Илсур Метшин: «Казан социаль объектлар төзү буенча лидерлыкны саклый, һәм без чигенмәячәкбез!»

 (Казан шәһәре KZN.RU, 18 нче гыйнвар, Камилә Вилданова). Шәһәр Мэры 19 нчы гимназиянең инде дәресләр башланган яңа корпусында булып кайтты. Гимназиянең яңа ике катлы корпусында бу атнада 5-11 нче сыйныфлар өчен уку процессы башланды. Анда уку кабинетлары, иркен ашханә, спорт залы, ял һәм уеннар өчен зона җиһазландырылган. Мэр укучыларны һәм укытучыларны яңа бина белән котлады һәм быел Казанда «Весна» торак комплексында, «Родина» торак комплексында һәм М-14 микрорайонында тагын өч яңа мәктәп төзеләчәген җиткерде. Соңгы 10 елда Казан Россиянең миллион халыклы шәһәрләре арасында социаль объектлар төзү буенча лидерлыкны нык тота.

Дүшәмбе көнне Казанның Идел буе районында 300 укучыга исәпләнгән 19 нчы гимназиянең яңа ике катлы корпусында дәресләр башланды. Аның төзелеше декабрь ахырында тәмамланды. Моңа кадәр укучыларның саны 800 укучыга исәпләнгән уку йортының проект куәтеннән ике тапкыр артык булган. Мәктәп ашханәсендә бер урынга 18 укучы туры килгән – барлык балаларны ашату өчен 15 тәнәфес таләп ителгән. Хәзер мәктәп рестораны форматында эшләүче яңа ашханә ярдәмендә барлык укучылар 4 тәнәфес эчендә төшке ашны ашап өлгерәләр.

«Укучыларны һәм укытучыларны яңа бина белән котлыйсым килә. Өстәмә корпус төзелешен хуплаган республикабыз Рәисе Рөстәм Нургали улы Миңнехановка рәхмәт. Ел саен гимназия төрле олимпиадаларда яхшы нәтиҗәләр күрсәтә, төбәк, федераль һәм хәтта халыкара дәрәҗәләрдә җиңүләре җитәрлек. Укулар һәм мәктәптән тыш эшләр өчен уңайлы шартлар балаларның уңышларын тагын да арттырыр дип ышанабыз», – диде Илсур Метшин.

Мәктәп киңлегенең ничек үзгәрүе турында Казан Мэрына гимназия директоры Андрей Талманов сөйләде. Яңа корпуста үз иҗат залы барлыкка килгән, анда, мәсәлән, мәктәп активистларының җыелышлары уза. Ун ел элек нәкъ менә 19 нчы гимназиядә «Игелек ярминкәләре» барлыкка килде, алар соңыннан «Игелекле Казан» зур шәһәр хәрәкәтенә әверелде. Андрей Талманов сүзләренчә, иҗади киңлектә театр һәм музыка студияләре тәрбияләнүчеләре шөгыльләнәчәк.

Икенче катта универсаль киңлек проектлана, ул биремнәргә карап үзгәртелә. Мәйданчыкта мәктәп концертлары һәм башка массакүләм чаралар оештырырга мөмкин. Сменада укучылар өстәл футболы һәм теннис, шулай ук аэрохоккей уйный алалар. Ике төрле шахмат бар – гадәти һәм идәннеке, биеклеге чирек метр.

Спорт залында балалар баскетбол, волейбол һәм мини-футбол белән шөгыльләнәчәк. Спортның соңгы төре буенча мәктәп берничә тапкыр ярышларда җиңде: бу сезонда гимназиянең унберенче сыйныф укучылары Татарстан буенча өченче урынны алды. Моңа кадәр яшьләр Идел буе районы буенча белем бирү учреждениеләре арасында алтын медаль яулаганнар. Спорт залында берничә тренажер – йөгерү юллары урнаштырылган.

