Казанда сайлап алу этабы нәтиҗәләре буенча Башкарма комитет җитәкчесе вазифасына ике дәгъвачыны сайладылар

(Казан шәһәре KZN.RU, 19-нчы октябрь, Ксения Швецова). Бүген Казан Ратушасында Казан Башкарма комитеты җитәкчесе вазифасына дәгъвачылар сайланды. Татарстан башкаласы Мэры Илсур Метшин рәислегендәге конкурс комиссиясе дүрт кандидатның икесен сайлады, аларны алдагы сессиядә Казан шәһәр Думасы депутатлары каравына тәкъдим итәчәкләр. Конкурс финалына Башкарма комитет җитәкчесенең беренче урынбасары Рөстәм Гафаров һәм Киров һәм Мәскәү районнары администрациясе башлыгының беренче урынбасары Илсур Хисмәтуллин узды.

Казан Башкарма комитеты җитәкчесе вазифасын биләүгә ачык конкурс 21-нче сентябрьдә игълан ителде. Денис Калинкин Казан шәһәре Думасы депутаты итеп сайланды һәм вәкаләтләрен вакытыннан алда туктату турында гариза бирде, дип искәртте Илсур Метшин.

Конкурс комиссиясе федераль законнар нигезендә Казан шәһәре думасы депутатларыннан һәм Татарстан Президенты тәкъдим иткән кандидатуралардан тора. Шулай итеп, конкурс комиссиясенә ТР Президенты Аппараты җитәкчесе Әсгать Сәфәров, Казан Мэры Илсур Метшин, Татарстан Республикасы Премьер-министры урынбасары - ТР Министрлар Кабинеты Аппараты җитәкчесе Шамил Гафаров, ТР Дәүләт Советы рәисе урынбасары Юрий Камалтынов, Казан муниципаль берәмлеге башлыгының беренче урынбасары Денис Калинкин һәм законлылык һәм хокук тәртибе мәсьәләләре буенча даими комиссия рәисе Алексей Селивановский кертелде.

Конкурсның шартлары массакүләм мәгълүмат чараларында вакытында урнаштырылган иде, шуңа күрә теләге булган һәркем алар белән таныша һәм көрәштә катнаша алды. Нәтиҗәдә, конкурска үз документларын дүрт кандидат тәкъдим итте: Казан Башкарма комитеты җитәкчесенең беренче урынбасары Рөстәм Гафаров, «Яшүсмер» муниципаль бюджет учреждениесе директоры урынбасары Руслан Семенов, Киров һәм Мәскәү районнары администрациясе башлыгының беренче урынбасары Илсур Хисмәтуллин һәм Лаеш балалар йортының «Чайка» балаларны савыктыру лагере җитәкчесе Гомәр Насыйбуллин.

Катнашучылар шәһәрне үстерү буенча үз идеяләрен тәкъдим иттеләр, шулай ук конкурс комиссиясе әгъзаларының сорауларына җавап бирделәр. Коронавирус инфекциясе пандемиясе аркасында килеп туган катлаулы эпидемиологик вәзгыятьне исәпкә алып, кандидатлар белән әңгәмә дистанцион форматта узды.

Конкурс комиссиясендә катнашучыларга Казанны үстерү буенча үз күзаллауларын беренче булып Рөстәм Гафаров тәкъдим итте. Ул билгеләп үткәнчә, бүген Казан федераль хөкүмәт ярдәмендә шәһәр һәм республика хакимиятләренең җайга салынган эше нәтиҗәсендә актив үсеш ала.

«Бүген нинди юнәлешләрдә активрак эшләргә кирәклеген аңлау бар, - диде Р.Гафаров. - Аерым алганда, минем фикеремчә, шәһәр халкының төрле мәсьәләләр буенча мөрәҗәгатьләренә күбрәк игътибар бирергә кирәк. Шулай ук Казан агломерациясен үстерү өстендә күбрәк эшләргә, Казан һәм шәһәр бистәләре өчен бердәм күзаллау, бердәм стратегик үсеш юнәлешен булдырырга кирәк».

