Татарстанның вакытлы йогышлы авырулар хастаханәләрендә авыруларны виртуаль карау оештырылган

(Казан шәһәре KZN.RU, 11-нче май, Алена Мирошниченко). Казанда «ковидлы» сыйфатында сугыш ветераннары госпитален ачтылар. Бүгенге көндә анда 31 пациент озатылган. Бу хакта бүген коронавирус инфекциясе таралуга каршы тору буенча штаб утырышында Татарстан Республикасы сәламәтлек саклау министры урынбасары - Татарстан Республикасы Сәламәтлек саклау министрлыгының Казан буенча идарәсе башлыгы Владимир Жаворонков хәбәр итте.

Татарстанда авыручылар саны 1761 кеше тәшкил итә

Владимир Жаворонков хәбәр иткәнчә, Татарстан Республикасында 11-нче майга 1761 кеше авырый, шул исәптән 817 кеше - Казан халкы. 475 татарстанлы савыкты, шуларның 207-се республика башкаласында яши. Эпидемия башланганнан бирле 6 үлем очрагы теркәлгән, алар арасында берсе - Казанда яшәүче.

«Бүген 14 лабораториядә коронавирус инфекциясенә тикшеренүләр үткәрелә, шуларның 10 лабораториясе Казан территориясендә тупланган. Аларның тулаем куәте тәүлеккә 2 мең тест тәшкил итә. Без әйләнешне арттырабыз, шул исәптән шәхси лабораторияләрдә дә. Татарстанда коронавирус инфекциясе таралу башыннан бирле 73 мең 397 тикшеренү үткәрелгән, медицина оешмалары лабораторияләрендә - 35 меңнән артык тикшеренү», - дип хәбәр итте В.Жаворонков.

Медицина хезмәткәрләрен шәхси саклану чаралары белән тәэмин итүгә килгәндә, хәзерге вакытта барлык дәвалау учреждениеләрендә алар эшләү өчен җитәрлек санда бар, дип хәбәр итте спикер.

ТР вакытлы йогышлы авырулар хастаханәләрендә авыруларны виртуаль карау оештырылган

В.Жаворонков, авыруның таралуын булдырмау һәм Татарстан Республикасында пациентларга вакытында медицина ярдәме күрсәтү өчен провизор госпитальләр моделе кулланыла, дип сөйләде. Алар бер тәүлек эчендә кирәкле диагностик чаралар үткәрергә һәм пациентларны алга таба «ковид плюс» һәм «ковид минус» госпитальләргә озатырга мөмкинлек бирә.

ТР Сәламәтлек саклау министрлыгының Казан буенча Идарәсе башлыгы шулай ук Татарстанда вакытлы йогышлы авырулар госпитальләре ачылганнан бирле виртуаль обход оештырылуы турында сөйләде. «Аның максаты - карарларны коллегиаль кабул итү һәм СОVID-19лы иң авыр хәлдәге пациентларга респиратор ярдәм итүнең рациональ дәвалау тактикасын сайлау. Виртуаль консилиум ТР Сәламәтлек саклау министрлыгының әйдәп баручы профильле белгечләре катнашында уздырыла. Фикер алышуда катнашуга республиканың биш госпиталь базасы тоташтырылган, аларда яңа коронавирус инфекциясе белән авыручы пациентлар дәвалана», - диде ул һәм белгечләр авыр хәлдәге пациентлар буенча шулай ук Мәскәүдә урнашкан федераль үзәкләр белән дә киңәшләшә, дип өстәде. Шул рәвешле, 26 консультация уздырылган инде, аларда пациентларның иң авыр хәлдәге контингентын дәвалауның индивидуаль схемалары төзелгән.

Гадәттән тыш хәл режимында яңа йогышлы авырулар хастаханәсендә 504 ятак җәелдерергә мөмкин булачак

Владимир Жаворонков искә төшергәнчә, хәзерге вакытта Казанда, Җиңү проспектындагы Республика йогышлы хастаханәсе янындагы территориядә, 2,2 гектар мәйданда яңа йогышлы авырулар хастаханәсе төзелә, . В.Жаворонков сүзләренчә, дүрт катлы кирпеч бинаны иң заманча югары технологияле җиһазлар, шул исәптән компьютер томографы, үпкәләрне ясалма вентиляцияләү аппаратлары, рентгенология һәм эндоскопия аппаратурасы, ультратавыш диагностикасы аппаратлары белән тәэмин итү планлаштырыла. «Кабул итү бүлегендә 10 бокс урнаштырылачак, тагын 20-сен палата буларак кулланачаклар. Шулай ук монда ике урынлы 100 бокс урнашачак. Гадәттән тыш хәл режимында йогышлы авырулар хастаханәсе базасында 504 ятак җәелдерергә мөмкин булачак, шуларның 24-е - реанимация өчен», - дип хәбәр итте спикер.

Ул шулай ук чираттагы тапкыр шәһәр кешеләрен үзизоляция кагыйдәләрен максималь үтәргә һәм коронавирус инфекциясен профилактикалауның җиде адымын үтәргә чакырды. Иҗтимагый урыннарга, сәүдә үзәкләренә, спорт һәм тамаша чараларына барудан тыелырга; күзләргә, йөзгә һәм авызга пычрак куллар белән кагылмаска; кискен респиратор-вируслы инфекцияләр билгеләре булган кешеләр белән якын багланышлардан һәм бер бинада булудан тыелырга; урамда һәм кешеләр белән контактта булганнан соң кайткач, сабын һәм су белән кулларны яхшылап юарга; гаджетларны, оргтехника һәм эш өсләрен дезинфекцияләргә; сәламләшкәндә кочаклау һәм кул кысулардан тыелырга; шәхси гигиена предметларыннан гына файдаланырга кирәк.

«Федераль үзәк республикага табибларга өстәмә түләүләргә 50 млн сум бүлеп бирде. Белгечләр тиздән бүгенге көндә чын батырларча алдынгы сызыкта эшләүләре өчен өстәмә акча ала алырлар, дип өметләнәм, - дип йомгаклады Казан Мэры Илсур Метшин.