Иске бина җәй көне капиталь ремонтланган. Эшчеләр түбәләрне алыштырган, фасадны, инженерлык челтәрләрен һәм керү төркемен яңарканнар, актлар һәм спорт залларын, санузелларны ремонтлаганнар.

«Бөтен мәктәп яңартылды. Хәзер укучыларның белем алу гына түгел, ә күпкырлы үсеш өчен бөтен мөмкинлекләре бар. Балаларыбыз тормыштан канәгать булсын өчен, без барысын да эшлибез. Казан социаль объектлар төзү буенча лидерлыкны саклый, һәм без әлеге курстан читкә тайпылмаячакбыз. Киләсе елда тагын өч мәктәп төзиячәкбез – М-14 микрорайонында, «Весна» торак комплексында һәм «Родина» торак комплексында. Төзүчеләр безгә аларны 1 нче сентябрьгә төзеп бирергә вәгъдә итәләр», – дип хәбәр итте шәһәр башлыгы.

Бу уку елына Казанда 6 мең укучыга исәпләнгән дүрт яңа мәктәп ачылды. Яңа белем бирү учреждениеләре Совет (М.Мәхмүтов исемендәге 184 нче гимназия корпусы), Яңа Савин (107 нче гимназия), Киров (182 нче политехник лицей корпусы) һәм Идел буе (186 нчы лицей корпусы) районнарында барлыкка килде. 19 нчы гимназиянең яңа корпусын исәпкә алып, мәктәп укучылары өчен кертелгән учреждениеләр һәм урыннар саны буенча бу Казан өчен генә түгел, ә башка миллион халыклы шәһәрләр өчен дә абсолют рекорд булды. Алар арасында (Мәскәү һәм Санкт-Петербургтан кала) Казан ун ел йомгаклары буенча социаль объектлар төзү буенча лидерлыкны нык тота.

Бу вакыт эчендә Казанда 90 балалар бакчасы, 25 мәктәп, 18 мәдәният йорты, 5 хастаханә һәм 16 поликлиника, 23 спорт объекты – барлыгы 177 объект төзелгән. Әлеге күрсәткеч буенча икенче урында торган Новосибирскида бу вакыт эчендә объектлар 1,5 тапкыр азрак төзелгән. Соңгы 10 елда төзелгән балалар бакчалары һәм мәктәпләр саны буенча Казан шулай ук барлык миллион халыклы шәһәрләр арасында беренче урында тора.

Социаль объектлар, бигрәк тә балалар өчен төзегәндә бар булган мөмкинлекләр кулланыла. Мәсәлән, яңа мәктәпләр өчен буш җир участоклары булмаган һәм аларга ихтыяҗ зур булган микрорайоннарда, зурлыгы буенча кайвакыт төп биналардан зуррак булган, гамәлдәге учреждениеләрнең өстәмә корпуслары төзелә.

Беренчеләрдән булып өстәмә корпус 2020 елда 93 нче гимназия өчен төзелгән. Аннары яңа корпуслар «СОлНЦе» мәктәбе, «Адымнар» полилингваль комплексы, 114 нче мәктәп өчен төзелә. 2022 елда төзелгән 18 нче гимназия өчен дүрт катлы өстәмә корпусның мәйданы, төп ике катлы бинаның мәйданыннан дүрт тапкыр диярлек артып, 10 мең кв.м тәшкил итә.

Хәзерге вакытта Казанда тагын 63 мәктәп һәм 134 балалар бакчасы төзү өчен җир участоклары броньланган.

Шунысын да әйтергә кирәк, шәһәрдә бэби-бум дәвам итә. Соңгы 10 елда шәһәрдә 213 мең 67 бала туган. Бүгенге көндә мәктәпләрдә 174 мең бала белем ала (узган уку елына караганда 8 меңгә күбрәк), балалар бакчаларына 74 мең мәктәпкәчә яшьтәге бала йөри.