Илсур Метшин: «Бәйрәм һәм ял көннәрендә кар һәм чүп-чар чыгару бурычын үтәдек»

(Казан шәһәре KZN.RU, 11 нче гыйнвар, Камилә Вилданова). Карлы кыш аркасында шәһәрнең кар эретү станцияләре дүрт тапкыр артык йөкләнеш белән эшли. Гыйнварда пунктларга 75 мең тонна кар җибәрелгән, ә кыш башыннан Казан территориясеннән барлыгы 450 мең тонна кар чыгарылган. Юл хезмәтләре бәйрәм һәм ял көннәрендә тәүлек әйләнәсе эшләде – Яңа елның беренче көннәрендә генә 12 мм явым-төшем яуды, бу айлык норманың 26% ын тәшкил итә. Көненә уртача 490 берәмлек махсус техника юлларны кардан чистартуга җәлеп ителгән. Яңа ел каникуллары вакытында торак-коммуналь хуҗалык өлкәсе предприятиеләре хезмәткәрләре дә ял итмәгән. Бәйрәмнәрдә йортлар территориясеннән 160 мең куб метрдан артык каты коммуналь калдыклар чыгарылган. Казан Мэры Илсур Метшин бәйрәм көннәрендә коммуналь һәм юл хезмәтләренең эшен бәяләде – җитди гадәттән тыш хәлләргә юл куелмаган.

«Гыйнварның беренче көннәрендә айлык кар нормасының 30% ка якыны төште, әмма безнең хезмәт күрсәтүче оешмалар җиңде – коллапс булдырылмый калды. Тротуарларны җыештыру буенча искәрмәләр, шикаятьләр бар. Аларны эш режимында эшләячәкбез. Гомумән алганда, идарәче компанияләр, подряд оешмалары бәйрәм һәм ял көннәрендә кар һәм чүп-чар чыгару бурычын үтәделәр», - дип билгеләп үтте шәһәр башлыгы бүген Несмелов урамындагы кар эретү станциясенә барганда.

Шәһәр Мэрына Башкарма комитет җитәкчесе урынбасары Игорь Куляжев сөйләгәнчә, быелгы кыш карлырак булып чыккан. ТР Гидрометүзәге мәгълүматлары буенча, гыйнвар башына барлыгы 157 мм яңгыр яуган, ә 2023 елның февраль ахырына – 161 мм.

«Подрядчы оешмалар кар чыгару, территорияләрне җыештыру буенча көчәйтелгән режимда эшлиләр. Кар эретү пунктларында дүрт тапкыр артык йөкләнеш, шуның аркасында эшчеләр карны эретергә өлгерми, станциядә кар өемнәре барлыкка килә. Әмма, гомумән алганда, ситуацияне хәл итәләр», – дип ассызыклады Игорь Куляжев.

Яңа ел каникуллары вакытында көн саен 490 берәмлек техника җәлеп ителгән. Кышкы сезон башыннан барлыгы 450 мең тонна кар чыгарылган, 34 мең тонна бозга каршы материаллар кулланылган. Карны 8 стационар кар эретү станциясенә чыгаралар, аларда 14 камера урнашкан (Порт, Несмелов, Воровский, Васильченко, Тула, Гадел Кутуй урамнарында, Җиңү проспектында).

Порт урамында яңа станция һәм Несмелов урамында яңа камера ачылу нәтиҗәсендә барлык станцияләрнең җитештерүчәнлеге тәүлегенә 6,3 мең тоннадан 8 мең тоннага кадәр арткан.

Несмелов урамындагы пункт реконструкцияләнгән һәм бу кышта эшли башлаган. Мәйданчыкта ике камера бар, аларның һәрберсе тәүлегенә 574 тонна кар эретә. Станциягә проект куәте исәпләнгәннән күбрәк кар китерелә (ул тәүлегенә 1148 тонна кар тәшкил итә). Иң пик чорда Несмелов урамындагы пунктта 4,8 мең тоннага кадәр кар кабул ителгән. Шуңа күрә станциянең бөтен буш территориясе, аның гомуми мәйданы 50 мең кв.м тәшкил итә, вакытлыча кар җыю өчен кулланыла, соңыннан аны эретәләр.

«Несмелов урамында ике камера урнашкан. Икенчесе 2023 елда төзелде һәм эшли башлады. Шул ук камераларны без Порт урамында җиһазландырдык. Нәтиҗәдә, без үткәрүчәнлекне арттырдык, ягъни кар 2-2,5 тапкыр тизрәк эри», – дип сөйләде «Водоканал» МУП генераль директоры Андрей Егоров.

Кышкы сезон башыннан кар эретү пунктларында барлыгы 386 мең тонна кар кабул ителгән. Күләмнәр узган сезон күрсәткечләре белән чагыштырырлык, әмма 2021 елның шул ук чорында кабул ителгән кар күләменнән 2 тапкыр артык. Моннан тыш, кар массасы белән бергә кар эретү пунктларына чүп һәм ком эләгәчәк, ул камераларда урнашачак. Агымдагы сезонда 1600 куб.м. чүп чыгарылган һәм утильләштерелгән.

30 нчы декабрьдән 8 нче гыйнварга кадәр күпфатирлы һәм шәхси торак йортлар территориясеннән 160 мең куб.м. каты көнкүреш калдыклар чыгарылган. Иң зур йөкләнеш 30 нчы декабрьдә һәм 2 нче гыйнварда була. Гомумән алганда, чыгарылган калдыклар күләме узган ел белән чагыштырганда 2% ка арткан. Шул ук вакытта Яңа ел каникулларында чүп-чар чыгаруга шикаятьләр саны узган ел белән чагыштырганда дүрт тапкырдан артыкка кимегән.

«Бәйрәм көннәрендә 98 чүп ташучы машина эшләде. Моның ярдәмендә 160,5 мең куб метр калдык җыелды. Бу узган ел белән чагыштырганда 2% ка күбрәк, әмма шул ук вакытта шикаятьләр саны өч тапкырга кимеде», – дип хәбәр итте Торак-коммуналь хуҗалык комитеты рәисе Василий Лысачкин.

Йорт яны территорияләрен җыештыруга 1837 җыештыручы һәм 104 берәмлеккә кадәр техника чыга.