Алга таба «Яшүсмер» муниципаль бюджет учреждениесе директоры урынбасары Руслан Семенов конкурс комиссиясенә шәһәрен үстерү турындагы үз идеяләрен тәкъдим итте. «Яшьләр берләшмәсе директоры урынбасары буларак, мин хезмәткәрләрнең карашларын төрле тональлек белән иҗади дулкынга үзгәртә алдым, һәм хәзер без зур ныклы команда булып эшлибез, - дип сөйләде ул. - Мин кадрлар, финанс мәсьәләләрен, яшүсмерләр клублары челтәренең техник юнәлеше һәм структур үсеше мәсьәләләрен җитәклим. Республиканы һәм шәһәребезне федераль дәрәҗәдә һөнәри осталык конкурсында тәкъдим иттем һәм яшьләр сәясәте учреждениеләренең иң яхшы җитәкчеләре бишлегенә кердем».

Илсур Метшин билгеләп үткәнчә, Казанда бүген талантлы яшь белгечләр күп, алар яхшы профессиональ сыйфатларга ия булулары белән аерылып торалар. «Безнең командада шәһәр, республика һәм илнең тормышын яхшы якка үзгәртергә теләгән яшьләрнең күп булуы сөендерә. Мине, мэр буларак, укырга һәм алга барырга теләүче яшьләрнең үсеп килүе шатландыра, - диде ул. - Нәтиҗәле идарә итү өчен билгеле бер баскычларны һәм этапларны үтәргә кирәк, һәм без яшьләргә мондый мөмкинлекләрне бирергә әзер».

Күптән түгел Лаеш районында «Чайка» сәламәтләндерү лагерен җитәкләгән кандидат Гомәр Насыйбуллин Башкарма комитетының элеккеге җитәкчесенең зур эшен билгеләп үтте һәм җәмәгать транспорты үсешенә игътибар итәргә тәкъдим итте. Ул шулай ук каты коммуналь калдыклар белән эш итү системасын үстерү зарурлыгына, туристлык маршрутларын үстерүнең мөһимлегенә игътибар итте һәм яшьләрне шәһәрдә арт-объектлар булдыруга чакырырга тәкъдим итте.

Калдыкларны аерым төрләргә бүлеп җыюның мөһимлеге турында үз презентациясендә Киров һәм Мәскәү районнары администрациясе башлыгының беренче урынбасары Илсур Хисмәтуллин да сөйләде.

«Мин шәһәр алдында хәзер кыска вакытлы максатлар тора дип саныйм, шул исәптән - кышны җылылык өзеклекләреннән башка уңышлы узу, «Безнең ишегалды» президент программасын уңышлы тәмамлау, - диде ул. - Шулай ук шәһәр хуҗалыгын үстерүдә масштаблырак юнәлешләргә кагыла торган уртача сроклы һәм озак вакытлы максатлар бар".

Әңгәмә нәтиҗәләре буенча конкурс комиссиясе Казан шәһәр Думасы каравына ике кандидатура - Рөстәм Гафаровны һәм Илсур Хисмәтуллинны чыгарырга карар кабул итте.

«Сайланган кандидатларга Казан шәһәр Думасы сессиясендә шәһәр үсеше программасын тәкъдим итәргә туры киләчәк, - диде И.Метшин. - Комиссия үтмәгән кандидатларны без игътибар белән тыңладык, һәм киләчәктә хезмәттәшлек итү һәм иң уңышлы идеяләрне һәм тәкъдимнәрне тормышка ашыру ысулларын табачакбыз».

Башкарма комитет җитәкчесе вазифасына кандидатура расланачак Казан шәһәр Думасы сессиясе 21-нче октябрьдә 10.00 сәгатьтә булачак.