Илсур Метшин: «Шәһәр инфраструктурасының мондый масштаблы үзгәрешләре илнең бер генә төбәгендә дә юк»

(Казан шәһәре KZN.RU, 7-нче сентябрь, Ксения Швецова). Татарстанда һәм аның башкаласында соңгы елларда инфраструктура үсешендә зур нәтиҗәләргә ирешелде. Ел саен Казанда социаль өлкәнең яңа объектлары капиталь ремонтлана һәм төзелә, торак фонды яңартыла. Үзгәрешләр шәһәр үзәгеннән иң ерак бистәләргә һәм микрорайоннарга да кагыла. Мондый нәтиҗәләргә республика программаларын һәм илкүләм проектларны гамәлгә ашыру нәтиҗәсендә ирешелә, дип билгеләп үтте бүген эшлекле дүшәмбедә Казан Мэры Илсур Метшин.

Эшлекле дүшәмбе барышында Казанның район администрацияләре башлыклары социаль объектларны төзү һәм капиталь ремонтлау буенча төп эш нәтиҗәләре буенча хисап тоттылар. «Хәтта эш күләмнәрен тиз генә санап чыгу да күп вакытны ала, - дип шәрехләде Илсур Метшин. - Масштаб чыннан да бик җитди - мондый үзгәрешләр һәм инфраструктурага шундый игътибар, мондый президент программалары, Мәскәү һәм Санкт-Петербургтан кала, илнең башка бер генә төбәгендә дә юк».

Республиканың һәм аның башкаласының тотрыклы социаль-икътисади үсешенә эре предприятиеләр, шулай ук Татарстанны илнең төп донор төбәге иткән кече һәм урта бизнес компанияләре ярдәм итә, дип билгеләп үтте Мэр.

Инфраструктураның үзгәреше - социаль объектларны, торак фондын һәм юлларны төзү һәм яңарту - шәһәрнең иң ерак районнарын колачлый, дип ассызыклады шәһәр башлыгы. «Бүген халык барлык үзгәрешләрнең дә системалы характерда булуын күрә, - диде ул. - Без эш күләмнәрен билгелибез, һәм һәр программа буенча без финал объектка барып җитәбез. Бу аерым бистәләрдә һәм микрорайоннардагы аерым эшләр генә түгел - бу шәһәр инфраструктурасы объектларын комплекслы ремонтлау».

Казанда яңартуга нык мохтаҗ булган барлык мәктәпләргә дә капиталь ремонт ясалды, дип искәртте И.Метшин. Бүген бу эш, шулай ук балалар бакчаларын һәм башка объектларны - яшүсмерләр клубларын, мәдәният сарайларын, медицина учреждениеләрен - капиталь ремонтлау Татарстан башкаласында темпларны акрынайтмый.

«Бу объектларны ремонтлау, учреждениеләрнең матди хәлен яхшырту гына түгел - бу сыйфатлы яңа дәрәҗә, - дип ассызыклады Мэр. - Социаль объектларны ремонтлау яңа тулылану, яңа технологияләр һәм мөмкинлекләр белән озата барыла».

Иҗтимагый объектларны, аерым алганда, балалар бакчаларын яңарту аларның куәтен шактый арттырырга һәм яңа урыннар ачарга мөмкинлек бирә, бу бэби-бум һәм үсеп килүче, мәктәпкәчә белем алуга мохтаҗ балалар саны үсеше шартларында актуаль, дип өстәде шәһәр башлыгы.

«Бөтен эшнең төп мотиваторлары - шәһәр халкы. Без алар белән һәрвакыт туры элемтәдә торабыз, мөрәҗәгатьләр алабыз, ишегалларында, предприятиеләрдә очрашабыз, - дип билгеләде Мэр. - Кайвакыт безне мактыйлар, кайвакыт гадел тәнкыйтьлиләр. Казанлылар еш кына үзләренең тәкъдимнәре, креатив идеяләре белән чыгалар, безгә эшебездәге җитешсезлекләрне күрергә ярдәм итәләр. Шәһәр халкы белән бергә без төп - иң уңайлы, имин, төзек, матур һәм яхшы Казан шәһәрендә яшәү максатын тормышка ашыруда уңышларга ирешербез».