Илсур Метшин: «Киләсе елда Казан көннәре Минскта узачак дип килештек»

Бүген «Сәйдәш» мәдәни үзәгендә «Белорус җире матурлыгы» театрлы һәм музыкалы проект күрсәтелде. Белорус дәүләт академия яшь тамашачы театры спектакле Казанда Минск көннәре мәдәни программасының бер өлеше булды. Тамашачыларны сәнгатьнең төрләре аша халыкның мәдәнияте, модасы һәм гадәтләре белән таныштырдылар. Театр, җыр һәм бию номерлары белорус дизайнерлары һәм сыйфатлы келәймә коллекцияләрен күрсәтү белән чиратлашып барды. Тамашачылар арасында Казан мэры Илсур Метшин һәм Беларусь Республикасы башкаласының шәһәр Башкарма комитеты рәисе Владимир Кухарев бар иде.

«Шундый зур делегациянең килүе һәм мәдәни программаны тәкъдим итүе өчен зур рәхмәт. Без хезмәттәшлекнең мэрлар һәм аларның командалары дәрәҗәсендә генә түгел, ә эш һәм иҗат төркемнәре вәкилләре арасында да үсәчәген килештек. Безнең халыкларның борынгы дуслык тамырлары бар», — дип билгеләде Илсур Метшин.

Аның сүзләренчә, киләчәктә Казан белән Минскны мәдәният, спорт, шулай ук бизнес өлкәсе бәйләячәк. «Һәр шәһәрнең дә бизәге — кешеләр. Татарстанда 116 дан артык милләт вәкиле яши. Безнең республиканың һәм шәһәрнең бизәге — сезнең искиткеч, хезмәт сөючән белорус диаспорасы да. Казанда лаеклы кешеләр өчен түбәнчелек белән баш иябез. Моннан тыш, без киләсе елда Казан көннәре Минскта узачак дип килештек», – дип йомгаклады шәһәр мэры.

Үз чиратында Беларусь башкаласы шәһәр Башкарма комитеты рәисе Владимир Кухарев казанлыларның мәрхәмәтлелеген, ярдәмчеллеген һәм саф күңеллелеген билгеләп үтте. «Без чираттагы тапкыр кардәш шәһәрләр генә түгел, ә бертуганнар булуыбызны раслыйбыз. Бүген безнең барыбыз өчен дә чыннан да мөһим булган бик күп чаралар уздырыла. Безнең халыклар арасында гасырлар буена салынган дуслык елдан-ел ныгый бара», — диде ул.

«Хәзерге икътисадый форум безнең халык файдасына барачак килешүләр барлыкка килүгә яңа этәргеч бирде инде. Без бүгенге концертны планлаштырганда, Казанда нинди бай мәдәни традицияләр барлыгын яхшы аңлап, озак уйландык. Биредә күп гасырлар дәвамында формалашкан мәдәният, чыннан да, Татарстанның бизәгенә әверелде – үзенчәлекле, кызыклы, һәркем өчен үрнәк булып тора», – дип йомгаклады Владимир Кухарев.

«Белорус җире матурлыгы» театрлы һәм музыкалы проектны Белорус дәүләт академия яшь тамашачы театры режиссеры Татьяна Самбук куйды.

Спектакль сюжетына белорус дизайнерлары һәм сыйфатлы келәймәләр коллекцияләрен күрсәтү кергән. Сәхнәдә дизайнерлар Анастасия Фалькович һәм Антон Ярощикның «Монохром» коллекциясе, Беларусь Республикасының Олимпия җыелма командасының «Айрос» келәймәсе, «Мода үзәге» келәймәсе тәкъдим ителде. Сәхнәгә шулай ук дизайнер Егор Кириченконың «Кико Ричен» келәймәсе киемендәге модельләр чыкты, шулай ук Оршан җитен комбинатының «Поле кветак» җитеннән коллекцияләре һәм «Раскоша» коллекцияләре тәкъдир ителде.

Спектакльдә «Купалинка» фольклор төркеме һәм «Белы Птах» халык вокаль ансамбле башкаруында Белорус халык көйләре, шулай ук белорус композиторлары һәм авторларының заманча музыка композицияләре яңгырады.

Мәдәни үзәк холлындагы тамашадан соң Илсур Метшин һәм Владимир Кухарев «Минск, возрожденный из руин» («Минск, җимерекләрдән торгызылган») фотокүргәзмәсе белән таныштылар. Экспозиция Бөек Ватан сугышында Җиңүнең 80 еллыгына багышланган.

Исегезгә төшерәбез, Татарстан башкаласында 9 һәм 10 июнь көннәрендә Минск көннәре уза. «Минск һәм Казан: кардәшлек — үсешнең яңа этәргече» бизнес-форумы үзәк вакыйга булды. Анда Казан мэры һәм Беларусь башкаласы шәһәр Башкарма комитеты рәисе муниципальара хезмәттәшлекне үстерү программасына кул куйдылар.

Моңа кадәр Илсур Метшин һәм Владимир Кухарев Дан Мемориалы колоннадасының Мәңгелек утына чәчәкләр салдылар. Аннары алар Казан һәм Минскның балалар-яшүсмерләр футбол командалары арасындагы иптәшләрчә матчның мактаулы кунаклары булдылар. Матчта 0:3 исәбе белән Минск командасы җиңү яулады.

Иртәгә, 10 июньдә, «Казан» Агросәнәгать паркында белорус товарлары ярминкәсе узачак. Мәйданчыкта 15 июньгә кадәр казанлылар Белоруссиянең әйдәп баручы предприятиеләренең сөт һәм ит продукциясен, камыр ризыкларын сатып алырга мөмкин.