Казанда узачак БРИКС уеннарына «Хезмәт резервлары» стадионындагы бокс залы бинасының фасады ремонтланачак

Казанның иң борынгы стадионнарыннан берсе саналган «Хезмәт резервлары» территориясендә капиталь ремонт башланды. БРИКС уеннарына биш корпусның берсендә – 1962 елда шәһәрдә беренче булып ачылган бокс залында фасад төзекләндереләчәк. Стадионның спорт тарихы нәкъ менә аннан башлана, биредә ТР башкаласының булачак танылган спортчылары – дөнья, Европа һәм Россия чемпионнары шөгыльләнгән. Казанны үстерү институты тарафыннан эшләнгән концепция буенча, корылманы аның архитектура үзенчәлекләрен аерып күрсәтә торган яктырткычлар бизәячәк, шул ук вакытта тарихи элементларны – колонналарны, күпертмә бизәкләрне, барельефларны саклап калачаклар. Шәһәр мэры Илсур Метшин капиталь ремонт проекты белән танышты.

«Хезмәт резервлары» стадионы төрле чорларда (1962 елдан 2006 елга кадәр) төзелгән биш корпустан гыйбарәт. Проект нигезендә республика программасы буенча ремонт эшләрен киләсе елга кадәр өч этапта башкару планлаштырыла. Яңартуны иң иске бинадан – бокс залыннан башларга карар ителгән. Физик культура һәм спорт комитеты рәисе Линар Гарипов сүзләренә караганда, җир асты сулары якын урнашу сәбәпле, беренче чиратта фундаментны ныгыту һәм гидроизоляцияләүне башкару буенча катлаулы эшләр планлаштырылган. Алга таба бригадалар түбә һәм инженерлык челтәрләрен яңарту белән шөгыльләнәчәк. Эшләрнең заказчысы – «ТР Баш инвестицион-төзелеш идарәсе» ДКУ, ә подрядчы оешма – «СТК» ҖЧҖ.

«Хезмәт резервлары» физкультура-спорт берләшмәсе генераль директоры Руслан Миңнебутдинов, бокс залы бинасын капиталь ремонтлаганда, фасадның эчке өлешендә тарихи элементлар – колонналар, күпертмә бизәкләр, аркалар сакланачагын әйтте. Борынгы грек спортчылары сурәтләнгән барельефларны гипс ярдәмендә торгызачаклар. Спорт комплексы фасады концепциясе Казанны үстерү институты тарафыннан эшләнгән. Архитекторлар классик дизайнга таянган, шул ук вакытта металлдан заманча элементлар өстәлгән.

Киләчәктә бокс залының эчке өлешен, футболчылар һәм баскетболчылар өчен уен залын, административ биналарны ремонтлау планлаштырыла. «Хезмәт резервлары» стадионы базасында 1,5 меңгә якын бала һәм яшүсмер шөгыльләнә, алар өчен җиңел атлетика, баскетбол, тимераякта йөгерү спорты, футбол, нәфис гимнастика һәм бокс буенча түгәрәкләр эшли.

Бокс буенча спорт мәктәбе – республикада иң көчлеләрнең берсе. Аның тәрбияләнүчеләре төрле дәрәҗәдәге ярышларда җиңү һәм призлы урыннар яулыйлар. Әйтик, Сергей Сергеев узган ел Россия чемпионатында алтын медаль иясе булган. Шул ук дисциплинада Россия беренчелегендә Әмин Абдуллин үзен яхшы яктан күрсәткән.

«Мәктәптә бокс буенча Россия җыелма командасының өлкән тренеры Виктор Шевелин, ТРның атказанган физик культура хезмәткәре Юрий Малков һәм югары категорияле тренер Айдар Әхмәтҗанов кебек танылган шәхесләр укыта. Биредә Россия чемпионнары әзерләнә – бу факт», – дип билгеләп үтте Руслан Миңнебутдинов.

«Хезмәт резервлары» физкультура-спорт берләшмәсенең танылган укучылары арасында нәфис гимнастика буенча Олимпия чемпионы, атказанган спорт мастеры Дарья Шкурихина, төркем күнегүләрендә нәфис гимнастика буенча Европа чемпионнары Юлия Федорова, Мария Францель, Ралинә Рәкыйпова һ.б. бар.

Исегезгә төшерәбез, Казандагы БРИКС уеннарына Үзәк стадион, Бокс һәм өстәл теннисы үзәге капиталь ремонтлана. Беренче объектта соңгы тапкыр реконструкция якынча 20 ел элек үткәрелгән. Стадионда һәм манежда эшләрне май ахырына тәмамлау планлаштырыла. Икенче объектта ярышларга идән өслеге, яктырткычлар яңартылачак һәм светодиодлы экран урнаштырылачак.

2024 елда республика программасы буенча шулай ук «Тасма» һәм «Ракета» стадионнарын капиталь ремонтлау планлаштырыла.