бурычын Россия Президенты Владимир Путин куя, әмма без, үз дәрәҗәбездә, антитеррор буенча комплекслы эш кысаларында барлык мәсьәләләрне карадык һәм 1-нче сентябрьгә кадәр барлык объектларда ревизия үткәрү һәм кимчелекләрне төзәтү бурычын куйдык. Мәсәлән, ниндидер сәбәп аркасында хәвеф төймәләре булмаган яки тиешле дистанциядә урнаштырылмаган, хәбәр итү системасы кайдадыр эшли, ә кайсыдыр кабинетларда юк, ишекләрдәге йозаклар һ.б.».

Казан социаль өлкә учреждениеләрен карап тоту һәм хезмәт күрсәтү департаменты директоры Петр Королев хәбәр иткәнчә, куркынычсызлык предметына тикшерүләр инде узган һәм учреждениеләрнең ихтыяҗлары анализлаган. «Бүгенгә кисәтүләрне бетерү өчен финанслауга 1 млрд 308 млн сум тирәсе ихтыяҗ бар. Республика ярдәме белән һәм финанслау чыганагын билгеләгәндә эшләр агымдагы елда башланырга мөмкин», – дип сөйләде ул.

Шәһәр башлыгы билгеләп үткәнчә, Казан бюджетында мондый сумма каралмаган, әмма куркынычсызлыкны тәэмин итәргә кирәк, әлегә федераль ярдәм чаралары күрелмәгән булуга да карамастан. «Без барлык тәкъдимнәрне дә исәпкә алып, республика билгеле бер карарлар кабул итәр, һәм безнең мәктәпләребезнең генә түгел, балаларыбыз булган барлык социаль-мәдәни объектларның да куркынычсызлыгына бюджет акчаларын җәлеп итәр дип өметләнәбез».

Илсур Метшин Россия Эчке эшләр министрлыгының шәһәр буенча Идарәсе, прокуратура, Росгвардия, Башкарма комитетның профильле бүлекчәләре вәкилләрен һәм депутатларны уртак эшкә кушылырга һәм комиссия белән җәй дәвамында учреждениеләрне йөреп чыгарга, балаларның куркынычсызлыгына кагылышлы барлык җитешсезлекләрне төзәтергә чакырды. «Без бу ведомстволарның функционалы булмавын аңлыйбыз, физик яктан андый мөмкинлекләр юк, әмма бу безнең балалар, шәһәр. Әйдәгез, без хуҗаларча күзлектән бергәләп хәлне бәялик һәм федераль стандарт кабул ителгәнче җиһазланышның тиешле минимумы турында килешик».